လါဖ့ၤဘြူၤအါရံၤ ၁၂ သီ, ၂၀၂၆ နံၣ်, ခ့ၣ်အဲးစံၣ်
လၢကဟဲထီၣ်မၤပှဲၤက့ၤဂံၢ်ဘါဖဲ ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)ကစၢၢ်ဒိၣ်ကီၢ်ဆၣ် သုးကလၢၤတၢ်လီၢ်အံၤအဂီၢ် ပယီၤသုးတဖၣ်ဖဲအဝဲသ့ၣ်ဟဲထီၣ်လၢကျဲလၢအခါဘၣ်တၢ်ခိးခးဝဲအဃိ သံဝဲ(၉)ဂၤအဂ့ၢ်န့ၣ် ကီၢ်ရ့ၣ်ထုးထီၣ်ပၥ်ဖျါဝဲဖဲမဟါအနံၤ န့ၣ်လီၤ.
ပယီၤသုးအံၤလၢသယဲၣ်ခၠီဝ့ၢ်အံၤတဆီ လၢကထီၣ်မၤပှဲၤက့ၤဂံၢ်ဘါဖဲဝ့ဝး(၀င်း၀)သုးကလၢၤအံၤအဂီၢ်န့ၣ် ဖဲလါဖ့ၤအါရံၤ ၁၀ သီ ဂီၤခီ ၁၀း၁၅ မံးနံးအဆၢကတီၢ် ပယီၤသုး(၄၀၃/ ၃၀၄/၄၀၅)သုးရ့ၣ်သ့ၣ်တဖၣ်အံၤပၥ်ဖှိၣ်ထီၣ်သးဟဲထီၣ်ဝဲလၢကျဲအခါ ဘၣ်တၢ်ခိးခးအဝဲသ့ၣ်လၢ(သုးက့ ၄) ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၁၂), (သုးက့ ၆) သုးရ့ၣ်(၂၇)ဒီး တၢ်ပၢၢ်ဆၢ သုးပၥ်ဖှိၣ်သ့ၣ်တဖၣ်န့ၣ်လီၤ.
လၢတၢ်ခိးခးပယီၤသုးဘျီဝဲအံၤအပူၤန့ၣ် ပယီၤသုးတကပၤသံ(၉)ဂၤအမဲၥ်ညါတၢ်မၤန့ၢ်ဝဲ (MA1) ၂ ခိၣ်, (MA3) ၅ ခိၣ်, ကျိဆၣ်ဒၢ(၁၂)ဘ့ၣ် ဃုၥ်ဒီးကျိချံပှၥ်သၣ်သုးတၢ်ပီးတၢ်လီလၢအဂၤတနီၤအဂ့ၢ်န့ၣ် လံၥ်တၢ်ပၥ်ဖျါအပူၤ ပၥ်ဖျါဝဲန့ၣ်လီၤ.
တကးဒံးဘၣ်တၢ်ဒုးကဲထီၣ်ဘျီဝဲအံၤအပူၤစ့ၢ်ကီး ပယီၤသုးဘၣ်ဒိဘၣ်ထံးအိၣ်ဝဲဘၣ်ဆၣ်တၢ်မၤတံၢ်အီၤတန့ၢ်ဒံးဘၣ် အဂ့ၢ်န့ၣ် ဘျံးဒဝဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးကစၢၢ်ဒိၣ်ကီၢ်ဆၣ်လၢပယီၤသုးဂုၥ်ကျဲးစၢးဟဲထီၣ်မၤပှဲၤအနီၣ်ဂံၢ်အံၤန့ၣ် ဖဲအပူၤကွံၥ်တလါအံၤလါဖ့ၤဘြူၤအါရံၤ ၄ သီ ဂီၤခီ ၉း၀၀ နၣ်ရံၣ်အဆၢကတီၢ်န့ၣ်စ့ၢ်ကီး သုးမီၤစိရိၤ(jet fighter)ကဘီယူၤလဲၤတ့ၢ်လီၤဝဲပီၣ်(၃၀၀)မ့ၣ်ပိၣ် ၂ ဖျၢၣ် လၢခ့ၤတၤ သဝီပူၤ အဃိ သီခါဘၣ်ဒိဘၣ်ထံးဝဲ(၁)ပါအသိးသီခါဖၠၣ်တၢ်သူၣ်ထီၣ်ဟးဂီၤလီၤပှီၢ်ဝဲဒိၣ်ဒိၣ်မုၢ်မုၢ်ကဲထီၣ်ဒံးဝဲဒၣ်န့ၣ်လီၤ.
သုးမီၤစိရိၤအံၤစးထီၣ်လၢအဝဲသ့ၣ်မၤဝဲတၢ်ဃုထၢအခါလံၤလံၤန့ၣ် လၢခ့ၣ်အဲၣ်ယူၣ်(သုးက့)ကိးဘ့ၣ်ဒဲးအပူၤဂုၥ်ကျဲးစၢး ဆှၢထီၣ်ဝဲ အသုးဂံၢ်ဘါဒီးတကတီၢ်ဃီတၢ်ဃုထၢဝံၤလၢကထီၣ်ဟံန့ၢ်က့ၤသုးကလၢၤလၢအဘၣ်ဟ့ၣ်ဆှူဝဲသ့ၣ်တဖၣ်အံၤအဂီၢ်စ့ၢ်ကီး အသုးဂံၢ် ဘါဟဲထီၣ်ဒံးဝဲလၢပျီပူၤအဖၢမုၢ်အသိး တၢ်ဒုးစ့ၢ်ကီးကဲထီၣ်ဝဲလၢခံခီခံကပၤအဘၢၣ်စၢၤတပယူၥ်ဃီတုၤလၢခဲအံၤန့ၣ်လီၤ.