လါဒံၣ်စ့ဘၢၣ် ၂၂ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤ ဖဲမဟါတနံၤဃီအတီၢ်ပူၤ သုးမီၤစိရိၤကဘီယူၤ လဲၤတ့ၢ်လီၤဝဲမ့ၣ်ပိၢ်လၢကီၢ်ဆၣ်(၂)ဘ့ၣ်အပူၤဒီး တၢ်ဟးဂူၥ်ဟးဂီၤအိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ကၠဲးထိၣ်ကီၢ်ဆၣ် ခရၢၢ်ကရူၢ်အပူၤ ဖဲမဟါလါဒံၣ်စ့ဘၢၣ် ၂၁ သီ မုၢ်ထူၣ် ၁၂း၀၀ အဆၢကတီၢ် သုးမီၤစိရိၤ(Jet Fighter) ကဘီယူၤ လဲၤတ့ၢ်လီၤဝဲပီၣ်(၃၀၀)မ့ၣ်ပိၢ် ၂ ဖျၢၣ်လၢခၠီဝၣ်(ချောင်း၀)သဝီဃၢၤ တၢ်သွၣ်ခိၣ်ကပၤ အမဲၥ်ညါခးဃုၥ်ဝဲ(ရီးကဲး)အဃိ သီခါဖၠၣ်တၢ်သူၣ်ထီၣ်တခိၣ် ဒီးစဲးကၢး(သိလ့ၣ်ယီၢ်)တခိၣ်ဟးဂီၤဝဲအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ် လီၤ.
တကတီၢ်ဃီကဘီယူၤလဲၤတ့ၢ်လီၤမ့ၣ်ပိၢ်အမဲၥ်ညါ ပယီၤသုး(၃၁၀)အမျိၥ်သုးလၢအိၣ်ဆီလီၤသးဖဲန့ၣ် ခးစိဃီၤစ့ၢ်ကီးဝဲ (၁၂၀ မမ) ကျိဖးဒိၣ် ၃ ဖျၢၣ် လီၤတဲၥ်ဝဲလၢ ခရၢၢ်ဒီးခၠီဝၣ်(ချောင်၀)သဝီဃၢၤ ကမျၢၢ်တၢ်ဖံးအီၣ်မၤအီၣ်လီၢ်န့ၣ်လီၤ.
ကဘီယူၤလဲၤတ့ၢ်လီၤမ့ၣ်ပိၢ်ဖဲန့ၣ်ဝံၤတနံၤဃီဖဲဟါခီ ၃း၂၀ မံးနံး အဆၢကတီၢ် သုးမီၤစိရိၤကဘီယူၤလဲၤတ့ၢ်လီၤ ကဒီး ပီၣ်(၂၅၀)မ့ၣ်ပိၢ် ၂ ဖျၢၣ်လၢဖၣ်အၣ်ကီၢ်ဆၣ် ဟးတရဲၥ်ကရူၢ် ကြူကၠံသဝီ ဃၢၤအဃိ ကမျၢၢ်တၢ်ဘၣ်ဒိဘၣ်ထံးတအိၣ်ဘၣ်ဆၣ် ကျီးပူၤတၢ်ထူၣ်တၢ်ဘိဟးဂီၤဝဲန့ၣ်လီၤ.
ဒ်န့ၣ်အသိးကၠဲးထိၣ်ကီၢ်ဆၣ် ခရၢၢ်ကရူၢ်အပူၤ ဖဲအပူၤကွံၥ် ၂၀ သီ မုၢ်ထူၣ် ၁၂း၀၀ နၣ်ဃၣ်ဃၣ်အဆၢကတီၢ် ပယီၤသုး နီၣ်ဂံၢ်(၃၁၀)အမျိၥ်သုးတဒူၣ်ဃီဝဲအံၤ ပညိၣ်ခးလီၤဝဲ(၁၂၀ မမ)ကျိဖးဒိၣ် ၂ ဖျၢၣ်လီၤတဲၥ်ပိၢ်ဖးထီၣ်ဝဲလၢခရၢၢ်ကရူၢ် အခဲၤ (အခိုင်)သဝီဃၢၤ ၂ ဖျၢၣ် ဒီး မိၣ်ခမီၣ်သဝီဃၢၤ ဖျၢၣ်ထူပျီ ၂ ဖျၢၣ်အဃိ ဟံၣ်တၢ်သူၣ်ထီၣ်ဟးဂီၤဝဲ ၁ ဖျၢၣ်န့ၣ်လီၤ.
တကးဒံးဘၣ်ခရၢၢ်ကရူၢ်လၢကဘီယူၤလဲၤတ့ၢ်လီၤမ့ၣ်ပိၢ်ဒီးပယီၤသုးခးလီၤကျိဖးဒိၣ်တလီၢ်လီၢ်အံၤန့ၣ် အပူၤကွံၥ်လါဒံၣ်စ့ဘၢၣ် ၁၃ သီ, ၁၅ သီ ဒီး ၁၆ အနံၤစ့ၢ်ကီး အမျိၥ်သုးတဒူၣ်ဃီဝဲအံၤခးလီၤစိဝဲကျိဖးဒိၣ်အဃိ ကမျၢၢ်ဒီးတၢ်ထူၣ်တၢ်ဘိဘၣ်ဒိဘၣ်ထံး ဟးဂူၥ်ဟးဂီၤကဲထီၣ်ဒံးဝဲန့ၣ်လီၤ.
ဒူသထူၣ်ကီၢ်ရ့ၣ်အပူၤ အပူၤကွံၥ်လါနိၣ်ဝ့ဘၢၣ်တလါအတီၢ်ပူၤ ကဘီယူၤလဲၤတ့ၢ်လီၤမ့ၣ်ပိၢ်(၃)ဘျီ, ခးလီၤကျိဖးဒိၣ်(၅)ဘျီ, (DKBA)လၢအိၣ်သုးမီၤစိရိၤစုတီၤဖီလၥ်အံၤစ့ၢ်ကီး ခးလီၤကျိဖးဒိၣ် ၅ ဘျီအဃိ လီၢ်ကဝီၤကမျၢၢ်ဘၣ်ဒိ ၂ ဂၤ ဒီး ဟံၣ်တၢ်သူၣ် ထီၣ်ဟးဂီၤ ၂ ဖျၢၣ်အဂ့ၢ်န့ၣ် တလါတဘျီတၢ်မၤနီၣ် စရီအပူၤ သ့ၣ်ညါဘၣ်န့ၣ်လီၤ.