လါမ့ၤ ၂၅သီ, ၂၀၂၆နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဒူပျၥ်ယၥ်ကီၢ်ရ့ၣ်သုးက့(၆)ကီးတရံးကီၢ်ဆၣ်နိၣ်ဖိ,ထံမူထၣ်သဝီဟီၣ်ကဝီၤအပူၤလီၢ်ကဝီၤဖိလၢက့ၤအိၣ်ဆိးက့ၤဝဲတဖၣ်အံၤသုးကရူၢ်ပၥ်ပနီၣ်ဝဲအတၢ်ဟးထီၣ်က့ၤလီၤဒီးမၤဝဲတၢ်သမံသမိးအိၣ်ဝဲအဂ့ၢ်,လီၢ်ကဝီၤဖိတဖၣ်စံးဝဲဒၣ်န့ၣ်လီၤ.
ပယီၤသုးကရူၢ်အံၤလၢကညီဖီၣ်စုကဝဲၤထုးဖးသးကရူၢ်ကရၢသ့ၣ်တဖၣ်တဆီတလါအံၤလါမ့ၤအပူၤမၢဝဲတၢ်ကိးက့ၤနိၣ်ဖိ,ထံမူထၣ်သဝီလီၢ်ကဝီၤဖိတဖၣ်လၢကက့ၤအိၣ်ဆိးက့ၤဝဲလၢနီၢ်ကစၢ်တၢ်လီၢ်တၢ်ကျဲပူၤအဂ့ၢ်,သ့ၣ်ညါဘၣ်လၢလီၢ်ကဝီၤဖိတဖၣ်အအိၣ်န့ၣ်လီၤ.
ဒီးခီဖျိလၢကညီဖီၣ်စုကဝဲၤထုးဖးသးကရူၢ်ကရၢသ့ၣ်တဖၣ်အတၢ်အုၣ်ကီၤအဃိလီၢ်ကဝီၤဖိတနီၤက့ၤအိၣ်ဆိးက့ၤဝဲဒၣ်အိၣ်ဝဲဒီးပှၤလၢက့ၤအိၣ်ဆိးဝဲသ့ၣ်တဖၣ်အံၤသဂၢၢ်ဘၣ်ဝဲသုးကရူၢ်မၤတၢ်သမံသမိးတၢ်မၤတံၥ်တၥ်ဒီးတၢ်ပၥ်ပနီၣ်အတၢ်ဟးထီၣ်က့ၤလီၤတဖၣ်အဂ့ၢ်,ကမျၢၢ်လီၢ်ကဝီၤဖိတဂၤစံးဝဲဒ်အံၤန့ၣ်လီၤ.
“ပယီၤန့ၣ်ပှၤဟးထီၣ်ဟးလီၤသမံသမိးဝဲပှၤလံၥ်လဲၢ်(လဲးမး)န့ၣ်လီၤ.လဲးမးန့ၣ်ပှၤဘၣ်လဲၤကွဲးလၢခိၣ်ဖၢၣ်ဘီအိၣ်,ယဲယတကွဲးလဲးမးဘၣ်အဃိယကလဲၤလၢယကျီးပူၤယဘၣ်တရံးလၢပျီပူၤဖးယံၥ်န့ၣ်လီၤ.မ့မ့ၢ်ယတခွါတဂၤန့ၣ်အကျီးအိၣ်လၢထးတကုးအဃိ,ပှၤမၢလဲၤပၠးလီၤအလဲးမးကိးမုၢ်ဂီၤကိးမုၢ်ဟါန့ၣ်လီၤ.ပယီၤသုးတဖၣ်အံၤအမဲၥ်တမုၥ်နါတမုၥ်ဘၣ်.ဖျါလၢအဲၣ်ဒိးခးတၢ်သပှၢ်ကတၢၢ်န့ၣ်လီၤ”အဂ့ၢ်စံးဝဲဒၣ်န့ၣ်လီၤ.
ပယီၤသုးကရူၢ်အံၤမၤဝဲတၢ်သမံသမိးလီၢ်ကဝီၤဖိအမဲၥ်ညါ,ပၥ်ပနီၣ်ကးတံၥ်ဝဲကမျၢၢ်လၢအိၣ်ဆိးလၢဒဲ,တၢ်ဖံးအီၣ်မၤအီၣ်,စံၢ်လီၢ်ကျီးလီၢ်တဖၣ်အတၢ်ဟဲက့ၤနုၥ်လီၤပှ့ၤအီၣ်ပှ့ၤအီတၢ်လၢဒူသဝီပူၤအသိး,မၤလီၤတံၢ်လီၤဆဲးဝဲပှၤဟဲက့ၤပှ့ၤတၢ်ဖိတဖၣ်အတၢ်ဘၣ်ထွဲဒီးကီၢ်သူလ့ၤသုးမုၢ်ဒိၣ်အိၣ်တအိၣ်အဂ့ၢ်,အဝဲစံးအါထီၣ်ဝဲဒၣ်န့ၣ်လီၤ.
တကးဒံးဘၣ်,ကွၢ်ဟုၣ်ကွၢ်စုဝဲလီၢ်ကဝီၤဖိတဖၣ်လၢတၢ်ဆဲးကျိးဆဲးကျၢဒီးပှၤလၢတၢ်ချၢတဖၣ်လၢအိၤလဲပူၤစ့ၢ်ကီးအိၣ်ဝဲတယူၥ်ဃီအဂ့ၢ်,သ့ၣ်ညါဘၣ်န့ၣ်လီၤ.
