ကၠီၣ်တဲၣ်ပှၤဘၣ်မူဘၣ်ဒါတဖၣ်အိၣ်ကတီၤပၥ်သးလၢတၢ်ကတူၢ်လိၥ်ဂ့ၢ်ဂီၢ်အူပှၤဃ့ၢ်တၢ်ဒုးလီၢ်အိၣ်ကဒုဖိ

လါယူၤလံ ၉သီ, ၂၀၂၆နံၣ်, ခ့ၣ်အဲးစံၣ်,

ကီၢ်ကၠီၣ်တဲၣ်-ကညီကီၢ်စဲၣ်ကီၢ်ဆၢဖလူ-မ့လဲၣ်ပၤဟီၣ်ကဝီၤပူၤတၢ်ဒုးက့ၤဆူၣ်ထီၣ်ဝဲလၢပယီၤသုးကရူၢ်ဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်အဘၢၣ်စၢၤအဃိ,လၢတၢ်ကတူၢ်လိၥ်ဝဲဂ့ၢ်ဂီၢ်အူပှၤဃ့ၢ်တၢ်ဒုးလီၢ်အိၣ်ကဒုဖိတဖၣ်အဂီၢ်ကၠီၣ်တဲၣ်ပှၤဘၣ်မူဘၣ်ဒါတဖၣ်အိၣ်ကတီၤပၥ်ဝဲအသးအဂ့ၢ်,ကၠီၣ်တဲၣ်ကီၢ်ဆၢတၢ်ကစီၣ်တဖၣ်ပၥ်ဖျါထီၣ်ဝဲဒၣ်ဖဲတနံၤအံၤလါယူၤလံ(၉)သီအနံၤန့ၣ်လီၤ.

ပယီၤသုးကရူၢ်အံၤလၢကဟံးန့ၢ်က့ၤဝဲရၤမတံကလံၤထံးတၢ်လီၢ်တၢ်ကျဲတဖၣ်အဂီၢ်,စးထီၣ်လၢလါယူၤလံ(၇)သီတုၤလၢတနံၤအံၤလါယူၤလံ(၉)သီအနံၤအပူၤခးလီၤဝဲဒၣ်ကျိဖးဒိၣ်,ဟဲခးလီၤတၢ်ဒီးကဘီယူၤအိၣ်ဝဲတပယူၥ်ဃီအဃိ,သူမွဲထံကျိကၢၢ်နံၤလီၢ်အိၣ်ကဒုဖိတဖၣ်ဘၣ်အိၣ်လၢတၢ်ပျံၤတၢ်ဖုးဒီးတၢ်ဘၣ်ယိၣ်အပူၤန့ၣ်လီၤ.

လၢတၢ်န့ၣ်အဃိ,လၢတၢ်ကတူၢ်လိၥ်ဝဲဂ့ၢ်ဝီၢ်အူပှၤဃ့ၢ်တၢ်ဒုးလီၢ်အိၣ်ကဒုဖိတဖၣ်အဂီၢ်ဒ်မဲၢ်ဆီးဝ့ၢ်ပၢြပးခိၣ်နၢ်ဒိၣ်ထီအတၢ်နဲၣ်လီၤအသိး,ဝ့ၢ်တၢ်ဘံၣ်တၢ်ဘၢခိၣ်နၢ်ဒိၣ်ထီဒီးကၠီၣ်တဲၣ်ကီၢ်ဆၢသုးမုၢ်ဒိၣ်လီၤဆီ,ဒူသဝီခိၣ်နၢ်ဒီးဒူသဝီတၢ်ဘံၣ်တၢ်ဘၢတဖၣ်နုၥ်လီၤမၤဝဲတၢ်သမံသမိးတၢ်ဘံၣ်တၢ်ဘၢအလီၢ်လၢမဟၤဝၤသဝီကရူၢ်ဟီၣ်ကဝီၤအပူၤအိၣ်ဝဲအဂ့ၢ်,ကၠီၣ်တဲၣ်တၢ်ကစီၣ်သန့တဖၣ်ပၥ်ဖျါထီၣ်ဝဲဒၣ်န့ၣ်လီၤ.

ဒီးဒ်ခိၣ်နၢ်တဖၣ်နုၥ်လီၤမၤဝဲတၢ်ဘံၣ်တၢ်ဘၢတၢ်လီၢ်အတၢ်သမံသမိးအိၣ်ဝဲအသိးန့ၣ်,မဟၤဝၤဟီၣ်ကဝီၤအပူၤတၢ်လီၢ်လၢကတူၢ်လိၥ်ဝဲပှၤဃ့ၢ်တၢ်ဒုးလီၢ်အိၣ်ကဒုဖိအံၤကတြီၢ်ဝဲပှၤအဂၤ(၃၀၀)ဂၤအဂ့ၢ်,ပၥ်ဖျါဝဲစ့ၢ်ကီးန့ၣ်လီၤ.

