လါဒံၣ်စဲဘၢၣ် ၂၂ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဘျံးဒဝဲၢ်ကီၢ်ရ့ၣ်, လၢၢ်မုၢ်လါကီၢ်ဆၣ်ဟီၣ်ကဝီၤ, ဖဲကၠၣ်ပျီသဝီပူၤန့ၣ်ပှၤတူၢ် ကွီၢ်ဖိ/ပှၤဃိၥ်ဖိ(၄)ဂၤလၢအဃ့ၢ်ဖျိးထီၣ်ဒီးမၤသံကွံၥ်ဝဲဒၣ်(CDM)သရၣ်မုၣ်ဒီၣ်အ့သံအီၤဒီးအဝၤအံၤဖဲလါဒံၣ်စဲၣ်ဘၢၣ် (၁၇)သီ,(၁၈)သီအနံၤန့ၣ်တၢ်ဖီၣ်ချုးန့ၢ်ဝဲပှၤဃိၥ်ဖိ(၄)ဂၤအံၤလံအဂ့ၢ်ဘျံးဒဝဲၢ်ကီၢ်ရ့ၣ်ထုးထီၣ်ပၥ်ဖျါဖဲမဟါ(၂၁)သီအနံၤ န့ၣ်လီၤ.
ဘၣ်ထွဲဒီးပှၤဃိၥ်ဖိ(၄)ဂၤအံၤအခီၣ်ထံးခီၣ်ဘိဘၣ်တၢ်ဒုးဃၥ်အီၤလၢ(KNDO)သုးရ့ၣ်(၇),သုးဒ့(၅)အစုပူၤဒီးဖဲလါဒံၣ် စဲဘၢၣ်(၁၃)သီ,မုၢ်ဂီၤခီ(၄း၅၀)မံးနံးအဆၢကတီၢ်န့ၣ်ဃ့ၢ်ဖျိးထီၣ်ကွံၥ်ဝဲဒၣ်ဝံၤအလီၢ်ခံဖဲလါဒံၣ်စဲဘၢၣ်(၁၅)သီအနံၤန့ၣ်မၤသံကွၢ်ဝဲဒၣ်(CDM)သရၣ်မုၣ်ဒီၣ်အ့သံအီၤဒီးအဝၤခံဂၤသ့ၣ်တဖၣ်အံၤအဂ့ၢ်န့ၣ်သ့ၣ်ညါဘၣ်န့ၣ်လီၤ.
ပှၤတူၢ်ကွီၢ်ဖိ/ပှၤဃိၥ်ဖိ(၄)ဂၤလၢအဃ့ၢ်ဖျိးထီၣ်သ့ၣ်တဖၣ်အံၤန့ၣ်အပူၤကွံၥ်မ့ၢ်ပှၤမၤကမၣ်တၢ်ဖိလၢဘၣ်တၢ်ဒုးဃၥ်အီၤဒီးအမဲၥ်ညါဃ့ၢ်ဖျိးထီၣ်လၢတၢ်ဒုးဃၥ်အပူၤဝံၤမၤသံစ့ၢ်ကီးကဒီးဝဲပှၤကညီအဃိတၢ်ကရဲၣ်ကျဲၤစံၣ်ညီၣ်ဝဲဒၣ်ဒ်လဲၣ်န့ၣ်ဘျံးဒဝဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးဝဲလၢ….
“အဝဲသ့ၣ်ဃ့ၢ်ဖျိးထီၣ်ဒီးမၤကမၣ်ကဒီးကွီၢ်မ့ၣ်န့ၣ်လီၤ.အဃိသုးမုၢ်ဒိၣ်စ့ၢ်ကီးအိၣ်ဒီးတၢ်ဘျၢလၢကဟံးဂ့ၢ်ဝီအသိးသုး မုၢ်ဒိၣ်မ့ၢ်တဟံးဂ့ၢ်ဝီန့ၣ်တၢ်က ဆှၢအဝဲသ့ၣ်ဆူပၢြပး(စံၣ်ညီၣ်ကွီၢ်)အစုပူၤသ့ဝဲန့ၣ်လီၤ.” အဂ့ၢ်စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ.
ပှၤသ့ၣ်တဖၣ်အံၤအမံၤမ့ၢ်ဝဲ(မီၤအီၤနဲၣ်အူ, မီၤဖၠိဝ့ၤအူ, မီၤၡီထဲၣ်, မီၤဝ့စိ) သ့ၣ်တဖၣ်န့ၣ်လီၤ.
ပှၤ(၄)ဂၤအံၤတချုးတၢ်ဖီၣ်ချုးန့ၢ်ဒံးဘၣ်အဆၢကတီၢ်ဖဲလါဒံၣ်စဲဘၢၣ်(၁၅)သီ,မုၢ်ဟါလီၤအဆၢကတီၢ်န့ၣ်ပှၤဃိၥ်ဖိအကျါတဂၤလၢအမ့ၢ်(မီၤဝ့စိ)အံၤလဲၤဃ့အီၣ်ဝဲဒၣ်မ့ၤဘၣ်ဖဲသရၣ်မုၣ်(ဒီၣ်အ့သံအီၤ)အဟံၣ်ဒီးမ့ၢ်လၢတၢ်တဒုးအီၤမ့ၤဘၣ်အဃိကျီသံဝဲဝံၤတကတီၢ်ဃီကျီသံဝဲအဝၤစ့ၢ်ကီးအဂ့ၢ်ဒ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါအဝဲသ့ၣ်ဟံးန့ၢ်ကွံၥ်ဝဲဒၣ်အထူအလွဲလၢအမ့ၢ်နၢ်ဒံး,ဖဲထူ,ဒီးထံဖှံၣ်သ့ၣ်တဖၣ်ဝံၤအလီၢ်ခံတၢ်သ့ၣ်ညါဘၣ်လၢအဝဲသ့ၣ်ကလဲၤထီၣ်ဆူကီၢ်ကၠီၣ်တဲၣ်အဆၢကတီၢ်ဖဲလါဒံၣ်စဲဘၢၣ်(၁၇)သီဒီး(၁၈)သီအနံၤန့ၣ်ဘၣ်တၢ်ဖီၣ်ချုးန့ၢ်အဝဲသ့ၣ်ဒ်အံၤလီၤအဂ့ၢ်ပၥ်ဖျါထီၣ်ဝဲန့ၣ်လီၤ.
ဒ်န့ၣ်အသိးပှၤဃိၥ်ဖိ(၄)ဂၤလၢတၢ်ဖီၣ်ချုးက့ၤအီၤသ့ၣ်တဖၣ်အံၤတကီၢ်ခါခဲအံၤတၢ်သမံသမိး,တၢ်သံကွၢ်သံဒိးအဝဲသ့ၣ်အဖၢမုၢ်ဒီးဒ်ခ့ၣ်အဲၣ်ယူၣ်တၢ်ဘျၢသဲးစးအိၣ်ဝဲအသိးန့ၣ်တၢ်ကဟံးန့ၢ်ဝဲဂ့ၢ်ဝီတုၤလီၤတီၤအဂ့ၢ်ဒ်ကီၢ်ရ့ၣ်လံၥ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ.
