လါအီးကထိဘၢၣ် ၁၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)လၢၢ်မုၢ်လါကီၢ်ဆၣ်အပူၤ ဖဲအပူၤကွံၥ်နွံအခါန့ၣ် ပယီၤသုးဟဲက့ၤဟ့ၣ်လီၤကဒီးသးဆူ ကညီဒီကလုၥ်ဂၢၤသးကရၢ(KNDO)သုးရ့ၣ်-၇ အအိၣ် ၄ ဂၤ အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲအသိး သ့ၣ်ညါဘၣ်န့ၣ် လီၤ.
ဒ်ဘျံးဒဝဲၢ်ကီၢ်ရ့ၣ်တၢ်ကစီၣ်ပူၤပၥ်ဖျါဝဲအသိးန့ၣ် ဖဲလါအီးကထိဘၢၣ် ၅ သီအနံၤန့ၣ် ပယီၤသုးဟဲက့ၤဟ့ၣ်လီၤသးလၢ သုးရ့ၣ်(၇) အအိၣ် (၃)ဂၤဝံၤ မၤကဒီးဖဲ ၈ သီအနံၤန့ၣ် ဟဲက့ၤဟ့ၣ်လီၤကဒီးသးအသီ(၁)ဂၤ ပၥ်ဖှိၣ်ခဲလၢၥ်(၄)ဂၤန့ၣ်လီၤ.
ပယီၤသုးလၢအဟဲက့ၤလီၤသး(၄)ဂၤအံၤမ့ၢ်ဝဲသုးသီဖိ ထီၣ်ဝဲနီၣ်ဂံၢ်(၁၂)သုးတၢ်သိၣ်လိဖဲတနီသရံၣ်ကီၢ်ခီအံၤဒီး ဒ်န့ၣ်အသိး အဝဲသ့ၣ်အံၤ ဘၣ်တၢ်ဖီၣ်ဆူၣ်အီၤလၢသုးမီၤစိရိၤဝံၤတၢ်ဒုးထီၣ်ဆူၣ်အီၤလၢသုးတၢ်မၤလိအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
တကးဒံးဘၣ်ပှၤသ့ၣ်တဖၣ်အံၤခီဖျိဃ့ၢ်ထီၣ်ဝဲလၢသုးတၢ်မၤလိပူၤအကတီၢ်အဃိ အတၢ်ဟဲက့ၤဟ့ၣ်လီၤသးဘျီဝဲအံၤ တၢ်စုကဝဲၤ တပၣ်ဃုၥ်ဝဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးဖဲအပူၤကွံၥ်တလါအံၤလါအီးကထိဘၢၣ်ထီၣ် ၁ သီ ဒီး ၆ သီအနံၤစ့ၢ်ကီး သုးမီၤစိရိၤအပှၤသုးဖိ ဟဲက့ၤဟ့ၣ်လီၤ အသးလၢ(KNLA)သုးရ့ၣ်(၁၁)အအိၣ်ဒီး(KNDO)သုးရ့ၣ်-၇ အအိၣ် ၄ ဂၤဒံးအဂ့ၢ်န့ၣ် ကီၢ်ရ့ၣ်တၢ်ကစီၣ်တၢ်မၤနီၣ် စရီပူၤ အသိးသ့ၣ်ညါဘၣ်န့ၣ်လီၤ.
ကီၢ်ပယီၤပူၤစးထီၣ်ဖဲတၢ်ဘိးဘၣ်ရၤလီၤဝဲလၢတၢ်ကဘၣ်သုးတၢ်သိၣ်တၢ်သီဝံၤလီၢ်ခံန့ၣ် သုးမီၤစိရိၤအံၤကိးဆူၣ်ဝဲကမျၢၢ် သူၣ်ဘီၣ် သးစၢ်သ့ၣ်တဖၣ်ဝံၤဆှၢထီၣ်ဝဲဆူတၢ်ဒုးဆူၣ်အလီၢ်သ့ၣ်တဖၣ်န့ၣ်လီၤ.အဃိပှၤသုးဖိလၢဘၣ်တၢ်မၢဆူၣ်လၢအကဲသုးတဖၣ်ကဟဲက့ၤဟ့ၣ်လီၤသးလၢတၢ်ပၢၢ်ဆၢကရူၢ်ကရၢလၢအဘူးဒီးအဝဲသ့ၣ်တဖၣ်အအိၣ်အဂ့ၢ်န့ၣ် ခ့ၣ်အဲၣ်ယူၣ် ဆီၣ်တခူဘိးဘၣ်သ့ၣ်ညါ စ့ၢ်ကီး ဝဲန့ၣ်လီၤ.