လါယနူၤအါရံၤ ၁၂ သီ, ၂၀၂၆ နံၣ်, ခ့ၣ်အဲးစံၣ်
ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ်ပူၤ ပယီၤသုးထီၣ်န့ၢ်ဝဲ(KNLA)တၢ်သမံသမိးတြဲၤဝံၤ တၢ်ဒုးဆဲးကဲထီၣ် အဃိ သဝီ(၃)ဖျၢၣ်ကမျၢၢ်လၢအဃ့ၢ်ထီၣ်တဖၣ်လိၣ်ဝဲတၢ်ဆီၣ်ထွဲမၤစၢၤအဂ့ၢ်န့ၣ် လီၢ်ကဝီၤကမျၢၢ်ပှၤဘၣ်မူဘၣ်ဒါလၢအိၣ်ဘူး တၢ်ကဲထီၣ်သးအံၤ စံးဘၣ်ခ့ၣ်အဲးစံၣ်-ကညီတၢ်ကစီၣ် န့ၣ်လီၤ.
ဖဲလါယနူၤအါရံၤ ၁၀ သီ ဂီၤခီအဆၢကတီၢ် ပယီၤသုးကျိၤအနီၣ်ဂံၢ်ကအိၣ်(၁၀၀)ဘျဲၣ်လၢအနုၥ်လီၤလၢဒီးယၣ်ကရူၢ် ကၠဲးတူၢ်ကိ (တက်တူကုန်း)သဝီပူၤတဖၣ်အံၤဒီး ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၂ သုးဒ့-၂ အပှၤလၢ အိၣ်ခိးတြဲၤ ဖဲသဝီဃၢၤကျဲဖးဒ့အံၤတဖၣ်အဘၢၣ်စၢၤတၢ်ဒုးကဲထီၣ်န့ၣ်လီၤ.
ပယီၤသုးကျိၤနုၥ်လီၤဘျီဝဲအံၤလၢတၢ်ပၥ်သူၣ်ပၥ်သးဒီးနုၥ်လီၤဝဲအါအါဂီၢ်ဂီၢ်အဃိ သုးဒ့-၂ ဘၣ်ဟ့ၣ်လီၤကွံၥ်ဝဲတြဲၤ လၢအိၣ်ခိးသမံသမိးဝဲ(မီၤခိၤ)သိလ့ၣ်အံၤဝံၤတၢ်ရဲၣ်တၢ်ကျဲၤအိၣ်လၢကဆ့ၣ်နီၤအိၣ်ဆိးဝဲဖဲန့ၣ်အဃိ ခဲအံၤခူၣ်လီၤဝဲ တၢ်ဆဲးကျိးပူၤ လံအသိးတဂီၤအံၤပယီၤသုးဟဲထီၣ်အါထီၣ်ဝဲအဂ့ၢ်န့ၣ် စံးဝဲ န့ၣ်လီၤ.
“ခဲအံၤဖဲတၢ်ဒုးကဲထီၣ်အလီၢ်န့ၣ် ဖဲမဟါန့ၣ်အဝဲသ့ၣ်ထီၣ် န့ၢ်ဝဲကၠဲးတူၢ်ကိသဝီဃၢၤ(KNLA) သုးဒ့-၂ တြဲၤတဘ့ၣ်.ခဲအံၤပယီၤသုး ဟဲထီၣ်ဒီး(ဘဲးဖိ)သိလ့ၣ်ခူၣ်လီၤ(ဆက်သွယ်ရေး)ကျိၤကဆ့ၣ်နီၤအိၣ်ဖဲန့ၣ် ကမၤထီၣ်သုးကလၢၤလီၤ.”အဂ့ၢ်န့ၣ် စံးဘၣ် ကမျၢၢ်လၢအိၣ်ဘူးဖဲန့ၣ်တဂၤ ခ့ၣ်အဲးစံၣ်- ကညီတၢ်ကစီၣ်ဖဲတဂီၤအံၤန့ၣ်လီၤ.
တကီၢ်ခါခဲအံၤခီဖျိပယီၤသုးဆ့ၣ်နီၤအိၣ်က့ၤဝဲလၢကၠဲးတူၢ်ကိသဝီဃၢၤ(KNLA)တၢ်သမံသမိးတြဲၤဒီးသုးဂံၢ်ဘါဟဲထီၣ်အါထီၣ်အဃိ တြဲၤအံၤအမဲၥ်ညါ သုးဒ့-၂ တြဲၤလၢအိၣ်ကၠဲးကၠံၣ်ခးသဝီပူၤအံၤစ့ၢ်ကီးဘၣ်သုးလီၢ်သုးကျဲအဂ့ၢ်န့ၣ် သ့ၣ်ညါဘၣ်လၢ ကမျၢၢ်အအိၣ်န့ၣ်လီၤ.
