လါမ့ၤ ၂၁ သီ, ၂၀၂၆ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဒွဲၣ်လိကီၢ်ဆၣ် ကမၤမိၢ်-ကတၢတံၥ်ကျဲ ဒူသဝီအပူၤ တၢ်ဒုးဆဲးဆူၣ်ထီၣ်ဝဲလၢ ပယီၤသုး ကျိၤလၢဟဲထီၣ်တဖၣ်ဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဘၢၣ်စၢၤဒီး ပယီၤသုးအံၤခးလီၤဝဲ ကျိဖးဒိၣ် ဆူသဝီပူၤအမဲၥ်ညါဒွဲၣ်အူအီၣ်ကွံၥ်ဝဲဝၣ်သိထၣ်သဝီဒီတဖျၢၣ်အဂ့ၢ်န့ၣ် သုးက့ပှၤဘၣ်မူဘၣ်ဒါစံးဝဲန့ၣ်လီၤ.
ဖဲမဟါလါမ့ၤ ၂၀ သီ မုၢ်နၤခီ ၁၀း၀၀ နၣ်ရံၣ်ဃၣ်ဃၣ်အဆၢကတီၢ် ပယီၤသုးကျိၤလၢအဟဲထီၣ်တဖၣ်အံၤပညိၣ်ခးလီၤဝဲကျိဖးဒိၣ် အါအါ ဂီၢ်ဂီၢ်ဆူ မဲကလါသဝီပူၤအဃိ သဝီဖိပိၥ်ခွါတဂၤကျိဖးဒိၣ်အက့အခီဘၣ်ဝဲအခိၣ်ဒီး ဟံၣ်ဟးဂီၤဝဲအါမးန့ၣ်လီၤ.
ဒ်န့ၣ်အသိးဖဲတနံၤအံၤလါမ့ၤ ၂၁ သီ ဂီၤခီ ၉း၀၀ နၣ်ရံၣ်ဃၣ်ဃၣ်အအဆၢကတီၢ်စ့ၢ်ကီး လၢမီလိၥ်ကျိသဝီအပူၤ တၢ်ဒုးကဲထီၣ် ဝဲလၢပယီၤသုးဒီး(KNLA)သုးပၥ်ဖှိၣ်အဘၢၣ်စၢၤအဃိ ပယီၤသုးသံဘၣ်ဒိဘၣ်ထံးအါမးအကျါပၣ်ဃုၥ်ဝဲသုးဒ့ခိၣ်(၁)ဂၤဒီး လၢန့ၣ် အမဲၥ်ညါသုးခိးကီၢ်ဆၢ(BGF)လၢအပၥ်ဖှိၣ်မၤသကိးတၢ်ဒီးပယီၤသုးအံၤအပှၤဘၣ်ဒိတစှၤန့ၢ်(၄)ဂၤအဂ့ၢ်န့ၣ် လီၢ်ကဝီၤပှၤဘၣ်မူ ဘၣ်ဒါစံးဝဲန့ၣ်လီၤ.
တၢ်ဒုးကဲထီၣ်ဖဲတနံၤအံၤအခါခီဖျိပယီၤသုးတၢ်သံတၢ်ဘၣ်ဒိဘၣ်ထံးအါအဃိဖဲမုၢ်ဃ့ၢ်လီၤ ၁း၀၀ နၣ်ရံၣ်အဆၢကတီၢ်န့ၣ် ပယီၤသုးပၥ်ဖှိၣ်တဖၣ်အံၤနုၥ်လီၤဒွဲၣ်အူအီၣ်ကွံၥ်ဝဲမီလိၥ်ကျိသဝီမုၢ်ထီၣ် ဝၣ်သိထၣ်သဝီလၢဟံၣ်ခိၣ်ကအိၣ်ဝဲအဖျၢၣ်(၇၀)ဃၣ် ဃၣ်အံၤဒီတဖျၢၣ်န့ၣ်လီၤ.
