လါမ့ၤ ၂၁ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်အူးဖၣ်(Umphang)ပဒိၣ်တၢ်ဆါဟံၣ် ပှၤနဲၣ်တၢ်ကသံၣ်သရၣ် ဒီကထၢၣ်(Dr.Worawit Tontiwattanasap)လၢ အကူစါယါဘျါကလီဝဲကညီဖိဃုၥ်ဒီးကမျၢၢ်ပှၤလီၢ်အိၣ်ကဒုပှၤဆူးပှၤဆါလၢအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢ တးကီၢ်ရ့ၣ် ထံဆၢကီၢ်ဆၢအံၤန့ၣ် ဟီၣ်ခိၣ်ဒီဘ့ၣ်ဆူၣ်ချ့ကရၢ(WHO)ပၥ်ပနီၣ်ဟ့ၣ်လီၤဝဲ(ဖျိးစိလၢတၢ်ဟ့ၣ်ကမျၢၢ်ဆူၣ်ချ့)ခိၣ်ဖးလၤ ကပီၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဖဲမဟါလါမ့ၤ ၂၀ သီ လၢစွ့ၤစလၤထံကီၢ် ကၠၢၤနံၤဘၤဝ့ၢ်ပူၤ တၢ်မၤဝဲ(79th World Health Assembly)ဝီတဝီ ဟီၣ်ခိၣ်ဒီဘ့ၣ် ဆူၣ်ချ့တၢ်အိၣ်ဖှိၣ်ဖးဒိၣ်အံၤဒီး လၢတၢ်အိၣ်ဖှိၣ်ဘျီဝဲအံၤအပူၤန့ၣ် တၢ်ဟ့ၣ်ဝဲ(Dr.Worawit Tontiwattanasap)အံၤလၢ 2026 United Arab Emirates Health Foundation Prize ခိၣ်ဖးလၤကပီၤတၢ်ပနီၣ်အံၤဒီး လၢခိၣ်ဖးလၤကပီၤအံၤပၣ်ဃုၥ်ဝဲ အမဲရံၣ်ကၤစ့ဒီၣ်လၣ်(၄၀,၀၀၀)အဂ့ၢ်န့ၣ် ကၠီၣ်တဲၣ်တၢ်ကစီၣ်ထုးထီၣ်ပၥ်ဖျါဝဲန့ၣ်လီၤ.
ကညီဖိဒီးထံဆၢကီၢ်ဆၢဘၣ်ကီဘၣ်ခဲဒဲကဝီၤပူၤကမျၢၢ်,ဒူသဝီလၢအိၣ်ယံၤဝဲတၢ်ဆါဟံၣ်ဃုၥ်ဒီးပှၤလၢအတအိၣ်ဒီး လံၥ်လဲၢ်လၢ အဖိးသဲစးအံၤသ့ၣ်တဖၣ်လၢအိၣ်ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ကညီကီၢ်စဲၣ်ပူၤဒီး(အူးဖၣ်)ကီၢ်ဆၣ်ဟီၣ်ကဝီၤ အပူၤတဖၣ် ကန့ၢ်ဒိးကူစါယါဘျါသးအဂီၢ် (Dr.Worawit Tontiwattanasap)အံၤတပဲၥ်ဖးနီၤဖးတၢ်အဒူၣ်အစၢဟူးဂဲၤမၤစၢၤ ကူစါယါဘျါဝဲ အဂ့ၢ်န့ၣ် ဟီၣ်ခိၣ်ဒီဘ့ၣ်ဆူၣ်ချ့ကရၢ(WHO)စံးဝဲန့ၣ်လီၤ.
တကးဒံးဘၣ်လၢအတၢ်ဟ့ၣ်လီၤသးအံၤအဃိ ထံဆၢကီၢ်ဆၢကမျၢၢ်လၢအတအိၣ်ဒီးအလံၥ်လဲၢ်လၢအဖိးသဲးစးအံၤဘၣ်တဖၣ် ကီၢ်ကၠီၣ်တဲၣ်ပဒိၣ် ဟ့ၣ်ဝဲဆူၣ်ချ့တၢ်ဆီၣ်ထွဲမၤစၢၤအမဲၥ်ညါ ခဲအံၤလၢကီၢ်ဆၢခံကပၤလၢၥ်လၢလီၢ်ကဝီၤကမျၢၢ်အဂီၢ် တၢ်မၤအါ ထီၣ်ဝဲတၢ်ကူစါယါဘျါကရူၢ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ကူစါယါဘျါကရူၢ်သ့ၣ်တဖၣ်အံၤ လၢကီၢ်ဆၢဒီတကျိၤ ဒ်သိးတၢ်ညၣ်ဂိၢ်တၢ်ဆါ,ထံၤဘံၤ,(တိးကွ့) တၢ်ဆါသ့ၣ်တဖၣ်အံၤ သုတရၤလီၤသးတဂ့ၤဒီးကဒီသဒၢဝဲအဂီၢ် ကရူၢ်အံၤဆဲးန့ၢ်ဝဲကသံၣ်ဒီသဒၢတကးဒံးဘၣ် ကွၢ်ဃုၥ်ဝဲ မိၢ်ဒီးဖိဆံးဆူၣ်ချ့တၢ်အံးထွဲကွၢ် ထွဲ,သ့ဃၢၤဝဲပှၤကလ့ၢ်တၢ်ကူစါယါဘျါတၢ်ဖံးတၢ်မၤသ့ၣ်တဖၣ်အံၤ ဟူးဂဲၤဖံးမၤဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
အူးဖၣ်(Umphang)ကၠီၣ်တဲၣ်ပဒိၣ်တၢ်ဆါဟံၣ်အံၤ အိၣ်ဘူးစ့ၢ်ကီးဝဲဒီးနိၣ်ဖိဘၣ်ကီဘၣ်ခဲဒဲကဝီၤအသိးအိၣ်ဘူးစ့ၢ်ကီးဝဲထံဆၢကီၢ် ဆၢဟီၣ်ကဝီၤလၢတၢ်ဒုးကဲထီၣ်လီၢ်အဃိ လီၤဆီဒၣ်တၢ်ထံဖိကီၢ်ဖိကမျၢၢ်လၢအသဂၢၢ်ဘၣ်ဝဲဂ့ၢ်ဂီၢ်အူတၢ်ဘၣ်ဒိဘၣ်ထံးခီဖျိသုးမီၤစိ ရိၤအတၢ်ဟူးတၢ်ဂဲၤအဃိအံၤတဖၣ်အါဒၣ်တက့ၢ်ပၥ်ဂံၢ်ပၥ်ဘါဝဲတၢ်ဆါဟံၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
