လါယူၤလံ ၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တီအူကီၢ်ရ့ၣ်(သုးက့ ၂)ဟီၣ်ကဝီၤအပူၤ ကသံၣ်မူၤဘှီးလၢတၢ်ဖီၣ်န့ၢ်ဝဲလၢ အလီၤလၢဝဲ စ့ပယီၤအကကွဲၢ်(၁၅,၀၀၀)ဘျဲၣ်အံၤ ဖဲအပူၤကွံၥ်လါယူၤ ၂၆ သီအနံၤန့ၣ် တၢ်ဒွဲၣ်အူအီၣ်မၤဟးဂီၤကွံၥ်ဝဲ အဂ့ၢ်န့ၣ် ကီၢ်ရ့ၣ် တၢ်ကစီၣ်ထုးထီၣ်ပၥ်ဖျါဝဲဖဲမဟါလါယူၤလံ ၇ သီအံၤန့ၣ်လီၤ.
တၢ်ဒွဲၣ်အူအီၣ်မၤဟးဂီၤကသံၣ်မူၤဘှီးဘျီဝဲအံၤ ဘၣ်တၢ်တီခိၣ်ရိၣ်မဲမၤအီၤလၢဟီၣ်ကဝီၤခ့ၣ်အဲၣ်ယူၣ်ဒီးကညီဒီကလုၥ်ပၢၤကီၢ်သုး (KNPF) အံၤဒီး တၢ်ရဲၣ်တၢ်ကျဲၤအံၤဘၣ်တၢ်မၤအီၤဖဲအပူၤကွံၥ်လါယူၤ ၂၆ သီလၢအလီၤဘၣ်ဝဲဟီၣ်ခိၣ်ဒီဘ့ၣ် တၢ်မၤဟးဂီၤကသံၣ် မူၤဘှီးမုၢ်နံၤအံၤလၢဒီၣ်ဖးခိၣ်ကီၢ်ဆၣ် ဟီၣ်ကဝီၤတၢ်လီၢ်တတီၤအပူၤန့ၣ်လီၤ.
ကသံၣ်မူၤဘှီးတၢ်ဒွဲၣ်အူအီၣ်မၤဟးဂီၤကွံၥ်အီၤသ့ၣ်တဖၣ်န့ၣ်မ့ၢ်ဝဲ (WY)ကသံၣ်မူၤဘှီးအဖျၢၣ်(၃)ကလီၢ်ဘျဲၣ်ဒီး (ICE)ကသံၣ် မူၤဘှီး(၁,၀၂၅)ကံလိ အဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဃုၥ်ဝဲန့ၣ်လီၤ.
ဒ်န့ၣ်အသိးပှၤလၢအစိၥ်ဝဲကသံၣ်မူၤဘှီးသ့ၣ်တဖၣ်အံၤစ့ၢ်ကီး ဒ်ခ့ၣ်အဲၣ်ယူၣ်အတၢ်သိၣ်တၢ်သီတၢ်ဘျၢအိၣ်အသိး တၢ်ကဟံဝဲ ဂ့ၢ်ဝီတုၤလီၤ တီၤလီၤအဂ့ၢ်န့ၣ် ခ့ၣ်အဲၣ်ယူၣ် စံးစ့ၢ်ကီးဝဲန့ၣ်လီၤ.
ဟီၣ်ကဝီၤအပူၤဒ်သိးကသံၣ်မူၤဘှီး ကဆံးလီၤစှၤလီၤဒီးကလီၤမၢ်ကွံၥ်အဂီၢ်န့ၣ် ဘၣ်ဃးတၢ်ဒွဲၣ်အူအီၣ်မၤဟးဂီၤကသံၣ်မူၤဘှီး တၢ်ရဲၣ်တၢ်ကျဲၤ အံၤန့ၣ် ခ့ၣ်အဲၣ်ယူၣ် တီအူကီၢ်ရ့ၣ်အမဲၥ်ညါ ကီၢ်ရ့ၣ်/သုးက့ဘၣ်ထွဲလၢအဂၤသ့ၣ်တဖၣ်စ့ၢ်ကီး ခ့ၣ်အဲၣ်ယူၣ်ဒီး (KNPF) ပၥ်ဖှိၣ်ထီၣ်သး ဒွဲၣ်အူမၤဟးဂီၤကွံၥ်ဝဲ ကသံၣ်မူၤဘှီဒ်အံၤအိၣ်စ့ၢ်ကီးဝဲန့ၣ်လီၤ.
