လါမ့ၤ ၁၃ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်ကဝီၤ တလါအတီၢ်ပူၤခီဖျိလၢပယီၤသုးအကျိဖးဒိၣ်,ဒြိဒီးကဘီယူၤအံၤအဃိ ကမျၢၢ်သံဘၣ်ဒိ(၁၅)ဂၤတကးဒံးဘၣ်ဟံၣ်ဃုၥ်ဒီးကၠိ,တၢ်ဘူၣ်တၢ်ဘါတၢ်သူၣ်ထီၣ်ဟးဂီၤပၥ်ဖှိၣ်အိၣ်ဝဲ(၃၇)ဖျၢၣ်အဂ့ၢ်န့ၣ် သ့ၣ်ညါဘၣ်လၢ ကီၢ်ရ့ၣ်တၢ်မၤနီၣ်စရီအပူၤန့ၣ်လီၤ.
ဒ်ကီၢ်ရ့ၣ်တၢ်မၤနီၣ်မၤစရီပူၤအိၣ်ဝဲအသိးန့ၣ် လၢၢ်ဒိၣ်ကီၢ်ဆၣ်,မူကီၢ်ဆၣ်ဒီးဆီထံးကီၢ်ဆၣ်ဟီၣ်ကဝီၤ အပူၤကွံၥ်လါအ့ဖြ့ၣ် ၉ သီ တုၤလါမ့ၤ ၇ သီလၢ(၂၈)သီအတီၢ်ပူၤ သုးမီၤစိရိၤအံၤတၢ်ဒုးကဲထီၣ်အိၣ်ဂ့ၤ,တအိၣ်ဂ့ၤသူဝဲဒၣ်ကဘီယူၤ ပီၣ်(၂၅၀),ပီၣ်(၅၀), ပီၣ် (၂၀၀)မ့ၣ်ပိၢ်, ဒြိ, ပၤရၤမီၤတၤလ့ၤထံ(Paramotor), (၁၃၀ မမ),(၁၂၀ မမ), (၈၁ မမ),ဟီၤဝ့ၤစၤကျိဖးဒိၣ်အချံပၥ်ဖှိၣ်အိၣ်ဝဲ အစှၤန့ၢ် (၄၀) ဖျၢၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ခီဖျိလၢတၢ်ဟူးတၢ်ဂဲၤသ့ၣ်တဖၣ်အံၤအဃိ လီၢ်ကဝီၤကမျၢၢ်သံ(၁)ဂၤ,ဘၣ်ဒိဘၣ်ထံး(၁၄)ဂၤဒီး ဟံၣ်တၢ်သူၣ်ထီၣ်တစှၤန့ၢ်အဖျၢၣ် (၃၀), ကၠိတၢ်သူၣ်ထီၣ်(၂)ဖျၢၣ်,တၢ်ဆါဟံၣ်(၂)ဖျၢၣ်,သီခါဖၠၣ်တၢ်သူၣ်ထီၣ်(၃)ဖျၢၣ် ပၥ်ဖှိၣ်ခဲလၢၥ်(၃၇)ဖျၢၣ် အဂ့ၢ်န့ၣ် တၢ်ထုးထီၣ် မၤနီၣ်စရီအပူၤပၥ်ဖျါဝဲန့ၣ်လီၤ.
ဒီးလၢကီၢ်ဆၣ်သ့ၣ်တဖၣ်အံၤအကျါလီၤဆီဒၣ်တၢ်လၢၢ်ဒိၣ်ကီၢ်ဆၣ်အံၤ ထံၣ်ဘၣ်လၢသုးမီၤစိရိၤလုၢ်သ့ၣ်ခါပတၥ်မၤကမၣ်ဝဲ ပှၤဟီၣ်ခိၣ်ဖိခွဲးယၥ်ကဲထီၣ်အဘျီအါန့ၢ်ဒံးကီၢ်ဆၣ်လၢအဂၤသ့ၣ်တဖၣ်န့ၣ်လီၤ.
“လၢပကီၢ်ဆၣ်အပူၤ ဒုၣ်ဒါဒုခဲအံၤမ့ၢ်ဘၣ်ကွၢ်တၢ်လီၢ်လၢအအိၣ်ဝဲကိးတီၤဒဲးန့ၣ်အမၤအါထီၣ်အဂံၢ်အဘါ. အဟူးဂဲၤစ့ၢ်ကီး ဟဲအါထီၣ်န့ၣ်ပတဲသ့လီၤ” အဂ့ၢ်န့ၣ် လၢၢ်ဒိၣ်ကီၢ်ဆၣ် ပှၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးခီဖျိလၢသုးမီၤစိရိၤအတၢ်ဟူးတၢ်ဂဲၤကလုၥ်ကလုၥ်အံၤအဃိစ့ၢ်ကီး လၢၢ်ဒိၣ်ကီၢ်ဆၣ် အပူၤကွံၥ်လါအ့ဖြ့ၣ် ၁၀ ဘျဲၣ် အခါန့ၣ်စ့ၢ်ကီး ဝၣ်က့ၣ်ဒၢသဝီ, လၢၢ်ဆူၣ်ခိၣ်သဝီ,ကိၣ်ထၣ်သဝီ ဒီး ကဒံမုၢ်ဒၢသဝီဖိ ပှၤနီၣ်ဂံၢ်(၆၀၂)ဂၤဘၣ်ဃ့ၢ်ထီၣ် ဟးအိၣ်ဝဲလၢ တၢ်ဘံၣ်တၢ်ဘၢလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်အပူၤကွံၥ်လါမးရှး ပယီၤသုးလၢအနုၥ်လီၤအိၣ်ဟူးဂဲၤဝဲဖဲယ့ၤတွ့ကိ(ရေတွင်းကုန်း)သဝီပူၤတဖၣ်န့ၣ်စ့ၢ်ကီး တၢ်ဆၢကတီၢ်ထီၣ်ဘးလၢ(၂)လါဘျဲၣ်လံဘၣ်ဆၣ်တုၤလၢခဲအံၤတဟးထီၣ်အိၣ်ဒံးဝဲလၢသဝီပူၤအဃိ ကမျၢၢ်လၢဃ့ၢ်ထီၣ်တဖၣ် စ့ၢ်ကီးတုၤလၢခဲအံၤက့ၤဟံၣ်က့ၤဃီတဘူၣ်ဘၣ်ဟးအိၣ်ကဒုသးအဖၢမုၢ်အဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါစံးဝဲန့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤအပူၤ အပူၤကွံၥ်လါမးရှးတလါအတီၢ်ပူၤန့ၣ်စ့ၢ်ကီး ခီဖျိလၢသုးမီၤစိရိၤအဒြိ,ကျိးဖးဒိၣ်,ပၤရၤမီၤတၤ ဒီး ကဘီယူၤအတၢ်ဟူးတၢ်ဂဲၤအဃိ ကမျၢၢ်သံ(၄၃)ဂၤ,ဘၣ်ဒိ(၃၇)ဂၤဒီး ဟံၣ်,ကၠိ,တၢ်ဘူၣ်တၢ်ဘါတၢ်သူၣ်ထီၣ် ဟးဂီၤပၥ်ဖှိၣ်အိၣ်ဝဲ (၃၉)ဖျၢၣ် ကဲထီၣ်တ့ၢ်ဒံးဝဲန့ၣ်လီၤ.
