လါယူၤလံ ၇သီ, ၂၀၂၆နံၣ်, ခ့ၣ်အဲးစံၣ်.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ဒူပျၥ်ယၥ်ကီၢ်ရ့ၣ်,ကီးတရံးကီၢ်ဆၣ်ရၤမတံဝ့ၢ်ကလံၤထံး နိၣ်ဖိ,ထံမူထၣ်သဝီဟီၣ်ကဝီၤတၢ်လီၢ်တၢ်ကျဲတဖၣ်အံၤပယီၤသုးကရူၢ်ဒီးသုးခိးကီၢ်ဆၢ(BGF)ဒိၣ်စိက့ၤဝဲန့ၢ်ဝံၤအလီၢ်ခံ,တ့ထီၣ်ဘှီထီၣ်ဝဲတၢ်ဟးကသုၣ်ကသီလီၢ်အဂ့ၢ်,ရၤမတံဂံၢ်ခီၣ်ထံးတၢ်ကစီၣ်သန့တဖၣ်ပၥ်ဖျါထီၣ်ဝဲဒၣ်န့ၣ်လီၤ.
တၢ်ဟးကသုၣ်ကသီလီၢ်အံၤတၢ်ကိးဝဲဒၣ်လၢ(ကွ့ကလ့ခၠီသၤ)ဒီးဘၣ်တၢ်တီခိၣ်ရိၣ်မဲအီၤလၢသုးခိးကီၢ်ဆၢ(BGF)သုးဟီၣ်ကဝီၤနီၣ်ဂံၢ်(၄) သုးဟီၣ်ကဝီၤခိၣ်သုးခိၣ်ကျၢၢ်ဖိမီၢ်သိး ဒီးစးထီၣ်မၤဝဲဖဲအပူၤကွံၥ်လါယူၤအတီၢ်ပူၤအဂ့ၢ် သ့ၣ်ညါဘၣ်န့ၣ်လီၤ.
တၢ်အိးထီၣ်တၢ်ဟးကသုၣ်ကသီလီၢ်အဖီခိၣ်နိၣ်ဖိလီၢ်ကဝီၤကမျၢၢ်တဂၤစံးဝဲဒၣ်လၢ“တၢ်ဟးကသုၣ်ကသီလီၢ်ထံကျိတဘိအံၤအိၣ်ဝဲဒၣ်ဖဲတၢ်လဲၤဆူနိၣ်ဖိ-ထံမူထၣ်သဝီကျဲန့ၣ်လီၤ.အကပိၥ်ကပၤအိၣ်ဒီးစံၥ်လီၢ်ခီးလီၢ်,နီၣ်လါဟ့အဃိပှၤဟးကသုၣ်ဒိတၢ်ဂီၤသ့အသိး,အိၣ်ဒီးကျးတဖၣ်အါအါဂီၢ်ဂီၢ်အဖီခိၣ်ပှၤလဲၤဟးဒီးလဲၤအီၣ်လဲၤအီတၢ်ဖဲန့ၣ်သ့ဝဲန့ၣ်လီၤ.”အဂ့ၢ်စံးဝဲန့ၣ်လီၤ.
ဒ်သိးတၢ်ဟးကသုၣ်ကသီအလီၢ်အံၤကပူၤဖျဲးဒီးတၢ်တဂ့ၤတဘၣ် သ့ၣ်တဖၣ်အဂီၢ်အပူၤကွံၥ်လါယူၤလံ(၂)သီအနံၤန့ၣ် သုးခိၣ်မီၢ်သိးတီခိၣ်ရိၣ်မဲမၤဝဲတၢ်ဘူၣ်တၢ်ဘါအတၢ်ရဲၣ်တၢ်ကျဲၤတခါဒီးတၢ်ရဲၣ်တၢ်ကျဲၤဝဲန့ၣ်အပူၤသုးကရူၢ် ခီၣ်သုးရ့ၣ်(ခလရ-၂၇၅)သီခါဖးဒိၣ်ဃုၥ်ဒီးရၤမတံဝ့ၢ်ပူၤသီခါဖးဒိၣ်လၢအဂၤတဖၣ်ပၣ်ဃုၥ်ပၣ်ဂီၢ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ.
