ပယီၤသုးလၢအဘၣ်ဒိဘၣ်ထံးတဖၣ် တၢ်ကူစါယါဘျါအီၤလၢဖၣ်အၣ်ဒီးတီၤကလ့တၢ်ဆါဟံၣ်ပှဲၤပှဲၤ

လါအီးကထိဘၢၣ် ၁၃ သီ, ၂၀၂၅ နံၣ်, ခ့ၣ်အဲးစံၣ်

ကညီကီၢ်စဲၣ်ဟီၣ်ကဝီၤ ပယီၤသုးဒီးတၢ်ပၢၢ်ဆၢသိၣ်မှံၤသုးကရူၢ်အဘၢၣ်စၢၤတၢ်ဒုးကဲထီၣ်အပူၤ ပယီၤသုးလၢအဘၣ် ဒိဘၣ်ထံး တဖၣ်အံၤ တၢ်ဆှၢလီၤကူစါယါဘျါအဝဲသ့ၣ်လၢဖၣ်အၣ်,တီၤကလ့တၢ်ဆါဟံၣ်အိၣ်ဝဲပှဲၤပှဲၤအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ် တၢ်ကစီၣ်ဖိအအိၣ်န့ၣ်လီၤ.

ဖဲအပူၤကွံၥ်လါအီကူးတုၤလၢတလါအံၤလါအီးကထိဘၢၣ်န့ၣ် ပယီၤသုးလၢအဘၣ်ဒိဘၣ်ထံးလၢကြုၢ်တု,ဖၣ်ပူၣ်,ကမၤမိၣ်ဒီး ကီးတရံးတၢ်ဒုးအပူၤတဖၣ်အံၤ တၢ်ဆှၢလီၤကူစါယါဘျါအဝဲသ့ၣ်ဖဲဖၣ်အၣ်ဝ့ၢ်တၢ်ဆါဟံၣ်ဖးဒိၣ်ဒီး တီၤကလ့သုးတၢ်ဟံၣ်အဂ့ၢ်န့ၣ် ပှၤလၢဘူးဒီးပယီၤသုးကရူၢ်လၢအိၣ်ဖၣ်အၣ်ဝ့ၢ်ပူၤတဂၤ စံးဝဲန့ၣ်လီၤ.

အဝဲစံးဝဲလၢ“လၢကြုၢ်တုတကပၤန့ၣ်ပယီၤသုးဘၣ်ဒိဘၣ်ထံးအါမး.အသံနါက့အိၣ်ဒီဒူၣ်ညါ.လၢဖၣ်ပူၣ်,ကမၤမိၢ်တကပၤန့ၣ်စ့ၢ်ကီး ဆှၢလီၤဝဲပှၤဆါဒီဒူၣ်.ပှၤသုးဖိလၢအဘၣ်ဒိဖဲကီးတရံး-မၠၣ်ဝတံၣ်အ့ရှါကျဲတဖၣ်န့ၣ်လၢကြုၢ်တုတဆီပထံၣ်အဆှၢလီၤဝဲဆူတီၤကလ့ တၢ်ဆါဟံၣ်လီၤ. ပှၤဘၣ်ကွဲးဘၣ်ကါအါတလၢအဃိ ဖၣ်အၣ်တၢ်ဆါဟံၣ်မ့ၢ်ဂ့ၤ,တီၤကလ့တၢ်ဆါမ့ၢ်ဂ့ၤပှၤတအိၣ်ဘှံးဘၣ်လၢၤဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.

ဒ်န့ၣ်အသိးဖဲလါအီးကထိဘၢၣ် ၉ သီအနံၤန့ၣ် ပှၤသုးဖိသံၣ်ဖိဒီးခိၣ်နၢ်လၢအဘၣ်ဒိဘၣ်ထံးသ့ၣ်တဖၣ်န့ၣ် ဖၣ်အၣ်ဝ့ၢ်ပူၤသုးမီၤစိရိၤ အပှၤဒီး (မြင်းခြံမြို့) ဘၠူၣ်စီထံအခိၣ် (သီတာယုမွန်)ဒီးအပှၤတဖၣ် ဟဲကတိၤဟ့ၣ်ဂံၢ်ဟ့ၣ်ဘါအဝဲသ့ၣ်ဒံးအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ် ကစီၣ်ဖိစံးဝဲအသိး သ့ၣ်ညါဘၣ်န့ၣ်လီၤ.

