လါအ့ဖြ့ၣ် ၁၂ သီ, ၂၀၂၆ နံၣ်, ခ့ၣ်အဲးစံၣ်
လ့က့ၣ်သုးကလၢၤလၢအိၣ်ဆီလီၤသးဖဲခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်ပူၤအံၤ ဖဲတဂီၤအံၤဟီၣ်ကဝီၤ (KNLA)သုးပၥ်ဖှိၣ်ထီၣ်မၤန့ၢ်ဝဲလံဒီး တၢ်ဒုးအပူၤပယီၤသုးဃ့ၢ်ထီၣ်ဒီးမၤန့ၢ်ဝဲကျိချံပှၥ်သၣ်အါမးအဂ့ၢ်န့ၣ် သုးက့ပှၤဘၣ်မူဘၣ်ဒါ ပၥ်ဂၢၢ်ပၥ်ကျၢၤစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လ့က့ၣ်သုးကလၢၤအံၤစးထီၣ်ဖဲအပူၤကွံၥ်စှၤသီအခါ(သုးက့ ၁)အပှၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) ,ကညီဒီကလုၥ်ဂၢၤသးကရၢ(KNDO)သုးပၥ်ဖှိၣ်လဲၤကဝီၤခးဝဲဒီး ဖဲတနံၤအံၤလါအ့ဖြ့ၣ် ၁၂ သီ ဂီၤခီ ၉း၀၀ နၣ်ရံၣ်ဃၣ်ဃၣ် အဆၢကတီၢ်န့ၣ် ဘၣ်တၢ်မၤန့ၢ်ဝဲသုးကလၢၤအံၤခဲလၢၥ်လံ န့ၣ်လီၤ.
လၢသုးကလၢၤတၢ်ဒုးဘျီဝဲအံၤအပူၤတၢ်မၤန့ၢ်ဝဲကျိချံပှၥ်သၣ်အါမးအသိး တၢ်ဖီၣ်သမူန့ၢ်ဝဲပယီၤသုးအိၣ်အဂ့ၢ်န့ၣ် (သုးက့ ၁ ) သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးဝဲန့ၣ်လီၤ.
“လ့က့ၣ်သုးလၢၤဒုပမၤန့ၢ်လံခဲလၢၥ်လံ.ပထီၣ်မၤန့ၢ်ဖဲဂီၤခီ ၈း၀၀ ဒီး ၉း၀၀ နၣ်ရံၣ်ဘၢၣ်စၢၤန့ၣ်လီၤ.ပမၤန့ၢ်တၢ်ဖိတၢ်လံၤ ကျိချံပှၥ် သၣ်အိၣ်ဒီဒူၣ်ညါ. ခဲအံၤပှၤမၤဆှဲတၢ်ဘၣ်အဖၢလီၤ. ပပှၤဖီၣ်သမူန့ၢ်ဝဲန့ၣ်အိၣ်တဂၤခံဂၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ် ကစီၣ်န့ၣ်လီၤ.
တကးဒံးဘၣ်လၢတၢ်ဒုးအတီၢ်ပူၤပယီၤသုးဃ့ၢ်ထီၣ်အါမးဘၣ်ဆၣ်ဃ့ၢ်ထီၣ်အနီၣ်ဂံၢ်နီၣ်ဒွးခီန့ၣ် တၢ်မၤလီၤတံၢ်စရီ တန့ၢ်ဒံးဝဲ ဘၣ်သနါက့လၢဘၣ်ဒိဘၣ်ထံးတဖၣ်အကျါ ပၣ်ဃုၥ်ဝဲသုးရ့ၣ်ခိၣ်-၂ အဂ့ၢ်န့ၣ် (KNLA)ပှၤဘၣ်မူဘၣ်ဒါ စံးဝဲဒၣ်န့ၣ်လီၤ.
တချုးလ့က့ၣ်သုးကလၢၤအံၤလီၤဒံးဘၣ်စးထီၣ်လၢလါအ့ဖြ့ၣ် ၁ သီတုၤမဟါ ၁၁ သီပယီၤသုးကဘီယူၤဟဲခးလီၤတၢ်တပယူၥ် ဃီအဃိ လီၢ်ကဝီၤကမျၢၢ်တစှၤန့ၢ်(၈)ဂၤဘၣ်ဒိဘၣ်ထံးဝဲအသိးဟံၣ်တၢ်သူၣ်ထီၣ်,သီခါဖၠၣ်တၢ်သူၣ်ထီၣ်,သိကျးဟးဂီၤအမဲၥ်ညါ ပယၢ်ရီကရူၢ်, ဃီဖိပျဲၢ်ကရူၢ်,တးပီကရူၢ် ကရူၢ်(၃)ဘ့ၣ် ပှၤနီၣ်ဂံၢ်( ၁၀၀၀)ဘျဲၣ် ဘၣ်ဃ့ၢ်ထီၣ်ဝဲဒၣ်န့ၣ်လီၤ.
လ့က့ၣ်သုးကလၢၤလၢတၢ်ထီၣ်မၤန့ၢ်ဝဲခဲအံၤန့ၣ် မ့ၢ်ဝဲသုးတြိၤ(၄၄)စုတီၤဖီလၥ် ခီၣ်ချ့သုးရ့ၣ်(ခမရ-၂)ဒီး တချုးသုးကလၢၤ အံၤလီၤဒံးဘၣ်အခါ ဖဲမဟါလါအ့ဖြ့ၣ် ၁၁ သီအနံၤန့ၣ် လၢကဟဲထီၣ်(စစ်ကူ)အဂီၢ် ပယီၤသုးလၢအိၣ်ပနွဲၢ်ကျါသုးကလၢၤအံၤတဖၣ် ဖဲဟဲထီၣ်လၢကျဲအခါခီဖျိ(သုးက့ ၁)အပှၤခိးလီၤဝဲအဃိဆဲးဟဲထီၣ်ဝဲတန့ၢ်ဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဟီၣ်ကဝီၤဖဲန့ၣ်အပူၤလ့က့ၣ်သုးကလၢၤဒီးတးပီသုးကလၢၤခံဖျၢၣ်လၢအိၣ်ဘူးလိၥ်အသးအံၤတၢ်ထီၣ်ခးဝဲတၢ်ဆၢကတီၢ် တဘျီဃီဒီး ခဲအံၤလ့က့ၣ်သုးကလၢၤလီၤလံဘၣ်ဆၣ်တးပီသုးကလၢၤလၢသုးနီၣ်ဂံၢ်ကအိၣ်(၆၀)ခိၣ်ဃၢၤအံၤ တၢ်ဆဲးထီၣ်ဝဲအဖၢ မုၢ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါစံးဝဲန့ၣ်လီၤ.