ဘၣ်ဃးပယီၤသုးခးလီၤကျိဖးဒိၣ်,တၢ်ဒုးကဲထီၣ်ဒီးပယီၤသုးဒွဲၣ်အူအီၣ်ဝဲဝၣ်သိထၣ်သဝီဟံၣ်ဒီတဖျၢၣ်တဂ့ၢ်အံၤန့ၣ် (သုးက့ ၅) ပှၤကတိၤတၢ်ပၢ ပဒိၣ်စီၤရီဘ့ၤမူ စံးဝဲလၢ“ဖဲမနၤအနၣ်ရံၣ်(၁၀)န့ၣ်ပယီၤသုးကျိၤခးလီၤဝဲကျိဖးဒိၣ်လၢမဲကလါသဝီပူၤဒီဒူၣ်လီၤ. ဖဲန့ၣ်ကမျၢၢ်ဒုအဟံၣ်အဃီဟးဂီၤဒီဒူၣ်လီၤ.ဘျီန့ၣ်ဘၣ်ဒိဃုၥ်ဒီးကမျၢၢ်တဂၤ.မၤကဒီးဖဲတဂီၤအံၤ(၉)နၣ်ရံၣ်န့ၣ်တၢ်ဒုးကဲထီၣ်လၢမီလိၥ်ကျိသဝီကျဲမုၢ်လါခိၣ်မုၢ်နုၥ်မုၢ်ထီၣ်ခံကပၤလၢၤလီၤ.ဖဲန့ၣ်ဒုၣ်ဒါတၢ်ဘၣ်ဒိဘၣ်ထံးအိၣ်အါမး.ပသ့ၣ်ညါဘၣ်လၢပှၤသံအကျါန့ၣ် ပၣ်ဃုၥ်ဝဲသုးဒ့ခိၣ်တဂၤ.မ့မ့ၢ်လၢ(BGF) ၁၀၁၄ သုးရ့ၣ်အပှၤ န့ၣ်ဘၣ်ဒိ(၄)ဂၤ.လၢတၢ်န့ၣ်အဃိခဲအံၤပယီၤသုးဒွဲၣ်အူအီၣ်ကွံၥ်ဝဲ ဝၣ်သိထၣ်သဝီပူၤဟံၣ်ဒီတဖျၢၣ်ညါလီၤ. ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဟါအံၤန့ၣ်လီၤ.
တကီၢ်ခါခဲအံၤပယီၤသုးကျိၤသုးပၥ်ဖှိၣ်လၢဟဲထီၣ်ကလဲၤထီၣ်ဆူကတၢတံၥ်,ဖၣ်ပူၣ်သုးကလၢၤအံၤတဖၣ် ထီၣ်ဝဲဆူညါတန့ၢ်ဒံး ဘၣ် မ့မ့ၢ်တခီ အိၣ်ဆီလီၤသးဟူးဂဲၤဒံးဝဲဖဲမီလိၥ်ကျိမုၢ်ထီၣ်တဒူၣ်ဒီးဝၣ်သိထၣ်သဝီပူၤတဒူၣ်ဒီး ဒုးယၤတၢ်ဖ့ၣ်စၢစ့ၢ်ကီးဆဲးကဲထီၣ်ဝဲ အဖၢမုၢ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
(BGF)အသုးအံၤညီနုၢ်တဘျီလၢ်လၢ်လၢပယီၤသုးဟဲထီၣ်(စစ်ကူ)အံၤအခါန့ၣ်ပၣ်ဃုၥ်ဝဲထီဘိလီၤဒီးအဝဲသ့ၣ်အံၤမ့မ့ၢ်ဝဲကညီဖီၣ်စုကဝဲၤကရူၢ်တဒူၣ်ဘၣ်ဆၣ်တမ့ၢ်စုကဝဲၤလီၤဖှံၣ်လၢၤဘၣ် မ့မ့ၢ်တခီကဲထီၣ်ဝဲပယီၤအသုးမုၢ်ဒိၣ် တဖုလၢက့ၤမၤဘၣ်ဒိဘၣ်ထံးဝဲ အကစၢ်ကလုၥ်အဂ့ၢ်န့ၣ် (သုးက့ ၅)ပှၤကတိၤတၢ်ပၢ ပဒိၣ်စီၤရီဘ့ၤမူ စံးအါထီၣ်ဝဲန့ၣ်လီၤ.
