လါအီးကထိဘၢၣ် ၁၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢ, ဘျံးဒဝဲၢ်ကီၢ်ရ့ၣ် သုးက့နီၣ်ဂံၢ်-၄ ဟီၣ်ကဝီၤအပူၤ ဖဲတနံၤအံၤ လါအီးကထိဘၢၣ်(၁၀)သီအနံၤန့ၣ် ပယီၤသုးမီၤစိရိၤ Jet fighter-ကဘီယူၤဟဲတ့ၢ်လီၤမ့ၣ်ပိၢ်လၢတၢ်လီၢ်ခံ တီၤပူၤအဃိကမျၢၢ်ဃုၥ်ဒီးကမျၢၢ်တၢ်သူၣ်ထီၣ်တဖၣ်ဘၣ်ဒိဝဲအဂ့ၢ်ဘျံးဒဝဲၢ်ကီၢ်ရ့ၣ်ပၥ်ဖျါဝဲဖဲတနံၤအံၤန့ၣ် လီၤ.
စးထီၣ်ဖဲတနံၤအံၤဂီၤခီ ၈ နၣ်ရံၣ်တုၤလၢ ၉း၃၀ မံးနံးအဆၢကတီၢ်န့ၣ်ပယီၤသုးမီၤစိရိၤသုးကရူၢ်ကဘီယူၤ လၢအမ့ၢ်(Jet fighter FTC-2000G)အံၤဟဲတ့ၢ်လီၤဝဲမ့ၣ်ပိၢ်ဆူ ထံမိၢ်ပှၢ်ဟီၣ်ကဝီၤ, ဖဲထံခံသဝီအပူၤခံဘျီဒီးဖဲ လၢၢ်မုၢ်လါကီၢ်ဆၣ်, တကူၢ်သဝီအပူၤတဘျီ ကဲထီၣ်အသးတနံၤဃီဃီလၢတၢ်လီၢ်ခံတီၤအဂ့ၢ်ဒ်တၢ်ပၥ်ဖျါ ပူၤအသိးသ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါဒ်တၢ်ပၥ်ဖျါပူၤအသိးန့ၣ်တၢ်လီၢ်ခံတီၤလၢသုးကရူၢ်ကဘီယူၤလဲၤတ့ၢ်လီၤမ့ၣ်ပိၢ်အလီၢ်သ့ၣ်တဖၣ်န့ၣ်ဘၣ်ဒိဝဲကမျၢၢ်ပှၤလီၢ်ကဝီၤဖိတနီၤအကျါပၣ်ဃုၥ်ဖိသၣ်ဖိတဂၤဒီးဘၣ်ဟးဂီၤကွံၥ်ဝဲဒၣ်တၢ်သူၣ်ထီၣ်စ့ၢ်ကီးတဖျၢၣ်အသိးကမျၢၢ်တၢ်ဘၣ်ဒိဘၣ်ထံးတခီတၢ်မၤလီၤတံၢ်အီၤအဖၢမုၢ်ဒံးအဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိးဘျံးဒဝဲၢ်ကီၢ်ရ့ၣ်, ထံမိၢ်ပှၢ်ဟီၣ်ကဝီၤ, ဖဲထံခံသဝီအပူၤ ဖဲလါအီးကထိဘၢၣ်(၈)သီအနံၤစ့ၢ်ကီးန့ၣ် ပယီၤသုးမီၤစိရိၤ Y12 ကဘီယူၤဟဲတ့ၢ်လီၤဒံးဝဲမ့ၣ်ပိၢ်အဖျၢၣ် ၄၀ ဘျဲၣ်, ကမျၢၢ်တၢ်ဘၣ်ဒိဘၣ်ထံးတအိၣ် ဘၣ်ဆၣ်ကမျၢၢ်ဟံၣ်ဒီးတၢ်ဘူၣ်တၢ်ဘါတၢ်သူၣ်ထီၣ်ဘၣ်ဟးဂီၤကွံၥ်ဝဲဒၣ်န့ၣ်လီၤ.
အဃိထံခံပှၤသဝီဖိ ပှၤအဂၤ ၃၀၀ ဘျဲၣ်သ့ၣ်တဖၣ်ဘၣ်သုးကပၤကွံၥ်သးဆူတၢ်ပူၤဖျဲးအလီၢ်ဆူထံဆၢကီၢ် ဆၢတၢ်လီၢ်တကပၤစးထီၣ်လၢန့ၣ်လံၤလံၤအဂ့ၢ်ပဒိၣ်စီၤအဲၣ်နၤစံးအါထီၣ်ဝဲဒၣ်န့ၣ်လီၤ.
