ကျိဖးဒိၣ်ဒီးဒြိမ့ၣ်ပိၢ်အဃိ မူကီၢ်ဆၣ် ကမျၢၢ်ဘၣ်ဒိ(၃)ဂၤအကျါပၣ်ဃုၥ်ဖိသၣ် ၁ ဂၤ

လါနိၣ်ဝ့ဘၢၣ် ၆ သီ, ၂၀၂၅ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)မူကီၢ်ဆၣ်အပူၤ အပူၤကွံၥ်စှၤသီအခါ ပယီၤသုး လဲၤတ့ၢ်လီၤတၢ်ဒီးဒြိအံၤအဃိ ကမျၢၢ်ဘၣ်ဒိ(၂)ဂၤဒီးဖဲန့ၣ်အကျါပၣ်ဃုၥ်ဝဲဖိသၣ်တဂၤအဂ့ၢ်န့ၣ် ကညီတၢ်ဆီၣ်ထွဲမၤစၢၤတၢ်မုၥ် တၢ်ခုၣ်ပှၥ်ဘျးစဲ- KPSN ထုးထီၣ်ပၥ်ဖျါဝဲဖဲတနံၤအံၤန့ၣ်လီၤ.

ဖဲအပူၤကွံၥ်လါအီးကထိဘၢၣ်လၢၥ် ၃၁ သီအနံၤန့ၣ် ပယီၤသုးခီၣ်ချ့သုးရ့ၣ်(ခမရ-၅၉၀)ခးလီၤဝဲကျိဖးဒိၣ် ၂ ဖျၢၣ် လီၤတဲၥ်ပိၢ်ဖး ထီၣ်ဝဲလၢအီၤခၠါသၤ(အောင်ချမ်းသာ)သဝီပူၤအဃိ ဘၣ်ဒိဝဲကမျၢၢ်ပိၥ်ခွါ(၅၈)နံၣ်တဂၤဒီး ဟံၣ်ဟးဂီၤဝဲတဖျၢၣ်အဂ့ၢ်န့ၣ် KPSN စံးဝဲ န့ၣ်လီၤ.

ဒ်န့ၣ်အသိးတၢ်ကဲထီၣ်သးဝံၤဖဲတလါအံၤလါနိၣ်ဝ့ဘၢၣ် ၃ သီအနံၤစ့ၢ်ကီး ပယီၤသုးခီၣ်ချ့သုးရ့ၣ်(ခမရ-၄၃၉)သုးရ့ၣ်အံၤ လဲၤတ့ၢ် လီၤဝဲဒြိမ့ၣ်ပိၢ်(၂)ဖျၢၣ်လၢ သ့ဘီကၠိ(သင်းဘောကျွန်း)သဝီပူၤအဃိ ဖဲန့ၣ်ကမျၢၢ်ပိၥ်မုၣ်(၄၀)နံၣ်အံၤဒီးဖိသၣ်(၆)နံၣ်တဂၤ ဘၣ်ဒိဘၣ် ထံးဝဲစုၥ်စုၥ်အသိး ဟံၣ်စ့ၢ်ကီးဟးဂီၤဝဲတဖျၢၣ်န့ၣ်လီၤ.

တကးဒံးဘၣ်ဖဲအပူၤကွံၥ်လါအီးကထိဘၢၣ် ၂၈,၂၉,၃၀ သီအနံၤန့ၣ်စ့ၢ်ကီး လၢလၢၢ်ဒိၣ်ကီၢ်ဆၣ်ဒူသဝီအပူၤ ပယီၤသုးဟးတ့ၢ်လီၤ တၢ်ဒီးဒြိမ့ၣ်ပိၢ်အဃိ တၢ်သူၣ်ထီၣ်ဝဲ(၂)ဖျၢၣ်ကဲထီၣ်ဒံးဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.

ချၢၣ်လွံၢ်ထူၣ်ကီၢ်ရ့ၣ်အပူၤ တၢ်ဒုးကဲထီၣ်အိၣ်ဂ့ၤတအိၣ်ဂ့ၤ ခီဖျိလၢပယီၤသုးအကျိဖးဒိၣ်,ဒြိဒီးကဘီယူၤအံၤအဃိ အပူၤကွံၥ် လါစဲးပထဘ့ဘၢၣ်တလါအတီၢ်ပူၤ ကမျၢၢ်သံပၥ်ဖှိၣ်အိၣ်ဝဲ(၈)ဂၤဒီးဘၣ်ဒိဝဲ(၃၃)ဂၤအဂ့ၢ်န့ၣ် သ့ၣ်ညါဒ်ကီၢ်ရ့ၣ်တလါတဘျီ တၢ်မၤနီၣ်စရီပူၤအသိးန့ၣ်လီၤ.