လါယူၤလံ, ၂၈သီ, ၂၀၂၆နံၣ် ခ့ၣ်အဲးစံၣ်
ကညီကီၢ်စဲၣ် ဖၣ်အၣ်ဝ့ၢ်ကျဲးဟးထီၣ် အ့ရှၢၣ်ကျဲမုၢ်ဖးဒိၣ်လၢအိၣ်ဒီး လီၢ်ကဝီၤတၢ်သမံသမိးတြဲၤတဖၣ်အံၤ ဖဲလါယူၤလံအတီၢ်ပူၤအံၤ ပှၤသူၣ်ဘီၣ်သးစၢ်လဲၤတၢ်က့ၤတၢ်လၢ အတမ့ၢ်လီၢ်ကဝီၤဖဲန့ၣ်သ့ၣ်တဖၣ် သုးကရူၢ်ဒီးပၢၤကီၢ်တဖၣ် ဖီၣ်န့ၢ်ဆူၣ်အိၣ်တလီၢ်လီၢ် အဂ့ၢ်န့ၣ် သ့ၣ်ညါဘၣ်ဒ်လီၢ်ကဝီၤဖိတဖၣ်စံးဝဲဒၣ်အသိးန့ၣ်လီၤ.
ဒ်လီၢ်ကဝီၤဖိတဖၣ်စံးဝဲအသိး သုးကရူၢ်တဖၣ် ပညိၣ်ဒီးဖီၣ်ဝဲသးစၢ်ပိၥ်ခွါတဖၣ်လၢ အတစိၥ်ဝဲ ကညီကီၢ်စဲၣ် ခိၣ်ဂီၤတဖၣ်န့ၣ်လီၤ. ဖဲလါယူၤလံ, ၂၀သီအနံၤန့ၣ် တၢ်သမံသမိးတြဲၤတခါလၢ တချုးတုၤ(လိၤညၣ်)သဝီအံၤ (Van) သိလ့ၣ်လၢ တီဆှၢဝဲပှၤလဲၤတၢ်က့ၤတၢ်ဖိတခိၣ်အပူၤ တၢ်ဖီၣ်ပှၤသးစၢ်တစှၤန့ၢ်အဂၤ (၁၀) အဂ့ၢ်န့ၣ် လီၢ်ကဝီၤဖိလၢထံၣ်ဝဲတဖၣ်ဒီး ပှၤလဲၤတၢ်က့ၤတၢ်တနီၤစံးဝဲဒၣ်န့ၣ်လီၤ.
ဒ်န့ၣ်အသိး လၢ ဖၣ်အၣ် ဆူၥ်ရၤမတံ ကျဲ ကၠီၣ်သဝီ, ဝ့ၣ်စ့ၣ်, ဒီၣ်လါ, နဘူကျဲသဝီကျဲခိၣ်ထိး တၢ်လီၢ်တတီၤအပူၤ သုးကရူၢ်လၢအိၣ်ခိးတၢ်ဖဲန့ၣ်တဖၣ် သမံသမိးဖီၣ်ဝဲပှၤသးစၢ်အိၣ်ဝဲတလီၢ်လီၢ်ဒီး ဖဲလါယူၤလံ, ၂၃သီအနံၤန့ၣ် ဖီၣ်ပှၤသးစၢ်(ပီၤတၤ) တစှၤန့ၢ် (၃) ဂၤအိၣ်ဝဲအဂ့ၢ်လီၢ်ကဝီၤတဖၣ်စံးဝဲန့ၣ်လီၤ.
တကီၢ်ခါခဲအံၤ ပှၤလဲၤတၢ်က့ၤတၢ်ဖိ လီၤဆီဒၣ်တၢ်ပှၤသးစၢ်သ့ၣ်တဖၣ် တၢ်ဖီၣ်အီၤအိၣ်ထီၣ်ဒံးဝဲဒၣ်န့ၣ်လီၤ. လၢတၢ်န့ၣ်အဃိ ဖဲဟးထီၣ်က့ၤလီၤအဆၢကတီၢ် ကအိၣ်ဒီးတၢ်ပလီၢ်ပဒီအဂီၢ် ဖၣ်အၣ်ကီၢ်ရ့ၣ် ဒူသဝီခိၣ်နၢ်တဖၣ် ဟ့ၣ်ပလီၢ်ဝဲအိၣ်အသိး, လီၢ်ကဝီၤကမျၢၢ်ဒီး လီၢ်ယံၤပှၤလဲၤတၢ်က့ၤတၢ်တဖၣ်အဘၢၣ်စၢၤ တၢ်ဘၣ်ယိၣ်ဘၣ်ဘှီအိၣ်ဝဲလၢ တၢ်ကမၢန့ၢ်ဆူၣ်ကဲသုးအဂ့ၢ် သ့ၣ်ညါဘၣ်န့ၣ်လီၤ.
ဒ်န့ၣ်အသိး ဖဲအပူၤကွံၥ် လါယူၤအတီၢ်ပူၤစ့ၢ်ကီး ဖၣ်အၣ်, ကီးတရံး, ရၤမတံဒီး အ့ရှၢၣ်ကျဲမုၢ်ဖးဒိၣ်လၢ တကီၢ်ခါခဲအံၤသုးကရူၢ်ပၢအီၤအံၤ တၢ်သမံသမိးဒီး ဖီၣ်တၢ်တဖၣ်အိၣ်တ့ၢ်ဝဲဒ်အံၤအဃိ တၢ်ဘၣ်သူက့ၤလၢကစၢၢ်ခိၣ်ကျဲအိၣ်ဝဲအဂ့ၢ် ပှၤနီသိလ့ၣ်တနီၤစံးဝဲဒၣ်န့ၣ်လီၤ.