ကျိဖးဒိၣ်အဃိ ကၠဲးထိၣ်ကီၢ်ဆၣ်ပူၤကမျၢၢ်သံ(၃)ဂၤ,ဘၣ်ဒိ(၃)ဂၤဒီး ပယီၤသုးခးသံဃုၥ်ကမျၢၢ်(၁)ဂၤ

လါဖ့ၤဘြူၤအါရံၤ ၁၂ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် ခရၢၢ်ကရူၢ်ဒီးဝီၢ်က့ကရူၢ်လၢကျိဖးဒိၣ်အမဲၥ်ညါ ပယီၤသုးကျိၤနုၥ် လီၤဟူးဂဲၤဝဲတလီၢ်လီၢ်အံၤန့ၣ် ခီဖျိလၢကျိဖးဒိၣ်အံၤအဃိကမျၢၢ်သံဝဲ(၃)ဂၤ,ဘၣ်ဒိ(၃)ဂၤဒီး ပယီၤသုးအံၤခးသံဃုၥ် စ့ၢ်ကီးဝဲ ကမျၢၢ်တဂၤအဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်အအိၣ်န့ၣ်လီၤ.

ဖဲအပူၤကွံၥ်လါဖ့ၤဘြူၤအါရံၤ ၉ သီအနံၤ ပယီၤသုးကျိၤလၢအနီၣ်ဂံၢ်ကအိၣ်(၂၅၀)ဃၣ်ဃၣ်အံၤ နုၥ်လီၤဝဲလၢကရူၢ်(၂)ဘ့ၣ်အံၤ သဝီတဖၣ်အပူၤဒီး ဖဲ ဂီၤခီ ၁၀း၀၀ ဘျဲၣ်အခါန့ၣ်တၢ်ဒုးကဲထီၣ်ဝဲဒီးဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်အံၤလၢ (စစ်ကွင်း) သဝီဃၢၤ အံၤန့ၣ်လီၤ.

လၢတၢ်ဒုးကဲထီၣ်ဘျီဝဲအံၤအဃိပယီၤသုးအံၤပညိၣ်ခးလီၤကဒါဝဲကျိဖးဒိၣ်လီၤတဲၥ်ပိၢ်ဖးထီၣ်ဝဲလၢ(စစ်ကွင်း)သဝီဒီး မိၣ်ခမီၣ် သဝီပူၤအဃိ ဘၣ်သံဝဲ အူစီနီၤ(၆၀)နံၣ်,အမါဒီၤမၣ်အ့(၆၅)နံၣ် ဒီး အူအ့သ့(၆၅)နံၣ် သ့ၣ်တဖၣ်အံၤန့ၣ်လီၤ.

လၢန့ၣ်အမဲၥ်ညါပယီၤသုးခးလီၤကျိဖးဒိၣ်ဘျီဝဲအံၤ ဘၣ်ဒိစ့ၢ်ကီးဝဲကမျၢၢ်(၃)ဂၤအကျါပၣ်ဃုၥ်ဝဲဖိသၣ်ပိၥ်ခွါ(၁၅)နံၣ်တဂၤဒီး (၁၄)နံၣ် တဂၤ အဂ့ၢ်န့ၣ် လီၢ်ကဝီၤတၢ်မၤနီၣ်ပူၤအသိးသ့ၣ်ညါဘၣ်န့ၣ်လီၤ.

ဒ်န့ၣ်အသိးလၢပယီၤသုးနုၥ်လီၤဟူးဂဲၤဘျီဝဲအံၤစ့ၢ်ကီး အခဲၤသဝီဖိ ပိၥ်ခွါ(၅၀)နံၣ်တဂၤ ဖဲအဝဲကဟးစံၣ်ပလဲၥ်သးအဆၢကတီၢ် ပယီၤသုးခးသံကွံၥ်အီၤ စံးစ့ၢ်ကီးဝဲန့ၣ်လီၤ.

တကီၢ်ခါခဲအံၤပယီၤကျိၤနုၥ်လီၤဟူးဂဲၤတုၤလၢခဲအံၤတဟးထီၣ်ဒံးဘၣ်အဃိ ခရၢၢ်ကရူၢ်ပူၤသဝီ(၈)ဖျၢၣ် ဟံၣ်ခိၣ် (၁၀၄၇)ဖျၢၣ်, ပှၤနီၣ်ဂံၢ်(၄၈၁၂)ဂၤ ဒီး ဝီၢ်က့ကရူၢ်ပူၤသဝီ(၃)ဖျၢၣ် ဟံၣ်ခိၣ်(၄၆၄)ဖျၢၣ် ပှၤနီၣ်ဂံၢ်(၂၀၈၂)ဂၤ ပှၤနီၣ်ဂံၢ်ပၥ်ဖှိၣ်(၆၈၉၄)ဂၤ ဘၣ်ဃ့ၢ် ထီၣ်ဟးအိၣ်ဝဲလၢတၢ်ဘံၣ်တၢ်ဘၢအလီၢ်ဒီးပှၤသ့ၣ်တဖၣ်အံၤအဂီၢ်လိၣ်ဘၣ်စ့ၢ်ကီးဝဲအိၣ်ဆိးလီၢ်ကျဲ,တၢ်အီၣ်တၢ်အီ,ကသံၣ်ကသီ တၢ်ဆီၣ်ထွဲမၤစၢၤအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.

ကၠဲးထိၣ်ကီၢ်ဆၣ်ပူၤဒူသဝီအပူၤစးထီၣ်ဖဲလါဖ့ၤဘြူၤအါရံၤထီၣ်အံၤ သုးမီၤစိရိၤနုၥ်လီၤဟူးဂဲၤအါထီၣ်အါန့ၢ်အပူၤကွံၥ်ဒံးဒီး ခရၢၢ်ကရူၢ်,ဝီၢ်က့ကရူၢ်အမဲၥ်ညါဖဲအပူၤကွံၥ် ၇ သီအခါစ့ၢ်ကီး လၢအံလူၢ်ကရူၢ်ဒီးတကွံပူၤကရူၢ်ဒူသဝီအပူၤစ့ၢ်ကီး အခါခီဖျိပယီၤ သုးကျိၤနုလီၤတၢ်ဒုးကဲထီၣ်အဃိကမျၢၢ်(၆၀၀၀)ဘျဲၣ်ဘၣ်ဃ့ၢ်ထီၣ်ဒီးအဝဲသ့ၣ်အံၤလိၣ်ဘၣ်စ့ၢ်ကီးဝဲတၢ်ဆီၣ်ထွဲမၤစၢၤန့ၣ်လီၤ.

ဒ်န့ၣ်အသိး လၢချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဆီထံးကီၢ်ဆၣ်အပူၤစ့ၢ်ကီး ဖဲအပူၤကွံၥ်လါဖ့ၤဘြူၤအါရံၤ ၇ သီအနံၤန့ၣ် သုးမီၤစိရိၤ(Jet Fighter)ကဘီယူၤ ၂ ဘ့ၣ် လဲၤတ့ၢ်လီၤမ့ၣ်ပိၢ်(၄)ဖျၢၣ်လၢ ပၠံၤယ့ၤ(ပျဉ်ရေ)သဝီပူၤအဃိ ကမျၢၢ်သံ(၁)ဂၤဒီး ဘၣ်ဒိဘၣ်ထံးဝဲ(၃)ဂၤ ကဲထီၣ်ဒံးဝဲန့ၣ်လီၤ.