လါယူၤလံ ၇ သီ, ၂၀၂၆ နံၣ်, ခ့ၣ်အဲးစံၣ်
ဒူသထူၣ်ကီၢ်ရ့ၣ်(သုးက့ ၁)သထူၣ်ဝ့ၢ်ဃၢၤ ၀့စ့ၤ(ဝင်းစိန်)သဝီ စွ့ၤညီၤပ့ၤ(ရွှေညောင်ပင်)ကမျၢၢ်(၈)ဂၤလၢ ပယီၤသုးဖီၣ်က့ၤကိးဝဲဒၣ် အံၤအကျါ ၄ ဂၤန့ၣ် ဖဲလါယူၤ ၂၈ အနံၤ တၢ်ပျၢ်လီၤကဒါဝဲလံဘၣ်ဆၣ် မ့မ့ၢ်ပှၤသးစၢ်လၢအသးနံၣ်အိၣ် (၂၀)ဘျဲၣ်သ့ၣ်တဖၣ်အံၤ ခီန့ၣ် တၢ်တပျၢ်လီၤဝဲဒံးဝဲဘၣ်အဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်ပှၤဘၣ်မူ ဘၣ်ဒါ အအိၣ်န့ၣ်လီၤ.
ဖဲအပူၤကွံၥ်လါယူၤ ၂၃ သီအနံၤ ပယီၤသုးနုၥ်လီၤဝဲလၢသဝီတဖၣ်အံၤအပူၤဝံၤ ဖီၣ်က့ၤကိးဝဲကမျၢၢ်ပိၥ်ခွါလၢအပၣ်ဃုၥ်ဝဲဒီး သးစၢ်အံၤခဲလၢၥ်(၈)ဂၤ က့ၤကိးဝဲလၢသထူၣ်ဝ့ၢ်ပၢၤကီၢ်ဝဲၤလီၢ်တကးဒံးဘၣ်အမဲၥ်ညါ ပယီၤသုးအံၤဟံဃုၥ်ဝဲသဝီပူၤ ကမျၢၢ်အသိလ့ၣ်ယီၢ် ၅ ခိၣ်ဃုၥ်ဒီးထူ,စ့သ့ၣ်တဖၣ် န့ၣ်လီၤ.
ကမျၢၢ်တဖၣ်အံၤတၢ်ဖီၣ်ဒုးဃၥ်အီၤတၢ်ဆၢကတီၢ်ယံၤ(၅)သီဝံၤဖဲလါယူၤ ၂၈ သီအနံၤန့ၣ် တၢ်ပျၢ်လီၤက့ၤဝဲ(၄)ဂၤလံဘၣ်ဆၣ် မ့မ့ၢ်ပှၤသးစၢ်(၄)ဂၤခီန့ၣ် တၢ်ပျၢ်လီၤဝဲတအိၣ်ဒံးဘၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပှၤကတိၤတၢ်ပၢ ပဒိၣ်စီၤအ့နဲၤ စံးဝဲန့ၣ်လီၤ.
“ပှၤလၢအသးနံၣ်အါ(၄)ဂၤခီန့ၣ်တၢ်ပျၢ်လီၤက့ၤဝဲလံ. မ့မ့ၢ်လၢအသးနံၣ်အိၣ်(၂၀)ဘျဲၣ်တဖၣ်န့ၣ်ခီအတပျၢ်လီၤဝဲဒံးဘၣ်. ပှၤသ့ၣ် တဖၣ်အံၤမ့ၢ်ပှၤဘၣ်လဲၤရ့ထီၣ်အီၤဒီးစ့အိၣ်ဧါ/တအိၣ်ဧါန့ၣ်တဲလီၤတံၢ်တဘၣ်ဒံးဘၣ်,ပဃုသ့ၣ်ညါအဖၢမုၢ်လီၤ. ဘၣ်ဆၣ်မ့မ့ၢ်လၢ အသးနံၣ်စှၤ(၄)ဂၤအံၤပှၤနၢ်ဟူလၢအကဆှၢဝဲလၢသုးကျါဒ်န့ၣ်ဒုအိၣ်,ဘၣ်ဆၣ်မၤလီၤတံၢ်တန့ၢ် စ့ၢ်ကီးဘၣ်ဘၣ်ဃးတၢ်ဂ့ၢ်တခါအံၤ ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ
တကီၢ်ခါခဲအံၤလီၢ်ကဝီၤကမျၢၢ်သးစၢ်လၢတၢ်ဖီၣ်တ့ၢ်ဃၥ်ဝဲသ့ၣ်တဖၣ်အံၤန့ၣ်မ့ၢ်ဝဲ စီၤဆၣ်ထူ(၂၅)နံၣ်, ကၠီၤစ့ၤအီၤ(၂၅)နံၣ်, စီၤမၠ့ၣ်အ့(၂၆)နံၣ်ဃုၥ်ဒီးသးစၢ်လၢအဂၤဒီး ပှၤသ့ၣ်တဖၣ်အံၤဒ်တၢ်ကစီၣ်ဟးထီၣ်ဟးထီၣ်အသိးပယီၤသုးအံၤဆှၢဝဲလၢသုးကျါသ့ အဃိ အဟံၣ်ဖိဃီဖိတဖၣ်ကိၢ်သူၣ်ကိၢ်သးတၢ်လၢအဝဲသ့ၣ်အဂီၢ်န့ၣ်လီၤ.
ဘၣ်ဆၣ်ဘၣ်ဃးပှၤသးစၢ်(၄)ဂၤလၢတၢ်ဖီၣ်ဃၥ်ဒံးဝဲတဖၣ်အံၤ တုၤလၢမဟါလါယူၤလံ ၆ သီအံၤမ့ၢ်ဆှၢအီၤဆူသုးလီၢ်လံဧါ မ့တမ့ၢ် တၢ်ပျၢ်လီၤက့ၤဝဲလံဧါ/တပျၢ်လီၤဒံးဝဲဘၣ်ခီန့ၣ် ပခ့ၣ်အဲးစံၣ်-ကညီတၢ်ကစီၣ်ဃုသ့ၣ်ညါမၤလီၤတံၢ်တၢ်အိၣ်သး အဖၢမုၢ် န့ၣ်လီၤ.
ခ့ၣ်အဲၣ်ယူၣ်(သုးက့ ၁)တၢ်ပၢဟီၣ်ကဝီၤ သထူၣ်,ဘံလ့ဒီးကၠဲးထိၣ်ကီၢ်ဆၣ်အပူၤ ဒူသဝီလၢအိၣ်ဘူးဝ့ၢ်ခိၣ်ဝ့ၢ်ဃၢၤ ကျဲမုၢ်ဖးဒိၣ် အကပိၤကပၤတဖၣ် ညီနုၢ်န့ၣ်ပယီၤနုၥ်လီၤဖီၣ်ဝဲသူၣ်ဘီၣ်သးစၢ်ဃုၥ်ဒီးကမျၢၢ် ဃ့အီၣ်ဝဲစ့လၢကျဲအဘိဘိကဲထီၣ်အိၣ်ဝဲတလီၢ်လီၢ် အသိး တနီၤန့ၣ်ဆှၢထီၣ်ဝဲဆူသုး တၢ်သိၣ်လိလီၢ်ဒုးထီၣ်ဝဲတၢ်မၤလိဝံၤဆှၢထီၣ်ဝဲဆူတၢ်မဲၥ်ညါတၢ်ဒုးဆူၣ်အလီၢ်န့ၣ်လီၤ.