လါနိၣ်ဝ့ဘၢၣ် ၂၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)တနီသရံၣ်ကီၢ်ဆၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မီတီၤ(မိဒီၢ်)ဝ့ၢ်လၢတၢ်ပၢၢ်ဆၢ သုးပၥ်ဖှိၣ်ကရူၢ်ထီၣ်န့ၢ်ဝဲအံၤ လၢကထီၣ်မၤန့ၢ်က့ၤဝဲအဂီၢ် ပယီၤသုးမၤအါထီၣ်သုးဂံၢ်ဘါဒီးကဘီယူၤလဲၤ ခးလီၤတၢ်ကိးမုၢ်နံၤဒဲး ဃၣ်ဃၣ် ကီၢ်ရ့ၣ်နဲၢ်ရွဲၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
မီတီၤ(မိဒီၢ်)ကီၢ်ဆၢဝ့ၢ် ပယီၤသုးခီၣ်သုးရ့ၣ်(ခလရ-၂၂၄)သုးကလၢၤအံၤ ဖဲအပူၤကွံၥ်လါနိၣ်ဝ့ဘၢၣ် ၁၄ သီအနံၤ (KNLA) သုးပၥ်ဖှိၣ်ထီၣ်မၤ န့ၢ်ကွံၥ်ဝဲဝံၤ ခဲအံၤလၢကထီၣ်ဒိၣ်စိက့ၤဝဲတၢ်လီၢ်အံၤအဂီၢ် ပယီၤသုးဆှၢအါထီၣ်အသုး ဂံၢ်ဘါအါအါဂီၢ်ဂီၢ်အမဲၥ်ညါ ကဘီယူၤစ့ၢ်ကီး လဲၤခးလီၤတၢ်အိၣ်ဝဲကိးမုၢ်နံၤဒဲးဃၣ်ဃၣ်န့ၣ်လီၤ.
ဘၣ်ဃးတၢ်ဂ့ၢ်အံၤ ဘျံးဒဝဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံးဝဲလၢ.“ပယီၤသုးန့ၣ်အတၢ်တိၥ်လၢကဟဲက့ၤထီၣ်ဒိၣ်စိက့ၤ ကီၢ်ဆၢ အံၤအခိၣ်သ့ၣ်လီၤ .ဒ်သိးပသ့ၣ်ညါတၢ်ကစီၣ်အသိးန့ၣ်တၢ်လီၢ်အံၤကဘၣ်ဟဲက့ၤဒိၣ်စိက့ၤလၢအပူၤကွံၥ်တနံၣ်လံမီၤ. ခဲအံၤခီဖျိ မိဒီၢ်လီၤအဖီခိၣ်န့ၣ် အဝဲသ့ၣ်မၤဆူၣ်ထီၣ်သုးဂ့ၢ်ဝီသပှၢ်တၢၢ်လီၤလၢတနီသရံၣ်ကီၢ်ခီတကပၤအံၤ.ပှၤထီၣ်န့ၢ်ဝဲမိဒီၢ်ဝံၤလီၢ်ခံန့ၣ် ပယီၤသုးဟဲမၤအါထီၣ်အဂံၢ်အဘါ.ဟဲတ့ၢ်လီၤတၢ်ဒီးကဘီယူၤန့ၣ်ကအိၣ်လၢ(၅)ဘျီ,(၆)ဘျီလံ.မ့ဝံၤလၢပျီပူၤကျဲမုၢ်ခိၣ်နါက့ဆှၢအါထီၣ်အသုးဂံၢ်ဘါအဃိပတယးလၢပယီၤသုးန့ၣ်အိးထီၣ်ဝဲတၢ်ဒုးမဲၥ်သၣ်အါထီၣ်.”အဂ့ၢ်န့ၣ် စံးဝဲန့ၣ် လီၤ.
