လါမ့ၤ ၁၃ သီ, ၂၀၂၆ နံၣ်, ခ့ၣ်အဲးစံၣ်
ပယီၤသုးအံၤလၢကလဲၤထီၣ်ဆူကတၢတံၥ်ဒီးဖၣ်ပူၣ်သုးကလၢၤအံၤအဂီၢ်ခီဖျိဘၣ်တၢ်ခိးခးလီၤအဝဲသ့ၣ်လၢ(သုးက့ ၅)အပှၤ ဒီး ထီၣ်ဝဲတဖျိဘၣ်အဃိ လၢတၢ်မၤဆှဲကျဲအဂီၢ်သူဝဲဒၣ်ဒြိ,ကျိဖးဒိၣ်ခးလီၤဆှဲကျဲကိးမုၢ်နံၤဒဲးအဂ့ၢ်န့ၣ် ဟီၣ်ကဝီၤ(KNLA)ခိၣ်နၢ်ဒိၣ်ထီ စံးဝဲအသိး သ့ၣ်ညါဘၣ်န့ၣ်လီၤ.
လၢကလဲၤထီၣ်မၤအါထီၣ်သုးဂံၢ်ဘါလၢကတၢတံၥ်ဒီးဖၣ်ပူၣ်သုးလၢၤလၢ(KNLA)သုးပၥ်ဖှိၣ်ကဝီၤခးဝဲန့ၢ်လၢ(၂)နံၣ်ဃၣ်ဃၣ်အံၤန့ၣ်အဂီၢ်န့ၣ် ဖဲအပူၤကွံၥ်လါမ့ၤ ၅ သီ ဒီး ၆ သီအနံၤန့ၣ် လၢမၠဲၣ်ကၠံငူၣ်(ခီၣ်တီၣ်)ဝ့ၢ်အံၤတဆီ ပယီၤသုးအဂၤ(၂၀၀၀)ဃၣ် ဃၣ် ခီဃီၤဝဲဒၣ်ဆူကမၤမိၢ်ဝ့ၢ်တကပၤန့ၣ်လီၤ.
တကီၢ်ခါခဲအံၤပယီၤသုးတဖၣ်အိၣ်ဆီလီၤသးဟူးဂဲၤဝဲဒၣ် ဖဲသုးခိးကီၢ်ဆၢ(BGF)တၢ်ပၢဟီၣ်ကဝီၤလၢအမ့ၢ် ဝါဒူ,သါအီၣ်ပျ့ၣ်, မဲၤကၠံခံဒီးလၢၢ်ကွဲဖိသဝီတၢ်လီၢ်အခိၣ်အဃၢၤဒီး လၢကထီၣ်တိဖျိတၢ်အဂီၢ်နီၤဖးလီၤဝဲအပှၤ(၃)ဒူၣ်အဂ့ၢ်န့ၣ် (KNLA)ပှၤဘၣ်မူ ဘၣ်ဒါ စံးဝဲန့ၣ်လီၤ.
ဘၣ်ဆၣ်ပှၤ(၃)ဒူၣ်အံၤတဘျီလၢ်လၢ်ဖဲလၢကလဲၤထီၣ်အခါ ခီဖျိ(KNLA)သုးပၥ်ဖှိၣ်ကရူၢ်ခိးခးလီၤဝဲလၢတၢ်ဒ့ၣ်စၢၤတၢ်ဒုးကဲထီၣ် ဝဲကိးမုၢ်နံၤဒဲးအဃိ ဒ်သိးလဲၤထီၣ်တိဝဲကဖျိအဂီၢ်ခးလီၤစၢၤဝဲဒြိ,(၆၀ မမ),(၈၁ မမ),(၁၂၀ မမ),(၁၂၂ မမ)ကျိးဖးဒိၣ်တပယူၥ်ဃီ အဂ့ၢ်န့ၣ် (သုးက့ ၅)သုးက့ခိၣ် သုးခိၣ်ကျၢၢ်ဖိ စီၤဂံၢ်နွံ စံးဝဲန့ၣ်လီၤ.
