လါယူၤလံ ၁၂ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)ဘုသိၣ်ကီၢ်ဆၣ်အပူၤ သုးမီၤစိရိၤကဘီယူၤလဲၤတ့ၢ်လီၤကဒီးမ့ၣ်ပိၢ်အဃိ လီၢ်ကဝီၤကမျၢၢ် ပိၥ်မုၣ်ဘၣ်ဒိ(၁)ဂၤဒီး ဟံၣ်ဃုၥ်ဒီးကျီၢ်,ထိးသံဝဲအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲလါယူၤလံ ၁၀ သီ ဂီၤခီ ၆း၃၀ ဃၣ်ဃၣ်အဆၢကတီၢ် (Y-12)ကဘီယူၤ လဲၤတ့ၢ်လီၤဝဲမ့ၣ်ပိၢ်လၢ ဒ့ဝါကရူၢ် ဘုဝါကွံသဝီ ဒီး သီဃဲၥ်ထၣ်သဝီပူၤန့ၣ်လီၤ.
လၢကဘီယူၤအတၢ်လဲၤခးလီၤတၢ်ဘျီဝဲအံၤ သဝီဖိ နီၣ်မးအ့မၠ့ၣ်(၂၈)နံၣ်အံၤ အခိၣ်သၣ်ဃံ,အစုဘၣ်ဒိဘၣ်ထံးဝဲနးနးကျံၤကျံၤ တကးဒံးဘၣ်အမဲၥ်ညါ ဘၣ်သံဃုၥ်စ့ၢ်ကီးဝဲကျီၢ်(၂)ဒု, ထိး(၁)ဒုအဂ့ၢ်န့ၣ် သ့ၣ်ညါဘၣ်န့ၣ်လီၤ.
တချုးကဘီယူၤလဲၤခးလီၤတၢ်လၢဘုသိၣ်ကီၢ်ဆၣ် ဒ့ဝါကရူၢ်အပူၤဒံးဘၣ် ဖဲလါယူၤလံ ၉ အနံၤစ့ၢ်ကီး ပယီၤသုး(Y-12) ကဘီယူၤလဲၤတ့ၢ်လီၤဒံးဝဲမ့ၣ်ပိၢ်အဖျၢၣ်(၂၀)ဘျဲၣ်ဒံးလၢ ဒွဲၣ်လိကီၢ်ဆၣ် ကတၢတံၥ်ကရူၢ်ပူၤဒံးဒီး ဖဲန့ၣ် ဟံၣ်ဟးဂီၤ (၁)ဖျၢၣ် ဒီးကျီၢ်သံစ့ၢ်ကီးဝဲ(၈)ဒု ကဲထီၣ်ဒံးဝဲန့ၣ်လီၤ.