လၢတၢ်န့ၣ်အဃိ ဟီၣ်ကဝီၤဖဲန့ၣ်အပူၤပယီၤသုးလၢအဟဲထီၣ်သ့ၣ်တဖၣ်အံၤဒီးဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ် အဘၢၣ်စၢၤ ဒုးယၤတၢ်ဖ့ၣ်စၢဆဲးကဲထီၣ်ဝဲအသိး ဖဲလါနိၣ်ဝ့ဘၢၣ် ၁၈ သီအနံၤ လၢလၢၢ်မုၢ်လါကီၢ်ဆၣ်အပူၤ ပယီၤသုးလၢအဟဲထီၣ်ဆူ ပလီၣ် ဟီၣ်ကဝီၤပူၤတဖၣ် ခီဖျိကညီဒီကလုၥ်ဂၢၤသးကရၢ(KNDO) သုးရ့ၣ်-၇ သုးပၥ်ဖှိၣ်ခိးခးဝဲလၢကျဲလၢအဃိ တၢ်မၤန့ၢ်ဝဲ (MA-1)၄ ခိၣ်,(MA-3)၂ ခိၣ် ဃုၥ်ဒီး ကျိချံပှၥ်သၣ်တၢ်ပီးတၢ်လီလၢအဂၤတဖၣ်အိၣ်ဝဲအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါ ဝဲန့ၣ်လီၤ.
တကးဒံးဘၣ်သုးမီၤစိရိၤအံၤဒ်သိးတၢ်ဃုထၢကကဲထီၣ်လိၣ်ထီၣ်အဂီၢ် ဒီး ဟီၣ်ကဝီၤတၢ်လီၢ်လၢအဝဲသ့ၣ်ဘၣ်ဟ့ၣ်ဆှူကွံၥ်ဝဲ တဖၣ်အပူၤကမျၢၢ်တဖၣ်ကအိၣ်ဒီးကပျံၤတၢ်ဖုးတၢ်ဘၣ်ယိၣ်ဘၣ်ဘှီအဂီၢ်န့ၣ် အဝဲသ့ၣ်သူဝဲကဘီယူၤဟးတ့ၢ်လီၤမ့ၣ်ပိၢ်လၢ ဟီၣ်ကဝီၤဒူသဝီကမျၢၢ်အိၣ်ဆိးအလီၢ်န့ၣ်လီၤ.
မိဒီၢ်ဝ့ၢ်အံၤ အိၣ်ဆီလီၤအသးဖဲကီၢ်ကၠီၣ်တဲၣ်-ကီၢ်ပယီၤဆၢ မ့ၢ်ဝဲတၢ်ကူၣ် လဲၤမၤကၤကျဲမုၢ်ဆဲးကျိးဝဲဆူဘျံးဝ့ၢ်အသိး တချုးပယီၤသုးဘၣ်ဟ့ၣ်ဆှူကွံၥ်ဝဲတၢ်လီၢ်အံၤဒံးဘၣ်ဒီးဟ့ၣ်ဆှူကွံၥ်ဝံၤလီၢ်ခံ ကျိဖးဒိၣ် အမဲၥ်ညါကဘီယူၤလဲၤခးလီၤ တၢ်တလီၢ်လီၢ်အဃိ လီၢ်ကဝီၤကမျၢၢ်လၢအိၣ်ဘူးဖဲန့ၣ်ပှၤနီၣ်ဂံၢ်လၢအကထိဘၣ်ဃ့ၢ်ထီၣ်ဝဲဆူ ထံဆၢ ကီၢ်န့ၣ်လီၤ.
မိဒီၢ်ဝ့ၢ်ပယီၤသုး(ခလရ-၂၄၄)ကလၢၤအံၤ ဘၣ်တၢ်ထီၣ်ဒုးန့ၢ်ဝဲလၢ(၃)သီအတီၢ်ပူၤဒီးတၢ်ဒုးဘျီဝဲန့ၣ်အခါ (KNLA)သုးပၥ်ဖှိၣ် မၤန့ၢ်ဝဲကျိချံ ပှၥ်သၣ်သၣ်အါအါဂီၢ်ဂီၢ်အမဲၥ်ညါဖီၣ်န့ၢ်ဝဲပယီၤသုး(၄၃)ဂၤ န့ၣ်လီၤ.