လါနိၣ်ဝ့ဘၢၣ် ၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် မဲၢ်ကနးခံသဝီအပူၤ ဖဲလါနိၣ်ဝ့ဘၢၣ် ၇ သီ ဂီၤခီ ၇ နၣ်ရံၣ်ဃၣ်ဃၣ် အဆၢကတီၢ် ကမျၢၢ်ပိၥ်ခွါယီၣ်ဘၣ်ဝဲ သုးခိးကီၢ်ဆၢ()ဒီးပယီၤသုးအမ့ၣ်ပိၢ်တဂၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤ ပှၤဘၣ်မူ ဘၣ်ဒါအအိၣ်န့ၣ်လီၤ.
ဖဲတလါအံၤထီၣ် ၁ သီအနံၤန့ၣ် (BGF)ဒီးပယီၤသုးဂံၢ်ဘါကအိၣ်လၢ(၇၀)ခိၣ်ဃၢၤလၢအိၣ်(သုးက့ ၅)ကမၤမိၣ်ဝ့ၢ် အံၤတဖၣ် ဟဲနုၥ်လီၤဝဲလၢ ဖၣ်အၣ်ကီၢ်ဆၣ် (KNLA)သုးရ့ၣ် ၁ ဟီၣ်ကဝီၤ မဲၢ်ကနးခံကရူၢ်ဒီးဝဲပၠၣ်ကရူၢ်အပူၤဝံၤဟးထီၣ်လီၢ်ခံ မဲၢ်ကနးခံသဝီဖိ စီၤအီၤလၣ်တ့ၤ(၅၈)နံၣ်အံၤ ယီၢ်ဘၣ်ဟီၣ်လၥ်မ့ၣ်ပိၢ်ဘၣ်ဟဲကဲထီၣ်ဝဲဒ်အံၤန့ၣ်လီၤ.
(BGF)သုးပၥ်ဖှိၣ်တဖၣ်အံၤဖဲအဝဲသ့ၣ်ဟဲနုၥ်လီၤတၢ်တနံၤအခါန့ၣ် ယီၢ်ဘၣ်ဝဲဒၣ်(KNLA)အဟီၣ်လၥ်မ့ၣ်ပိၢ်(၂)ဂၤကဲထီၣ်ဒံးဝဲဒီး ဘၣ်ဆၣ်အဝဲသ့ၣ်အံၤတချုးဟးထီၣ်က့ၤဒံးဘၣ်အခါ ဒိးလီၤတ့ၢ်ဃၥ်ဝဲဟီၣ်လၥ်မ့ၣ်ပိၢ်အံၤလၢမဲၢ်ကနးခံသဝီဖိ သဝီဃၢၤ ကျီးပူၤ ဒဲခီၣ်ထံးအဃိ ဖဲဒဲကစၢ်လဲၤအခါယီၢ်ဘၣ်ဝဲကဲထီၣ်ဒ်အံၤလီၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါတဂၤ စံးဝဲန့ၣ်လီၤ.
အဝဲစံးဝဲလၢ“ပှၤကမျၢၢ်လၢအဘၣ်ပယီၤဒီး(BGF)မ့ၣ်ပိၢ်တဂၤန့ၣ်အိၣ်လၢမဲၢ်ကနးခံသဝီဖိမီၤနီၤ.ပယီၤသုးဒီးသုးခိးကီၢ်ဆၢဟဲထီၣ်ဖဲမဲၢ်ကနးခံသဝီဖိ လၢပှၤဃုးပူၤပှၤဒဲခီၣ်ထံးန့ၣ်ဒိးလီၤဃၥ်ဝဲမ့ၣ်ပိၢ်အဃိ ပှၤသဝီဖိအံၤလဲၤလၢအကစၢ်ဒဲဘျီဘၣ်ဝဲန့ၣ်. ယဆိမိၣ်ပယီၤသုး(BGF)တဖၣ်အံၤဖဲအဝဲသ့ၣ်ဟဲထီၣ်လၢဖါပီၢ်သဝီတကပၤအခါန့ၣ်ယီၢ်ဘၣ်ဒံးဝဲကီၢ်သူလ့ၤအမ့ၣ်ပိၢ်(၂၀)ဂၤဒံး, အဃိ အသးတမုၥ်ဘၣ်ဒီးကဒိးလီၤဃၥ်က့ၤမ့ၣ်ပိၢ်ဒ်အံၤလီၤ.ပှၤသဝီဖိ အဒဲန့ၣ်သ့ၣ်ညါဝဲတီတီဒီးဒိးလီၤဃၥ်ဝဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကီၢ်ခါခဲအံၤမဲၢ်ကနးခံသဝီဖိ လၢအယီၢ်ဘၣ်မ့ၣ်ပိၢ်အံၤ တၢ်ကူစါယါဘျါအီၤလၢဟီၣ်ကဝီၤကီၢ်သူလ့ၤတၢ်ဆါဟံၣ်ဒီး ဒ်န့ၣ်အသိး စီၤအီၤလၣ်တ့ၤအံၤခီဖျိအခီၣ်ညါသး,အခီၣ်ဒုၣ်သၣ်ဖျိးကွံၥ်ခဲလၢၥ်သူအီၣ်တသ့လၢၤဘၣ်အဃိ တၢ်ကဘၣ်ဒီၣ်တူၥ်ကွံၥ်အခီၣ် တကပၤအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
ဒ်န့ၣ်အသိးတၢ်ကဲထီၣ်သးလၢကမျၢၢ်ယီၢ်ဘၣ်မ့ၣ်ပိၢ်ဝံၤလီၢ်ခံ သဝီဖိတဖၣ်ဘၣ်ယိၣ်ဝဲလၢဟီၣ်လၥ်မ့ၣ်ပိၢ်လၢပယီၤသုးဒီး(BGF) ဒိးလီၤတ့ၢ်ဃၥ်ဝဲအံၤကအိၣ်တ့ၢ်ဒံးအဃိ မုၢ်ဆ့ၣ်ထီၣ်ဟါလါနိၣ်ဝ့ဘၢၣ် ၈ သီအနံၤန့ၣ် ဟီၣ်ကဝီၤ(KNLA) သုးရ့ၣ် ၁ အပှၤ လဲၤသမံသမိးမၤဆှဲလဲ ဝဲဟီၣ်လၥ်မ့ၣ်ပိၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဟီၣ်ကဝီၤဒူသဝီခိၣ်ဃၢၤတၢ်လီၢ်လၢကမျၢၢ်ယီၢ်ဘၣ်မ့ၣ်ပိၢ်ကဲထီၣ်ခဲအံၤန့ၣ် အပူၤကွံၥ်ပယီၤသုးလၢအိၣ် ကမၤမိၢ်ဝ့ၢ်အံၤတဖၣ် တၢ်ဒုးကဲထီၣ်တအိၣ်ဘၣ်ဘၣ်ဆၣ်ခးစိဃီၤ ဝဲကျိဖးဒိၣ်အိၣ်ဝဲတလီၢ်တလီၢ်ဒီး တၢ်ဘၣ်ဒိဘၣ်ထံးတၢ်ဟးဂူၥ်ဟးဂီၤကဲထီၣ်အိၣ် ဝဲဒၣ်န့ၣ်လီၤ.
