လါမးရှး ၇ သီ, ၂၀၂၆ နံၣ်, ခ့ၣ်အဲးစံၣ်
ကရူၢ်အပှၤလၢအက့ၤမၤသကိးတၢ်ဒီးဘူးဒးကညီသုးမုၢ်ဒိၣ်(DKBA)အံၤအကျါပှၤလၢအတီခိၣ်ရိၣ်မဲတၢ်တဂၤန့ၣ် ဘၣ်တၢ်ထုး ထီၣ်တ့ၢ်ဃၥ်အီၤလၢ တၢ်ကရၢကရိပူၤလံ အဂ့ၢ်န့ၣ် ကညီတၢ်မုၥ်တၢ်ခုၣ်ကီၣ်ကးကရၢ(KNU/KNLA-PC) စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖဲမဟါလါမးရှး ၆ သီအနံၤန့ၣ်လၢ(social media)အပူၤတၢ်ကစီၣ်ရၤလီၤသးလၢ ကညီတၢ်မုၥ်တၢ်ခုၣ်ကီၣ်ကးကရၢ (KNU/KNLA-PC)အပှၤ ၃၉ ဂၤ က့ၤပၥ်ဖှိၣ်မၤသကိးတၢ်ဒီး ဘူးဒးကညီသုးမုၢ်ဒိၣ်(DKBA)ကရူၢ်လၢအဘၣ်တၢ်တီခိၣ်ရိၣ်မဲအီၤ လၢသုးခိၣ်ဘိၤဘံၣ်အံၤန့ၣ်လီၤ.
ဘၣ်ဃးကရူၢ်အပှၤက့ၤပၥ်ဖှိၣ်မၤသကိးတၢ်ဒီး(DKBA)အံၤအကျါလီၤဆီဒၣ်တၢ်ပှၤအခိၣ်လၢအတီခိၣ်ရိၣ်မဲတၢ်ပၣ်ဃုၥ်လၢ တၢ်က့ၤ ပၥ်ဖှိၣ်မၤသကိးတၢ်ဘျီဝဲအံၤအပူၤတဂၤန့ၣ် ဖဲအပူၤကွံၥ်စှၤလါအခါခီဖျိလၢအတၢ်ဆှၢထီၣ်ဆှၢလီၤ(ကၠါဖၠၣ်)အတၢ်ဖံးတၢ်မၤအဃိ ဘၣ်တၢ်ထုးထီၣ်တ့ၢ်ဃၥ်အီၤလၢတၢ်ကရၢကရိပူၤအဂ့ၢ်န့ၣ် (KNU/KNLA-PC) ပှၤကတိၤတၢ်ပၢ သုးခိၣ်ဒိၣ်စိ စီၤကၠီၤညိၣ် စံးဝဲ န့ၣ်လီၤ.
“တၢ်ကစီၣ်ဟးထီၣ်တခါအံၤမ့ၢ်ဝဲဒၣ်အနီၢ်ကီၢ်လီၤ.လၢတၢ်ဂီၤအပူၤပှၤ(၃၉)ဂၤအကျါအခိၣ်တဂၤန့ၣ်ပသ့ၣ်ညါလီၤ.အခိၣ်တဂၤအံၤ ဖဲအပူၤကွံၥ်လါယနူၤအါရံၤအခါန့ၣ်ဘၣ်တၢ်ဟံန့ၢ်အီၤဂ့ၢ်ဝီခီဖျိလၢအဟးစိၥ်ဆှၢဝဲတရူး(ကၠါဖၠၣ်)မၤဘၣ်ဒိဝဲတၢ်ကရၢကရိအသူးသ့ၣ်လၤကပီၤတကးဒံးဘၣ်ဘၣ်ဃးလၢ(ကၠါဖၠၣ်)တၢ်ဖံးတၢ်မၤန့ၣ်လ့ၤတက့ၤတၢ်တမၤဝဲဘၣ်န့ၣ်တၢ်နဲၣ်လီၤဃၥ်အိၣ်ထီဘိလီၤ.အဃိဖဲအပူၤကွံၥ်လါနိၣ်ဝ့ဘၢၣ်အခါန့ၣ်ဘၣ်တၢ်ဖီၣ်အီၤဝံၤပှၤဆှၢထီၣ်လၢလီၢ်ခၢၣ်သးဝံၤဘၣ်တၢ်ဟံန့ၢ်ဂ့ၢ်ဝီဘၣ်တၢ်စံၣ်ညီအီၤလၢဘၣ်အိၣ်ဃိၥ်ပူၤ(၃)နံၣ်.တကးဒံးဘၣ်တဘျီဃီပှၤထုးထီၣ်ကွံၥ်အီၤလၢတၢ်ကရၢကရိပူၤဘၣ်အိၣ်က့ၤဒ်ကမျၢၢ်တဂၤအသိးမီၤ”အဂ့ၢ်န့ၣ် စံး ဘၣ်ခ့ၣ်အဲးစံၣ်-ကညီတၢ်ကစီၣ်ဖဲမဟါဟါခီအခါန့ၣ်လီၤ.
