လါအ့ဖြ့ၣ် ၁၂ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ ကဘီယူၤလဲၤတ့ၢ်လီၤကဒီးမ့ၣ်ပိၢ်အဃိ ကမျၢၢ်ဘၣ်ဒိဝဲ(၂)ဂၤဒီး တၢ်ဆါဟံၣ်တၢ်သူၣ်ထီၣ်ဟးဂီၤဝဲအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဖဲလါအ့ဖြ့ၣ် ၁၀ သီ ဟါခီ ၆း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် သုးမီၤစိရိၤကဘီယူၤလဲၤတ့ၢ်လီၤကဒီးမ့ၣ်ပိၢ်လၢဘုသိၣ်ကီၢ်ဆၣ် ခီပူၤကရူၢ် ဖီထၣ်သဝီပူၤန့ၣ်လီၤ.
ကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤ ကမျၢၢ်ဘၣ်ဒိဘၣ်ထံးတဲ(၂)ဂၤဒီးဟံၣ်တၢ်သူၣ်ထီၣ်ဟးဂီၤစ့ၢ်ကီးဝဲ(၂)ဖျၢၣ်အဂ့ၢ်န့ၣ် (သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ.
“ဖဲ ၁၀ သီမုၢ်ဟါလီၤ ၆ နၣ်ရံၣ်န့ၣ်ကဘီယူၤဟဲခးလီၤတၢ်ဖဲဘုသိၣ်ကီၢ်ဆၣ် ခီပူးကရူၢ် ဖီထၣ်သဝီ ဘၣ်ဒိၣ်ဝဲသဝီဖိ(၂)ဂၤ. မ့မ့ၢ်ဟံၣ်န့ၣ်ဟးဂီၤဝဲဒၣ် ၂ ဖျၢၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤန့ၣ်လီၤ.
ဒ်န့ၣ်အသိးကဘီယူၤလဲၤခးလီၤတၢ်ဖဲန့ၣ်ဝံၤမုၢ်ဆ့ၣ်ထီၣ်ဖဲမဟါလါအ့ဖြ့ၣ် ၁၁ သီ ဖးဖီမုၢ် ၁၁း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် ခီပူၤကရူၢ်လၢကဘီယူၤလဲၤတ့ၢ်လီၤမ့ၣ်ပိၢ်အံၤ ကဘီယူၤလဲၤတ့ၢ်လီၤကဒီးမ့ၣ်ပိၢ်လီၤတဲၥ်ပိၢ်ဖးထီၣ်ဝဲလၢဃိၣ်နံၤခိၣ် အူမံၤထၣ်သဝီ အဃိ ပှၤကညီတၢ်ဘၣ်ဒိဘၣ်ထံးတအိၣ်ဘၣ်ဆၣ် တၢ်ဆါဟံၣ်တၢ်သူၣ် ထီၣ်ဟးဂီၤဝဲ(၂)ဖျၢၣ် အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဝဲန့ၣ်လီၤ.
ဟီၣ်ကဝီၤတၢ်လီၢ်လၢကဘီယူၤလဲၤတ့ၢ်လီၤမ့ၣ်ပိၢ်အံၤတၢ်ဒုးတၢ်ယၤကဲထီၣ်တအိၣ်ဘၣ်တကးဒံးဘၣ် စးထီၣ်လၢသုးမီၤစိရိၤအခိၣ် မ့အီၣ်လဲၣ် ကဲထီၣ်ကီၢ်ခိၣ်တဘျီဃီန့ၣ်မၤဆူၣ်ထီၣ်ဝဲဒုးယၤတၢ်ဟူးတၢ်ဂဲၤအဂ့ၢ်န့ၣ် သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးစ့ၢ်ကီးဝဲ န့ၣ်လီၤ.
“ပယီၤသုးလၢအဒိးဃုထၢလီၤအကစၢ်သးကဲထီၣ်ဝဲဒၣ်ကီၢ်ခိၣ်အံၤစးထီၣ်လၢအကဲထီၣ်ကီၢ်ခိၣ်ဟံထီၣ်မူဒါတဘျီဃီန့ၣ်အမၤဆူၣ်ထီၣ်ဝဲ တၢ်ဒုးတၢ်ယၤတဘျီဃီလီၤ.ဟးခးတၢ်လၢတၢ်လီၢ်သကုၤဆးဒးလီၤ.ဟဲခးလီၤတၢ်အံၤတမ့ၢ်သုးအိၣ်သံၣ်အိၣ်အလီၢ်ဘၣ်. တၢ်ဒုးတၢ်ယၤစ့ၢ်ကီးကဲထီၣ်တအိၣ်ဘၣ်. တၢ်လီၢ်န့ၣ်မ့ၢ်ဒၣ်ပှၤကမျၢၢ်အိၣ်ဆိးလီၢ်ကျဲလီၤ”အဂ့ၢ်န့ၣ် စံးအါထီၣ်ဝဲန့ၣ်လီၤ.
သုးက့(၅)အမဲၥ်ညါတနံၤဃီဖဲလါအ့ဖြ့ၣ် ၁၀ သီ ဒီး ၁၁ သီအနံၤစ့ၢ်ကီး လၢဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ် ပယၢ်ရီကရူၢ် အပူၤ သုးမီၤစိရိၤ (Jet fighter)ဒီး(Y-12)ကဘီယူၤလဲၤတ့ၢ်လီၤဝဲမ့ၣ်ပိၢ်ဒီးကျိဒိၣ်တစှၤန့ၢ်အဖျၢၣ်(၁၀၀)လီၤ တဲၥ်ပိၢ်ဖးထီၣ်ဝဲလၢ တးပီကရူၢ်ဒီးပယၢ်ရီကရူၢ်ဒူသဝီပူၤန့ၣ်လီၤ.
ကဘီယူၤလဲၤတ့ၢ်လီၤမ့ၣ်ပိၢ်ဘျီဝဲအံၤ ကမျၢၢ်သးစၢ်ပိၥ်မုၣ်ဘၣ်ဒိဝဲ(၂)ဂၤ တကးဒံးဘၣ်သိကျး(၁)ဖျၢၣ်ဃုၥ်ဒီး ဟံၣ်တၢ်သူၣ်ထီၣ် ဟးဂီၤအူအီၣ်အါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.