“အဝဲသ့ၣ်န့ၣ်နီၤဖးလီၤအသး(၃)ဖု.ထီၣ်ဝဲဆူကမၤမိၢ်-ဖၣ်ပူၣ်ကျဲအမုၢ်ထီၣ် ပှဲၥ်လိၥ်ကျဲအနံၤန့ၣ်တဒူၣ်,လၢမုၢ်နုၥ်တကပၤန့ၣ်တဒူၣ် ဒီး လဲၤဝဲလိၤလိၤကျဲမုၢ်ခိၣ်န့ၣ်တဒူၣ်. တချုးအဝဲသ့ၣ်လဲၤဘၣ်န့ၣ်ခးဆှဲဝဲကျိဖးဒိၣ်,ဒြိ ဒ်သိးဒီးတရီပူၤ,ဝၣ်သိခိၣ်,လၢၢ်ကွဲဒိၣ်, လၢၢ်ကွဲဖိ,မဲးကၠံၣ်ခံတၢ်လီၢ်တဖၣ်န့ၣ်အခးဆှဲဝဲဒီးကျိဖးဒိၣ်ဝံၤလဲၤထီၣ်လၢအကစၢ် ထီၣ်ဝဲမ့တန့ၢ်ဘၣ်အိၣ်တပတုၥ်မၤဝဲတဆီဘၣ် တဆီဒ်န့ၣ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢတၢ်န့ၣ်အဃိတကီၢ်ခါခဲအံၤလၢမဲးကၠံၣ်ခံ,လၢၢ်ကွဲဖိဒီးဝၣ်သိခိၣ်တကပၤန့ၣ်တၢ်ဒုးကဲထီၣ်လၢပယီၤသုးဒီး(KNLA)သုးပၥ်ဖှိၣ် အဘၢၣ်စၢၤကိးမုၢ်နံၤဒဲးအသိး စးထီၣ်လၢအဝဲသ့ၣ်လဲၤထီၣ်တုၤတၢ်ဆၢကတီၢ်အိၣ်ဝဲတနွံလံဘၣ်ဆၣ် ခီဖျိတိဝဲတဖျိဘၣ်အဃိ တုၤလၢခဲအံၤအိၣ်ဒံးဝဲဝါဒူ,သါအီၣ်ပျ့ၣ်,မဲၤကၠံၣ်သဝီဒီးလၢၢ်ကွဲဖိသဝီသ့ၣ်တဖၣ်အံၤအပူၤအဂ့ၢ်န့ၣ် (သုးက့ ၅) သုးက့ခိၣ် စံးအါထီၣ် ဝဲန့ၣ်လီၤ.
ဒ်န့ၣ်အသိးပယီၤသုးလၢအဟဲထီၣ်ခဲအံၤတဖၣ်အနီၣ်ဂံၢ်မ့အိၣ်ဝဲလၢအကထိညါဘၣ်ဆၣ် အါဒၣ်တက့ၢ်န့ၣ်မ့ၢ်ဝဲသုးဖိသီသူၣ်ဘီၣ် သးစၢ်,တၢ်လဲၤခီဖျိတအိၣ်လၢတၢ်ဒုးတၢ်ယၤပူၤဘၣ်အဃိ ကလဲၤထီၣ်ဝဲဒူဒူအဂီၢ်စ့ၢ်ကီးတၢ်ကီတၢ်ခဲအိၣ်ဝဲအဂ့ၢ်န့ၣ် လီၢ်ကဝီၤဒူသဝီ ပှၤဘၣ်မူဘၣ်ဒါလၢအိၣ်ဘူးဖဲန့ၣ်တဂၤပဲၥ်ထံနီၤဖးစံးဝဲန့ၣ်လီၤ.
တကီၢ်ခါခဲအံၤခီဖျိလၢတၢ်ဒုးကဲထီၣ်,ပယီၤသုးခးလီၤစၢၤကျိဖးဒိၣ်,ဒြိအဃိ ဒူသဝီလၢအိၣ်ဘူးဖဲန့ၣ်ဒ်အမ့ၢ် မဲၤကၠံၣ်ခံ,တရီပူၤ, ဝၣ်သိခိၣ်,လၢၢ်ကွဲဒိၣ်,လၢၢ်ကွဲဖိ,မီလိၥ်ကျိဒီးန့ၢ်ကးသဝီကမျၢၢ်သ့ၣ်တဖၣ် အိၣ်လၢသဝီပူၤတဘူၣ်ဘၣ်ဃ့ၢ်ထီၣ်ဟးအိၣ်လၢတၢ် ဘံၣ်တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကတၢတံၥ်ဒီးဖၣ်ပူၣ်သုးကလၢၤလၢပယီၤသုးကလဲၤထီၣ်မၤအါထီၣ်သုးနီၣ်ဂံၢ်ခဲအံၤန့ၣ်ဘၣ်တၢ်ကဝီၤတံၢ်ခးအီၤ,တၢ်ဒီၣ်တဲၥ်ဃၥ်ဝဲကျဲတၢ်လဲၤတၢ်က့ၤတၢ်ဆၢကတီၢ်န့ၢ်ဝဲလၢ(၂)နံၣ်ဃၣ်ဃၣ်လံအဃိ လၢ(Y-8)ကဘီယူၤအံၤတဆီတၢ်ဟဲတ့ၢ်လီၤန့ၢ်ဝဲတၢ်အီၣ်တၢ်အီ ဘိၣ်ဃုၥ်ဒီးစုကဝဲၤကျိချံပှၥ်သၣ်ဘိၣ်သ့ၣ်တဖၣ်တလီၢ်လီၢ်န့ၣ်လီၤ.
မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤအပူၤ သုးဟံန့ၢ်တၢ်စိတၢ်ကမီၤ(၅)နံၣ်ဘျဲၣ်အတီၢ်ပူၤအံၤ ခ့ၣ်အဲၣ်ယူၣ်ဒိၣ်စိအီၤန့ၢ် အမျးကယၤ(၉၀)လံအဃိ ဟီၣ်ကဝီၤပူၤဖဲန့ၣ်လၢအတပၣ်ဃုၥ်ဒီးကမၤမိၢ်ဝ့ၢ်အံၤဘၣ်န့ၣ် သုးမီၤစိရိၤတၢ်ပၢတၢ်ြပး ဟးဂီၤတအိၣ် လၢၤဘၣ်န့ၣ်ပစံးသ့အဂ့ၢ်န့ၣ် ခ့ၣ်အဲၣ်ယူၣ်စံးဝဲအသိး သ့ၣ်ညါဘၣ်န့ၣ်လီၤ.