သုးခိၣ်လၢအဘၣ်တၢ်ထုးထီၣ်တ့ၢ်ဃၥ်အီၤလၢတၢ်ကရၢကရိပူၤအံၤန့ၣ်မ့ၢ်ဝဲနီၣ်ဂံၢ်(၆)ဒုးယၤ သုးဂ့ၢ်ဝီခိၣ် သုးခိၣ်စိ စီၤမၠ့ၣ်စွ့ၤ သး နံၣ်အိၣ်ဒံးဒၣ်ထဲ(၃၀)ဘျဲၣ်ဒံးလီၤဒီး အဝဲန့ၣ် အိၣ်ဆိး ဝဲဒၣ်လၢနီၤလိၤ(နောင်လုံ)တကပၤအဂ့ၢ်န့ၣ် သ့ၣ်ညါဘၣ်လၢ (KNU/KNLA-PC)ပှၤဘၣ်မူဘၣ်ဒါအအိၣ်န့ၣ်လီၤ.
လၢတၢ်စိၥ်ဆှၢတရူး(ကၠါဖၠၣ်)တၢ်ဖံးတၢ်မၤအံၤအဃိ သုးခိၣ်စိ စီၤမၠ့ၣ်စွ့ၤ အံၤ ဖဲအပူၤကွံၥ်(၂၀၂၅)လါနိၣ်ဝ့ဘၢၣ် တၢ်စံၣ်ညီၣ် လၢဘၣ်အိၣ်ဃိၥ်ပူၤ(၃)နံၣ်ဘၣ်ဆၣ် ဖဲအပူၤကွံၥ်တနံၣ်အံၤ(၂၀၂၆)လါဖ့ၤဘြူၤအါရံၤ ၁၁ သီ ကညီဒီကလုၥ်မုၢ်နံၤ လၢအမ့ၢ်စ့ၢ်ကီး (KNU/KNLA-PC)နံၣ်ဆၢက့ၤမုၢ်နံၤအခါန့ၣ် တၢ်မၤစှၤလီၤန့ၢ်အတၢ်ကမၣ်(၁)နံၣ်တဝၥ်အဃိ ဖဲတၢ်ပျၢ်လီၤက့ၤပှၤဃိၥ်ဖိအဂၤ(၁၀) ဘျဲၣ် အကျါပၣ်ဃုၥ်ဝဲဒီးအဝဲန့ၣ်လီၤ.
ဘၣ်ဆၣ်မ့မ့ၢ်အဝဲခီန့ၣ် ခီဖျိအတၢ်ကမၣ်ဒိၣ်အဃိ တမ့ၢ်လၢတၢ်ပျၢ်ဖျဲးကွံၥ်အီၤလၢတၢ်ကမၣ်ပူၤတဘျီဃီဒ်န့ၣ်ဘၣ် မ့မ့ၢ်တခီကဘၣ် ဟဲက့ၤပၥ်ဖျါထီၣ်သးလၢလီၢ်ခၢၣ်သးအအိၣ်တလါတဘျီဒီး ဖဲန့ၣ်ဝံၤလီၢ်ခံ တၢ်ကစီၣ်အိၣ်ဖျါထီၣ်လၢအက့ၤပၥ်ဖှိၣ် မၤသကိးတၢ်ဒီး (DKBA)ကရူၢ်ဘၣ်ဟဲအိၣ်ဖျါထီၣ်ဝဲဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်သုးဖိသံၣ်ဖိလၢအက့ၤပိၥ်သုးခိၣ်စီၤမၠ့ၣ်စွ့ၤအခံခဲအံၤသ့ၣ်တဖၣ်မ့ၢ်မတဂၤအပှၤသ့ၣ်တဖၣ်လဲၣ်ဒီးအဝဲသ့ၣ်အံၤ နီၣ်ကစၢ်နီၣ်ဂံၢ်အိၣ်/တအိၣ်ဒီး မ့ၢ်သုးဖိစဲၤနီၣ်ဧါ/တစဲၤနီၢ်ဧါန့ၣ် တၢ်ဃုသ့ၣ်ညါမၤလီၤတံၢ်လီၤအဖၢမုၢ်လီၤ အဂ့ၢ်န့ၣ် (KNU/KNLA-PC)ပှၤဘၣ်မူဘၣ်ဒါစံးဝဲန့ၣ်လီၤ.