တကတီၢ်ဃီ,တၢ်ဟးကသုၣ်ကသီအလီၢ်ဟီၣ်ကဝီၤအပူၤကအိၣ်ဒီးတၢ်ကဆှဲကဆှီအဂီၢ်မၤဝဲတၢ်ဘိးဘၣ်သ့ၣ်ညါတၢ်ဟူးတၢ်ဂဲၤပၥ်ဖျါထီၣ်ဝဲဒၣ်လၢစိၤရှၢၣ်မံၣ်ဒံၣ်ယၢၣ်အပူၤအိၣ်ဝဲအသိး,တၢ်လီၢ်အံၤကဃံလၤဂ့ၤထီၣ်အဂီၢ်ဆဲးမၤဝဲတၢ်တ့ထီၣ်ဘှီထီၣ်တၢ်ဖံးတၢ်မၤရုၢ်ရုၢ်အဂ့ၢ်သ့ၣ်ညါဘၣ်န့ၣ်လီၤ.
ပယီၤသုးကရူၢ်အံၤလၢသုးခိးကီၢ်ဆၢ(BGF)အမၤစၢၤတဆီဒိၣ်စိက့ၤဝဲရၤမတံဝ့ၢ်ကလံၤထံးဒူသဝီဒ်အမ့ၢ် နိၣ်ဖိ,ထံမူထၣ်,မဲၢ်ကနဲသ့ၣ်တဖၣ်န့ၢ်ဝံၤအလီၢ်ခံ,အပူၤကွံၥ်လါမ့ၤအပူၤမၢဝဲတၢ်ကိးက့ၤနိၣ်ဖိ,ထံမူထၣ်,မဲၢ်ကနဲသဝီလီၢ်ကဝီၤဖိတဖၣ်လၢကက့ၤအိၣ်ဆိးလၢဒူသဝီပူၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒီးခီဖျိလၢကညီဖီၣ်စုကဝဲၤသုးခိးကီၢ်ဆၢ(BGF)တၢ်အုၣ်ကီၤအဃိ,လီၢ်ကဝီၤဖိတနီၤက့ၤအိၣ်ဆိးဝဲလၢအနီၢ်ကစၢ်ဟံၣ်ဃီတၢ်လီၢ်တၢ်ကျဲအိၣ်ဝဲဘၣ်ဆၣ်တနီၤန့ၣ် အိၣ်ကဒုဝဲတၢ်လီၢ်အဂၤအိၣ်အဖၢမုၢ်အဂ့ၢ်,သ့ၣ်ညါဘၣ်န့ၣ်လီၤ.
နိၣ်ဖိထံမူထၣ်သဝီအံၤပယီၤသုးဟံးန့ၢ်တၢ်လီၢ်အိၣ်ဆီလီၤသးလၢတၢ်လီၢ်ဒ်အမ့ၢ်သဝီခိၣ်ထိး,ကျဲဖးဒ့,ကျဲတြၢ်ပူၤသ့ၣ်တဖၣ်ဒီးကမျၢၢ်လီၢ်ကဝီၤဖိလၢက့ၤအိၣ်ဆိးတဖၣ်ကဟးထီၣ်က့ၤလီၤဖံးတၢ်မၤတၢ်အဂီၢ်အိၣ်ဝဲဒၣ်ဒီးသုးကရူၢ်အတၢ်ပၥ်ပနီၣ်တၢ်ဆၢကတီၢ်လၢအဝဲသ့ၣ်ဂီၢ်အသိးကွၢ်ဟုၣ်ကွၢ်စုၣ်ဝဲလီၢ်ကဝီၤဖိအတၢ်ဟူးတၢ်ဂဲၤအိၣ်ဝဲတပယူၥ်ဃီအဂ့ၢ်,လီၢ်ကဝီၤဖိလၢအိၣ်ဃ့ၢ်အိၣ်ကဒုတဖၣ်စံးဘၣ်တ့ၢ်ဝဲ ခ့ၣ်အဲးစံၣ်-ကညီတၢ်ကစီၣ် ဖဲလါယူၤအတီၢ်ပူၤအိၣ်ဝဲန့ၣ်လီၤ.
တကပၤန့ၣ်,လၢရၤမတံဝ့ၢ်ကလံၤထံး ဖလူ-မ့လဲၣ်ပၤ,လ့က့ၣ်ကိၥ်ဟီၣ်ကဝီၤတပၤ သုးကရူၢ်ဒီး KNLA တၢ်ပၢၢ်ဆၢသုးပၥ်ဖှိၣ်အဘၢၣ်စၢၤတၢ်ဒုးကဲထီၣ်ဝဲဒၣ်ကိးနံၤဒဲးဃၣ်ဃၣ်အသိး တကီၢ်ခါခဲအံၤသုးကရူၢ်မၤအါထီၣ်ဂံၢ်ဘါပှၤနီၣ်ဂံၢ်လၢအကထိအဂ့ၢ်,လီၢ်ကဝီၤတၢ်ကစီၣ်သန့တဖၣ်ပၥ်ဖျါဝဲန့ၣ်လီၤ.