နိၣ်ဖိ-ထံမူထၣ်သဝီသ့ၣ်တဖၣ်အံၤ, အပူၤကွံၥ်(၂၀၂၁)နံၣ်လါအီကူးအပူၤတၢ်ခးလိၥ်သးကဲထီၣ်ဝဲဒၣ်လၢတၢ်ပၢၢ်ဆၢသုးပၥ်ဖှိၣ်ကရူၢ်ဒီးပယီၤသုးအဘၢၣ်စၢၤအဃိကမျၢၢ်လီၢ်ကဝီၤဖိတဖၣ်ဘၣ်ဃ့ၢ်ထီၣ်အိၣ်ကဒုတ့ၢ်ဝဲဒၣ်အသးဒီး(၂၀၂၄)နံၣ်အပူၤစ့ၢ်ကီးပယီၤသုးမၤဝဲကဘီယူၤတၢ်ထီၣ်ဒုးအိၣ်ဝဲအဃိ,လီၢ်ကဝီၤကမျၢၢ်တဖၣ်ဘၣ်ဃ့ၢ်ထီၣ်ဆဲးအိၣ်ကဒုဝဲအသးတုၤခဲအံၤအဂ့ၢ်,သ့ၣ်ညါဘၣ်န့ၣ်လီၤ.
ဒီးတနံၣ်အံၤ(၂၀၂၆)နံၣ်လါမးရှးအပူၤ,ပယီၤသုးကရူၢ်အံၤထီၣ်မၤန့ၢ်က့ၤဝဲအ့ရှၢၣ်ကျဲမုၢ်ဝံၤအလီၢ်ခံ,နုၥ်လီၤအိၣ်ဆိးဝဲလၢဒၣ်လၢသဝီသ့ၣ်တဖၣ်အံၤအသီခါဖၠၣ်,တၢ်ဘါယွၤသရိၥ်,ကျဲမုၢ်ဖးဒိၣ်,ကျဲဖးဒ့ဒီးသဝီခိၣ်ထီးကျဲတဖၣ်အပူၤအိၣ်ဝဲအမဲၥ်ညါ,တ့ထီၣ်ဘှီထီၣ်စ့ၢ်ကီးဝဲအတၢ်လီၢ်တၢ်ကျဲလၢကျဲအရ့ဒိၣ်တဖၣ်အပူၤအိၣ်ဝဲအါတီၤအဂ့ၢ်,လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
တကတီၢ်ဃီ,လၢတၢ်ကသူၣ်ထီၣ်ဆီလီၤက့ၤဝဲပၢပြးတၢ်ဖံးတၢ်မၤတကပၤစ့ၢ်ကီးတကီၢ်ခါခဲအံၤပၥ်ဖှိၣ်ထီၣ်ဝဲအသးဒီးသုးခိးကီၢ်ဆၢလၢတၢ်ကသူၣ်ထီၣ်ဘှီထီၣ်ကၠိ,အိးထီၣ်က့ၤဝဲကၠိဒီးတၢ်မၤဂ့ၤထီၣ်ဒူသဝီဂ့ၢ်ဝီတဖၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
နိၣ်ဖိ-ထံမူထၣ်သဝီဟီၣ်ကဝီၤအံၤကညီဖီၣ်စုကဝဲၤထုးဖးသးကရူၢ်ကရၢတဖၣ်အတၢ်အုၣ်ကီၤအဃိ,တကီၢ်ခါခဲအံၤလီၢ်ကဝီၤကမျၢၢ်တနီၤက့ၤအိၣ်ဆိးဝဲဒၣ်အိၣ်ဝဲဒၣ်ဘၣ်ဆၣ်,ပှၤလၢက့ၤအိၣ်ဆိးဝဲသ့ၣ်တဖၣ်အံၤအါတက့ၢ်မ့ၢ်ဝဲပှၤလၢအဘူးဒီးသုးခိးကီၢ်ဆၢ(BGF)(မ့တမ့ၢ်)ဒံၣ်မိၣ်ကရ့ၣ်စံၣ်တၢ်ဘၣ်ဘျူးသုးမုၢ်ဒိၣ်(DKBA)ကရူၢ်ကရၢဒီးတနီၤတခီမ့ၢ်ဝဲလီၢ်ကဝီၤဖိလၢက့ၤကွၢ်ထွဲက့ၤဝဲအတၢ်ဖံးအီၣ်မၤအီၣ်လီၢ်ဒီး,အိၣ်ဆိးဝဲဒၣ်လၢတၢ်သူၣ်ထီၣ်ဖျးအီၣ်လီၢ်ကျဲ,ဒဲတဖၣ်လီၤအဂ့ၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး,ဒူသဝီခံဖျၢၣ်ပၥ်ဖှိၣ်ဟံၣ်ခိၣ်ကအိၣ်ဝဲလၢအဖျၢၣ်(၇၀၀)ခိၣ်ဃၢၤဃၣ်ဃၣ်အံၤခီဖျိတၢ်ဘံၣ်တၢ်ဘၢလီၢ်တံၢ်လီၤဆဲးတအိၣ်ဒံးဝဲဒၣ်ဘၣ်အဃိပှၤလၢတက့ၤအိၣ်ဆိးဝဲဒၣ်တဘူၣ်ဒံးဘၣ်တဖၣ်အိၣ်ဝဲအါအါဂီၢ်ဂီၢ်အဂ့ၢ်,သ့ၣ်ညါဘၣ်န့ၣ်လီၤ.