လါယူၤလံ ၁၂သီ, ၂၀၂၆နံၣ်, ခ့ၣ်အဲးစံၣ်,
ကဆဲးမၤဖျိမၤဖျါထီၣ်က့ၤဝဲ ထံကီၢ်ဒီတဘ့ၣ်တၢ်ပတုၥ်တၢ်ခးလံၥ်ဃံးဃၥ်(NCA) အမိၢ်လံၤမိၢ်ပှၢ်အဂီၢ်,လဲၤထံၣ်လိၥ်သးဒီးသုးကရူၢ်လၢန့ၤပၠ့ၤဒီၣ်ဝံၤအလီၢ်ခံ,တနံၤအံၤလါယူၤလံ(၁၂)သီအနံၤအံၤန့ၣ် ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)အိးထီၣ်ဝဲဒၣ်တၢ်ရ့လိၥ်မုၥ်လိၥ်ဝဲၤဒၢးလၢဖၣ်အၣ်ဝ့ၢ်တီၤကလ့တၢ်လီၢ်သီအပူၤအဂ့ၢ်,သ့ၣ်ညါဘၣ်န့ၣ်လီၤ.
တၢ်အိးထီၣ်ဝဲတၢ်ရ့လိၥ်မုၥ်လိၥ်ဝဲၤဒၢးအံၤ အတၢ်ပညိၣ်မ့ၢ်ဒ်သိး ကဘှါရှဲဝဲတၢ်သဘံၣ်သဘုၣ်သ့ၣ်တဖၣ်အဂ့ၢ်,( DKBA) ပၢဆှၢသုးဂ့ၢ်ဝီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤဆါအီၣ်စံးလီၤဝဲလၢ တၢ်အိးထီၣ်ဝဲၤဒၢးတၢ်ရဲၣ်တၢ်ကျဲၤ အပူၤဒ်အံၤန့ၣ်လီၤ.
အဝဲစံးဝဲလၢ “ပမၤဖျိမၤဖျါထီၣ်(NCA)အမိၢ်လံၤမိၢ်ပှၢ်န့ၢ်အဃိ,ပအိးထီၣ်ဝဲတၢ်ရ့လိၥ်မုၥ်လိၥ်ဝဲၤဒၢးအံၤန့ၢ်ဝဲန့ၣ်လီၤ.ပမ့က့ၤကွၢ်ကဒါက့ၤတၢ်ရ့လိၥ်မုၥ်လိၥ်ဝဲၤဒၢးန့ၣ်မ့ၢ်ဝဲတၢ်တခါလၢအဘှါရှဲဝဲတၢ်ဘၣ်ဂံၥ်ဂူၥ်,ဒီးတၢ်သဘံၣ်ဘုၣ်လၢတကြၢးအိၣ်ထီၣ်တဖၣ်အဃိပအိးထီၣ်ဝဲၤဒၢးဝဲအံၤလီၤအဂ့ၢ် ”စံးဝဲဒၣ်န့ၣ်လီၤ.
လၢန့ၣ်အမဲၥ်ညါ, သုးဖိသံၣ်ဖိလၢအဟံးမူဟံးဒါဖဲတၢ်ရ့လိၥ်မုၥ်လိၥ်ဝဲၤဒၢးသ့ၣ်တဖၣ်အံၤ ကဘၣ်ထိၣ်ကဆှၣ်လီၤသးဒီး ကဘၣ်အိၣ်ဒီးတၢ်ဆီၣ်လီၤသးစ့ၢ်ကီးအဂ့ၢ်,ကတိၤပၥ်ဖျါဝဲဒၣ်လၢ တၢ်အိးထီၣ်တၢ်ရ့လိၥ်မုၥ်လိၥ်ဝဲၤဒၢး တၢ်ရဲၣ်တၢ်ကျဲၤ အပူၤစ့ၢ်ကီးန့ၣ်လီၤ.