ဒ်န့ၣ်အသိးဖဲမဟါတၢ်ဒုးကဲထီၣ်လၢခံခီခံကပၤအဘၢၣ်စၢၤအခါန့ၣ်စ့ၢ်ကီး ကမျၢၢ်(၃)ဂၤလၢပယီၤသုးခးသံဝဲလဲၤကၢလီၤဝဲလၢ သဝီဃၢၤကျဲကပၤသရိၥ်ပူၤအံၤတဖၣ်တုၤလၢတနံၤအံၤ ဂီၤခီန့ၣ် ခီဖျိပယီၤသုးအိၣ်အဃိတၢ်လဲၤထၢန့ၢ်ဝဲတဘူၣ်အိၣ်ဒံးဝဲဖဲန့ၣ် တုၤလၢခဲအံၤအဂ့ၢ်န့ၣ် ကမျၢၢ်ဝဲဒၣ်န့ၣ်လီၤ.
ကၠဲးတူၢ်ကိသဝီအပူၤ စးထီၣ်လၢလါယနူၤအါရံၤ ၁၀ သီ ပယီၤသုးကျိၤနုၥ်လီၤတုၤလၢတနံၤအံၤလါယနူၤအါရံၤ ၁၂ သီ ဂီၤခီတစု တၢ်ဒုးဆဲးကဲထီၣ်အဃိ ဒီးယၣ်ကရူၢ်ဒီးကဒံၣ်ပူၤကရူၢ်ပူၤသဝီဖိလၢအလဲၤဃ့ၢ်ထီၣ်အိၣ် လၢတၢ်ဘံၣ်တၢ်ဘၢ အလီၢ် အံၤတဖၣ် လိၣ်ဘၣ်ဝဲဂ့ၢ်ဂီၢ်အူဂံၢ်ခီၣ်ထံးတၢ်အီၣ်တၢ်အီဘၣ်ဆၣ်ကလဲၤဟ့ၣ်တၢ်ဆီၣ်ထွဲမၤစၢၤအဂီၢ်တၢ်ကီတၢ်ခဲအိၣ်ဝဲ အဂ့ၢ်န့ၣ် လီၢ်ကဝီၤ ကမျၢၢ်ပိၥ်မုၣ်လၢအဟူးဂဲၤမၤ တၢ်လၢပိၥ်မုၣ်ကရၢအံၤစံးဝဲန့ၣ်လီၤ.
“စးထီၣ်လၢတၢ်ဒုးကဲထီၣ်တုၤလၢတဂီၤအံၤန့ၣ်ကၠဲးတူၢ်ကိ,ခဲမီး,ကၠဲးကၠံၣ်ခးသဝီဖိတဖၣ်န့ၣ်လဲၤစံၣ်ထီၣ်အိၣ်ဝဲလၢပှၢ်ပူၤတနီၤ. မ့ဝံၤတနီၤန့ၣ်လဲၤအိၣ်ကဒုသးဖဲကၠဲးတူၢ်ကိ ဝ့တၣ်ပၣ်ဃိၣ်ဖိသီခါဖၠၣ်န့ၣ်တနီၤ. ပှၤသ့ၣ်တဖၣ်အံၤလိၣ်ဘၣ်တၢ်အီၣ်တၢ်အီသပှၢ် ကတၢၢ်လီၤ.ဘၣ်မနုၤအဃိလဲၣ်အဝဲသ့ၣ်စံၣ်ထီၣ်ကရီကဒးဘျီတၢ်အီၣ်တၢ်အီတပၣ်ဃုၥ်နီတမံၤဘၣ်.ဒီးပှၤသ့ၣ်တဖၣ်အံၤအါဒၣ် တက့ၢ်န့ၣ်ပိၥ်မုၣ်ပိၥ်မၢၤဒီးဖိဒံဖိသၣ်လီၤ.ပကဘၣ်မၤစၢၤအဝဲသ့ၣ်ဒ်လဲၣ်န့ၣ်ပလဲၤပက့ၤတဘူၣ်စ့ၢ်ဘၣ်.အိၣ်ဒၣ်ဘၣ်ကနၣ်စိဒ်န့ၣ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ခဲးမီး,ကၠဲးတူၢ်ကိ,ကၠဲးကၠံၣ်ခးသဝီသ့ၣ်တဖၣ်အံၤဒီးဘ့လ့ဝ့ၢ်အံၤ အဘၢၣ်စၢၤအိၣ်ဒၣ်ထဲဘံလ့ထံကျိတဘိလီၤအသိး သဝီ ၃ ဖျၢၣ်အံၤ ပၥ်ဖှိၣ်ဟံၣ်ခိၣ်ကအိၣ်ဝဲခဲလၢၥ် ၂၅၀ ခိၣ်ဃၢၤဒီး ပှၤနီၣ်ဂံၢ်ပၥ်ဖှိၣ်အိၣ်ဝဲ ၁၄၀၀ ဃၣ်ဃၣ်အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ် တၢ်မၤ နီၣ်ပူၤအသိးန့ၣ်လီၤ.
တၢ်ဒုးကဲထီၣ်ဘျီဝဲအံၤစ့ၢ်ကီးဒူသဝီ ၃ ဖျၢၣ်အံၤအမဲၥ်ညါဒီၣ်ယၣ်သဝီလၢဟံၣ်ခိၣ်အိၣ်(၂၇၀)ဃၣ်ဃၣ်လၢ အိၣ်ဘူးတၢ်ကဲထီၣ် သးအံၤ စ့ၢ်ကီး သဝီဖိတနီၤဃ့ၢ်ထီၣ်ဝဲအိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.