“BGF န့ၣ်တမ့ၢ်လၢၤမုၢ်ဆ့ၣ်မုၢ်ဂီၤကညီဖီၣ်စုကဝဲၤကရူၢ်အသုးဘၣ်.အဝဲသ့ၣ်န့ၣ်မၤဝဲဒုၣ်ဒါမၢအီၤအသိးလီၤ.အဝဲသ့ၣ်န့ၣ်အိၣ်မူ တမ့ၢ်ဒ်သိးစုကဝဲၤလီၤဖှံၣ်တဖုအသိးလၢၤဘၣ် အိၣ်ဝဲဒၣ်လၢပယီၤသုးတၢ်ပၢဆှၢဖီလၥ်အဃိဘၣ်မၤထွဲဝဲတၢ်ကလုၢ်န့ၣ်. ပမ့ဘၣ်တဲ(BGF)အါဒၣ်တက့ၢ်မ့ၢ်ဝဲပှၤကညီဖိအဃိပအဲၣ်ဒိးလၢကမၤပှၤကညီအတၢ်မၤ,ကဟုကယၥ်က့ၤပှၤကညီဖိအဒူသဝီမီၤ. ခဲအံၤအဝဲသ့ၣ်ပၥ်ဖှိၣ်မၤသကိးတၢ်အဃိတၢ်လၢပတဆၢမုၢ်လၢ်တဖၣ်ပိၥ်ထွဲထီၣ်အခံဒီဒူၣ်လီၤ.အဝဲသ့ၣ်ဘၣ်သံ,ဘၣ်ဒိဘၣ်ထံးလၢ ဒုၣ်ဒါအကျါမ့ဝံၤပိၥ်ထွဲထီၣ်အခံလၢကမျၢၢ်န့ၣ်အဒူသဝီဟးဂီၤ,ဘၣ်ဒိဘၣ်ထံး,ဘၣ်စံၣ်ဘၣ်ဃ့ၢ်လီၤ.အဃိလၢအတၢ်ပၥ်ဖှိၣ်မၤသကိးတၢ်အံၤပအဲၣ်ဒိးလၢြကၢးဆိမိၣ်ထံက့ၤဝဲမီၤ”အဂ့ၢ်န့ၣ် စံးဝဲန့ၣ်လီၤ.
ပယီၤသုးကျိၤတဒူၣ်ဃီလၢအလဲၤထီၣ်ဖဲန့ၣ်တဖၣ်တချုးတၢ်ကဲထီၣ်သးအံၤဘၣ်ဖဲအပူၤကွံၥ်လါမ့ၤ ၁၉ သီအနံၤစ့ၢ်ကီး ခီဖျိလၢအဝဲသ့ၣ်ဒြိအံၤအဃိ မီထၣ်သဝီပူၤ သီခါသံ(၁)ပါဒီး တပွဲ(၁)ပါဃုၥ်ဒီးအတကၢ်ကမျၢၢ်(၁)ဂၤဘၣ်ဒိဘၣ်ထံးကဲထီၣ် ဒံးဝဲန့ၣ်လီၤ.
တကီၢ်ခါခဲအံၤလၢကလဲၤထီၣ်ဆူကတၢတံၥ်ဒီးဖၣ်ပူၣ်အံၤကန့ၢ်အဂီၢ် လၢကမၤမိၢ်ဝ့ၢ်အံၤတဆီပယီၤသုးကျိၤဂုၥ်ကျဲးစၢးသဖှိ လဲၤထီၣ်ဝဲ တၢ်ဆၢကတီၢ်န့ၢ်ဝဲ(၂)နွံဃၣ်ဃၣ်လံဘၣ်ဆၣ်တုၤလၢခဲအံၤထီၣ်ဝဲတဖျိအိၣ်ဒံးဝဲဖဲကမၤမိၢ်-ကတၢတံၥ်ကျဲ ဘၢၣ်စၢၤ မီလိၥ်ကျိဒီးဝၣ်သိထၣ်တုၤလၢခဲအံၤန့ၣ်လီၤ.