အဘူးကတၢၢ်ဖဲအပူၤကွံၥ်လါမ့ၤ ၇ သီအနံၤန့ၣ် လၢမုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤအပူၤ ကသံၣ်မူၤဘှီးအဖျၢၣ် (၉)ကကွဲၢ် ဘျဲၣ် လၢတၢ်ဖီၣ်န့ၢ်ဝဲအံၤတဖၣ် ခ့ၣ်အဲၣ်ယူၣ်ဒီး(KNPF)တီခိၣ်ရိၣ်မဲ ဒွဲၣ်အူမၤဟးဂီၤကွံၥ်ဒံးဝဲန့ၣ်လီၤ.
ဒ်န့ၣ်အသိးလၢဖၣ်အၣ်ကီၢ်ရ့ၣ်(သုးက့ ၇)ဟီၣ်ကဝီၤအပူၤစ့ၢ်ကီး အပူၤကွံၥ်(၂၀၂၅)နံၣ်အတီၢ်ပူၤအခါန့ၣ် ကသံၣ်မူၤဘှီး အဖျၢၣ်(၆)ကကွဲၢ်ဘျဲၣ်လၢတၢ်ဖီၣ်န့ၢ်ဝဲအံၤတဖၣ် တၢ်ဒွဲၣ်အူအီၣ်မၤဟးဂီၤကွံၥ်ဝဲဒံးန့ၣ်လီၤ.
ခ့ၣ်အဲၣ်ယူၣ်တၢ်ပၢဟီၣ်ကဝီၤအပူၤ လီၤဆီဒၣ်တၢ်သုးဟံန့ၢ်တၢ်စိတၢ်ကမီၤဝံၤလီၢ်ခံ (သုးက့ ၆),(သုးက့ ၇)လၢအိၣ်ဘူးဝဲဒီး ကီၢ်ကၠီၣ်တဲၣ်ထံဆၢကီၢ်ဆၢ လၢအအိၣ်ဃါဃုၥ်ဝဲဒီး သုးကရူၢ်စုတီၤဖီလၥ်ကညီဖီၣ်စုကဝဲၤကရူၢ်ကရၢအံၤန့ၣ် ကသံၣ်မူၤဘှီးရၤ လီၤအါထီၣ်ဝဲဒိၣ်ဒိၣ်မုၢ်မုၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဆၣ်အပူၤကွံၥ်တၢ်လီၢ်သုးက့အဂၤလၢ ပှၤသူကသံၣ်မူၤဘှီးအိၣ်တအါဘၣ်အလီၢ်အံၤန့ၣ် လီၢ်ခံအံၤစ့ၢ်ကီး တၢ်စိၥ်နုၥ်လီၤဝဲ ကသံၣ်မူၤဘှီးဒီးသူၣ်ဘီၣ်သးစၢ်တဖၣ်စ့ၢ်ကီးသူဝဲကသံၣ် မူၤဘှီးဟဲအါထီၣ်ဝဲဖျိဖျိဖျါဖျါအဂ့ၢ်န့ၣ် ခ့ၣ်အဲၣ်ယူၣ်ကိးဘ့ၣ်ဒဲးစုၥ်စုၥ် ဘၣ်ထွဲ မၤဘၣ်မူဘၣ်ဒါတဖၣ်စံးဝဲအသိး သ့ၣ်ညါဘၣ်န့ၣ်လီၤ.