ကီၢ်ကၠီၣ်တဲၣ်အပူၤတကတီၢ်ခါခဲအံၤကီၢ်ပယီၤတကပၤပှၤဃ့ၢ်တၢ်ဒုးလီၢ်အိၣ်ကဒုဖိတဖၣ်ဃ့ၢ်ထီၣ်ဝဲဆူကၠီၣ်တဲၣ်တအိၣ်ဒံးဝဲဘၣ်ဆၣ်,လီၤဆီဒၣ်တၢ်ပျီတပိၢ်ပှၤဃ့ၢ်တၢ်ဒုးလီၢ်ကဝီၤဖိလၢအိၣ်ဘူးဝဲဒီးဖလူသ့ၣ်တဖၣ်အံၤဘၣ်အိၣ်ဝဲလၢတၢ်ပလီၢ်ပဒီသးအပူၤအဂ့ၢ်,ပှၤမၤစၢၤပှၤဃ့ၢ်တၢ်ဒုးလီၢ်အိၣ်ကဒုဖိတဖၣ်စံးဝဲဒၣ်န့ၣ်လီၤ.

ဘၣ်ဃးတကီၢ်ခါခဲအံၤပှၤလီၢ်အိၣ်ကဒုတၢ်အိၣ်သးဒီးကၠီကတူၢ်လိၥ်ဝဲဂ့ၢ်ဝီအူပှၤဃ့ၢ်တၢ်ဒုးလီၢ်အိၣ်ကဒုဖိအဖီခိၣ်ပှၤမၤစၢၤပှၤဃ့ၢ်တၢ်ဒုးလီၢ်အိၣ်ကဒုဖိတဂၤစံးဝဲလၢ
“ခဲအံၤပယီၤသုးဟဲတုၤလၢဖလူတၢ်သွၣ်ခိၣ်တကပၤလံအဃိဘူးဝဲဒီးပှၤလီၢ်အိၣ်ကဒုဖိလီၢ်လံန့ၣ်လီၤ.,ခဲအံၤပှၤဘၣ်ပျံၤကျိဖးဒိၣ်ကလီၤတဲၥ်မ့ၢ်ဂ့ၤ,ဒြိမ့ၢ်ဂ့ၤအဃိဒ်ခိၣ်နၢ်တၢ်နဲၣ်လီၤအသိးပှၤပံးဃၥ်ကၠိဒီးအါတက့ၢ်ပှၤအိၣ်ကတီၤပၥ်သးလၢကဃ့ၢ်ဆူထံကျိနံၤလီၤ.ကဃ့ၢ်လၢအဂၤတၢ်လီၢ်တအိၣ်ဘၣ်.ဘၣ်ဃးတၢ်သုးလီၢ်သုးကျဲလၢကၠီၣ်တဲၣ်ပူၤန့ၣ်အပူၤကွံၥ်တၢ်တဲအိၣ်သကိးအိၣ်န့ၣ်လီၤ.ကြၢးလၢတၢ်ကဘၣ်မၤဝဲလီၤ.ဘၣ်မနုၤအဃိလဲၣ်န့ၣ်ကျိချံပှၥ်သၣ်တဖၣ်အံၤလီၤတဲၥ်တုၤလၢကၠီၣ်တဲၣ်ပူၤအိၣ်ဝဲအဖီခိၣ်ကၠီၣ်တဲၣ်လီၢ်ကဝီၤဖိဒၣ်လဲၥ်အိၣ်ဆိးတဘူၣ်ဘၣ်ကဲထီၣ်သးအိၣ်ဝဲ”အဂ့ၢ်စံးဝဲန့ၣ်လီၤ.

တၢ်ကအိၣ်ခိးကွၢ်ဟုၣ်ကွၢ်စုၣ်ဝဲကညီကီၢ်စဲၣ်ကီၢ်ဆၢတကပၤတၢ်ဒုးတၢ်ယၤတၢ်အိၣ်သးဒီးသူမွဲထံကျိကၢၢ်နံၤပှၤလီၢ်အိၣ်ကဒုဖိတဖၣ်တၢ်အိၣ်သးအဂီၢ်မဲၢ်ဆီးခိၣ်နၢ်ဒိၣ်ထီပှၤဘၣ်မူဘၣ်ဒါသ့ၣ်တဖၣ်အံၤနဲၣ်လီၤဝဲဟီၣ်ကဝီၤဒူသဝီခိၣ်နၢ်,သဝီသးပှၢ်တဖၣ်အိၣ်ဝဲအသိး,နဲၣ်လီၤဝဲသုးမုၢ်သံၣ်ဘိဒီးဘံၣ်ဘၢပှၤဘၣ်မူဘၣ်ဒါတဖၣ်လၢကအိၣ်ကတီၤပၥ်သးထီဘိအိၣ်ဝဲဒၣ်န့ၣ်လီၤ.

ဒ်န့ၣ်အသိး,ဆီၣ်သခူစ့ၢ်ကီးဝဲကီၢ်ဆၢကမျၢၢ်လီၢ်ကဝီၤဖိတဖၣ်လၢကအိၣ်ခိးဒိကနၣ်ဝဲဖိးသဲစးပဒိၣ်ပပှၢ်အတၢ်ထုးထီၣ်ပၥ်ဖျါအသိး,တၢ်လီၤဆီမ့ၢ်အိၣ်ထီၣ်တမံၤလၢ်လၢ်ကဒုးသ့ၣ်ညါပၥ်ဖျါထီၣ်ဝဲဆူပှၤဘၣ်မူဘၣ်ဒါလၢအဆိအချ့အဂ့ၢ်,ပၥ်ဖျါဝဲန့ၣ်လီၤ.