တၢ်ဆီတလဲအိးထီၣ်ဝဲ တၢ်ရ့လိၥ်မုၥ်လိၥ်ဝဲၤဒၢး တၢ်ရဲၣ်တၢ်ကျဲၤအပူၤ(DKBA) ခိၣ်နၢ်ပှၤဘၣ်မူဘၣ်ဒါတဖၣ်, ကညီတၢ်မုၥ် တၢ်ခုၣ်ကီၣ်ကးကရၢ (PC), ဒူပျၥ်ယၥ်ကီၢ်ရ့ၣ်ခိၣ်လီၢ်လံၤ စီၤရွှ့ၣ်မီ, သုးခိးကီၢ်ဆၢ (BGF) သုးခိၣ်မီၢ်သိး, ကညီကီၢ်စဲၣ် တၢ်ဘံၣ်တၢ်ဘၢဒီးကီၢ်ဆၢဂ့ၢ်ဝီကိၥ်တိၥ်ခိၣ်, ဖလိၤစှီၤဒံၣ်မိၣ်ကရ့ၣ်တံၣ်ပၣ်တံၣ်, ကညီဒီကလုၥ်ဒံၣ်မိၣ် ကရ့ၣ်တံၣ်ပၣ်တံၣ်ခိၣ်နၢ်တဖၣ်ထီၣ်ပၥ်ဃုၥ်ပၣ်ဂီၢ်ဝဲအမဲၥ်ညါ တီၤကလ့ဘူးဒးတၢ်ဘူၣ်တၢ်ဘါသီခါဖးဒိၣ် အိးတမး ဒီး သုးကရူၢ်ပၥ်လီၤကညီကီၢ်စဲၣ်ပဒိၣ်ပပှၢ် ခိၣ်နၢ်တဖၣ်ပၣ်ဃုၥ်ပၣ်ဂီၢ်ဝဲအဂ့ၢ်, သ့ၣ်ညါဘၣ်န့ၣ်လီၤ.
တကးဒံးဘၣ်, ကညီကီၢ်စဲၣ်တၢ်ကွၢ်ဟုၣ်ကွၢ်စုၣ်တၢ်ပတုၥ်တၢ်ခးကမံးတံၥ်(JMC-S), ကမျၢၢ်ခၢၣ်စး ကရူၢ်ကရၢတဖၣ်ထီၣ်ပၥ်ဃုၥ်ပၣ်ဂီၢ်ဝဲဒၣ်စ့ၢ်ကီးန့ၣ်လီၤ.
တကတီၢ်ဃီ,ခီဖျိတၢ်အဲၣ်ဒိးန့ၢ်ဘၣ်ဝဲတၢ်မုၥ်တၢ်ခုၣ်ဒီး တၢ်ရ့လိၥ်မုၥ်လိၥ်ဝဲၤဒၢးအံၤ အတၢ်ဘၣ်ထွဲအိၣ်ဝဲဒီး(NCA) အဃိအနီၢ်ကစၢ် ဒၣ်ဝဲ ပၣ်ဃုၥ်ပၣ်ဂီၢ်ဝဲလၢတၢ် အိးထီၣ်မူးတၢ်ရဲၣ်တၢ်ကျဲၤအပူၤအဂ့ၢ် စီၤရွှ့ၣ်မီ စံးဝဲဒၣ်န့ၣ်လီၤ.
ဒ်န့ၣ်အသိး,တၢ်ပၥ်သူၣ်ပၥ်သးလၢ ကဒုးအိၣ်ထီၣ်တၢ်သဘံၣ်ဘုၣ်ဒီး ထံလီၢ်ကီၢ်ပူၤပဒိၣ်ကရူၢ်ကရၢတအိၣ်ဝဲဘၣ်အဂ့ၢ်, သုးခိးကီၢ်ဆၢ (BGF) သုးခိၣ်မီၢ်သိး စ့ၢ်ကီးကတိၤပၥ်ဖျါဝဲလၢ တၢ်အိးထီၣ်(DKBA)တၢ်ရ့လိၥ်မုၥ်လိၥ်ဝဲၤဒၢးတၢ် ရဲၣ်တၢ်ကျဲၤ အမူးအပူၤန့ၣ်လီၤ.