စးထီၣ်လၢတၢ်ကရၢကရိဒုးအိၣ်ထီၣ်(KNU/KNLA-PC)တၢ်လဲၤကျဲဒီတကတီၢ်အပူၤန့ၣ် ဘၣ်ဃးကရူၢ်အပှၤက့ၤပၥ်ဖှိၣ်မၤသကိး တၢ်ဒီး ဘူးဒးကညီသုးမုၢ်ဒိၣ်(DKBA) သုးခိၣ်ဘိၤဘံၣ်ကရူၢ်အံၤမ့ၢ်တၢ်အဆိကတၢၢ်တဘျီလီၤအသိး ပှၤလၢအတီခိၣ်ရိၣ် မဲက့ၤ ပၥ်ဖှိၣ်မၤသကိးတၢ်သ့ၣ်တဖၣ်အံၤစ့ၢ်ကီး မ့ၢ်ပှၤသ့ၣ်တဖၣ်လၢကွၢ်တၢ်လၢနီၢ်ကစၢ်အဂီၢ်လီၤအဂ့ၢ်န့ၣ် သုးခိၣ်ဒိၣ်စိ စီၤကၠီၤညိၣ် စံးစ့ၢ် ကီးဝဲန့ၣ်လီၤ.
ကညီတၢ်မုၥ်တၢ်ခုၣ်ကီၣ်ကးကရၢ(KNU/KNLA-PC)ဒီးဘူးဒးကညီသုးမုၣ်ဒိၣ်(DKBA)ကရူၢ်အံၤမ့ဟဲလီၤစၢၤလီၤသွဲၣ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဘၣ်ဆၣ် လီၤဆီဒၣ်တၢ်(PC)အံၤထုးဖးကွံၥ်အသးဒီးကရၢမိၢ်ပှၢ်ဖဲ(၂၀၀၇)နံၣ်အခါဒီး မ့မ့ၢ်(DKBA)ခီန့ၣ်ဖဲ(၁၉၉၄)နံၣ်အခါထုးဖးသးဝံၤအိၣ်ဆၢထၢၣ်က့ၤဝဲလီၤလီၤဆီဆီခံဒူၣ်လၢၥ်တုၤလၢခဲအံၤန့ၣ်လီၤ.
ဒ်န့ၣ်အသိးကရူၢ်ခံဒူၣ်အံၤလီၤဆီဒၣ်စးထီၣ်ဖဲ(၂၀၂၁)သုးဟံန့ၢ်တၢ်စိတၢ်ကမီၤဝံၤလီၢ်ခံန့ၣ်စ့ၢ်ကီး ဖဲလၢတၢ်ဒုးလီၤပှီၢ်သုးမီၤစိရိၤ အကတီၢ်အံၤ သုးခိၣ်ကီၢ်ဆၢ(BGF)အမဲၥ်ညါ ကရူၢ်ခံဒူၣ်အံၤစ့ၢ်ကီးတၢ်ကစီၣ်ဟးထီၣ်လၢအပၥ်ဖှိၣ်မၤသကိး တၢ်ဒီးသုးမီၤစိရိၤလၢ တၢ်ဒုးတၢ်ယၤတၢ်ဟူးတၢ်ဂဲၤပူၤအိၣ်ဝဲအဂ့ၢ်န့ၣ် တၢ်ပဲၥ်ထံနီၤဖးစံးဝဲအိၣ်န့ၣ်လီၤ.