လၢန့ၣ်အမဲၥ်ညါဖဲတၢ်ဒုးကဲထီၣ်လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်ဝတံၣ်ဝ့ၢ်ဃၢၤ လ့က့ၣ်ကိၥ်ဟီၣ်ကဝီၤလၢတလါအတီၢ်ပူၤ န့ၣ်စ့ၢ်ကီး ပယီၤသုးအပှၤသံကအိၣ်လၢ(၁၅၀)ဂၤခိၣ်ဃၢၤညါအသိး ပယီၤသုးလၢအဘၣ်ဒိဘၣ်ထံးလၢတၢ်ဒုးအပူၤ သ့ၣ်တဖၣ်အံၤ တၢ်ကူစါယါဘျါအီၤလၢမၠၣ်ဝတံၣ်တၢ်ဆါဟံၣ်ဖးဒိၣ်ဒီးစွ့ၤကိၣ်ကိၤ BGF တၢ်ဆါဟံၣ်အိၣ်ဝဲအဂ့ၢ်န့ၣ် လီၢ်ကဝီၤပှၤမူ ဘၣ်ဒါလၢအိၣ်ဖဲန့ၣ် တဖၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.

“မ့မ့ၢ်လၢလ့က့ၣ်ကိၥ်တၢ်ဒုးအခါန့ၣ်ဖဲလါစဲးပထ့ဘၢၣ် ၂၁ သီ တုၤလၢ ၂၅ သီန့ၣ်အဝဲသ့ၣ်သုးကျိၤဘၣ်ဒိဆါမးလီၤ.သုးခိးကီၢ်ဆၢ(BGF) နါက့ဘၣ်ဒိဘၣ်ထံးအိၣ်လီၤ.ပှၤဘၣ်ဒိတဖၣ်န့ၣ်ပှၤဆှၢထဲမၠၣ်ဝတံၣ်တၢ်ဆါဟံၣ်တကးဘၣ်.လၢစွ့ၤကိၣ်ကိၤတၢ်ဆါဟံၣ်နါက့ပှၤကူစါယါဘျါအိၣ်လီၤ.ပှၤလၢအဘၣ်ဒိနးတဖၣ်န့ၣ်ပှၤဆှၢထီၣ်အဝဲသ့ၣ်လၢမဲၢ်ဆီးတၢ်ဆါဟံၣ်နါက့အိၣ်လီၤ”အဂ့ၢ်န့ၣ် စံးဝဲန့ၣ်လီၤ.

သုးမီၤစိရိၤအံၤလၢကထီၣ်ဒိၣ်စိက့ၤကညီကီၢ်စဲၣ်ပူၤ သုးကလၢၤတၢ်လီၢ်လၢအဝဲသ့ၣ်ဘၣ်ဟ့ၣ်ဆှူဝဲတဖၣ်အံၤအဂီၢ်န့ၣ် ဖၣ်အၣ်သုးတြိၤ(၂၂), မီၣ်လမၠဲၣ် သုးကီၢ်ခီ(ရတခ)စုတီၤဖီလၥ် သုးတြိၤ(၄၄), ယိၤဒိၣ်ကီၢ်စဲၣ် သုးတြိၤ(၅၅) သုးရ့ၣ်သုးပၥ်ဖှိၣ်သ့ၣ်တဖၣ် အံၤဟဲထီၣ်မၤဝဲဒုးယၤတၢ်ဟူးတၢ်ဂဲၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

လၢပယီၤသုးဟဲက့ၤထီၣ်ကဒါဒီတကီၢ်အပူၤစ့ၢ်ကီးန့ၣ် သုးခိးကီၢ်ဆၢ(BGF)တိစၢၤမၤစၢၤဝဲဒ်အမ့ၢ်ဆှၢထီၣ် ဆှၢလီၤကျိချံပှၥ်သၣ်ဒီး ပှၤလၢအဘၣ်ဒိဘၣ်ထံးသ့ၣ်တဖၣ်ဆှၢစၢၤဝဲလၢတၢ်ဆါဟံၣ်အိၣ်ဝဲအဂ့ၢ်န့ၣ် လီၢ်ကဝီၤပှၤဟ့ၣ်တၢ်ကစီၣ်ဖိစံးဝဲန့ၣ်လီၤ.