လါယူၤလံ ၇ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် (သုးက့ ၁)သထူၣ်ကီၢ်ဆၣ် ကၠဲးကၠံၣ်ခးတၢ်ဒုးအပူၤ ပယီၤသုး အသုးရ့ၣ်ခိၣ်,သုးဒ့ခိၣ် ဃုၥ်ဒီးသုးဖိ သံၣ်ဖိလၢအဂၤဘၣ်ဒိဘၣ်ထံးဝဲအါးမးအဂ့ၢ်န့ၣ် သ့ၣ်ညါဘၣ်လၢ ဟီၣ်ကဝီၤ(KNLA) ပှၤဘၣ်မူဘၣ်ဒါအအိၣ်န့ၣ်လီၤ.
စးထီၣ်ဖဲလါယူၤထီၣ် ၅ သီအနံၤန့ၣ် ပယီၤသုးဂံၢ်ဘါအဂၤ(၂၀၀)ဘျဲၣ်နုၥ်လီၤဝဲဒၣ်လၢသထူၣ်ကီၢ်ဆၣ် ဒီၣ်ယၣ်ကရူၢ် ကၠဲးကၠံၣ်ခး ဒီးကၠဲးတူၢ်ကိသဝီသ့ၣ်တဖၣ်အံၤအပူၤ တၢ်ဒုးကဲထီၣ်ဝဲဒီးဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်-၂ အပှၤ ဒိၣ်ဒိၣ်မုၢ်မုၢ် န့ၣ်လီၤ.
လၢတၢ်ဒုးကဲထီၣ်ဘျီဝဲန့ၣ်အခါခီဖျိတၢ်ဘၣ်ပယီၤသုးတကပၤနးအဃိ အဝဲသ့ၣ်ဘၣ်ဂုၤကဒါလီၢ်ခံသတူၢ်ကလၥ်အဃိ ပယီၤသုး အသိလ့ၣ်အိၣ်တ့ၢ်ဝဲ(၃)ခိၣ်ဒီး ခဲအံၤအိၣ်ဝဲလၢတၢ်ပၢၢ်ဆၢသုးကရူၢ်အစုပူၤလံအဂ့ၢ်န့ၣ် သ့ၣ်ညါဘၣ်န့ၣ်လီၤ.
တၢ်ကဲထီၣ်သးဖဲန့ၣ်ဝံၤမုၢ်ဆ့ၣ်ထီၣ်ဖဲမဟါလါယူၤ ၆ သီဂီၤခီအဆၢကတီၢ်န့ၣ် ပယီၤသုးသ့ၣ်တဖၣ်အံၤဟဲထီၣ်ကဒီးအသီတဘျီ အဃိ တၢ်ဒုးကဲထီၣ်ကဒီးဝဲဒိၣ်ဒိၣ်မုၢ်မုၢ်ဖဲသဝီ(၂)ဖျၢၣ်အံၤအခိၣ်အဃၢၤဒီး လၢတၢ်ဒုးဘျီဝဲအံၤအပူၤ ပယီၤသုးတကပၤ သုးရ့ၣ်ခိၣ်, သုးဒ့ခိၣ်ဃုၥ်ဒီး သုးဖိသံၣ်ဖိသံဘၣ်ဒိဘၣ်ထံးအနီၣ်ဂံၢ်အါဘၣ်ဟဲအိၣ်ထီၣ်ဝဲဒ်န့ၣ်လီၤ.
ဘၣ်ဃးဒီးပယီၤသုးသံဘၣ်ဒိဘၣ်ထံးတၢ်အိၣ်သးအံၤန့ၣ် (KNLA)ပှၤဘၣ်မူဘၣ်ဒါလၢသ့ၣ်ညါထွဲတၢ်အိၣ်သးတဂၤစံးဝဲ လၢ “လၢပဝဲဒၣ် တကပၤဒုတၢ်ဘၣ်ဒိဘၣ်ထံးတအိၣ်ဘၣ်. ဘၣ်ဆၣ်မ့မ့ၢ်လၢပယီၤသုးတကပၤန့ၣ် သုးဒ့ခိၣ်သံ(၂)ဂၤဒီး သုးရ့ၣ်ခိၣ် ဒီးသုးဒ့ခိၣ်-၂ န့ၣ်ဘၣ်ဒိဘၣ်ထံး.မ့ဝံၤအပှၤလၢအဂၤနါက့သံဘၣ်ဒိဘၣ်ထံးအိၣ်မီၤ.ဒ်သိးပှၤဟ့ၣ်ပှၤတၢ်ကစီၣ် အသိး န့ၣ်ပှၤ ထံၣ်လၢအဝဲသ့ၣ် က့ၤလီၤစိၥ်ပှၤသံစိၣ်ဒီးပှၤလၢအဘၣ်ဒိဘၣ်ထံးန့ၣ်ကအိၣ်လၢကါ(၃)ခိၣ်ညါ”အဂ့ၢ်န့ၣ် စံးဝဲန့ၣ်လီၤ.
ဘၣ်ဃးပယီၤသုးသံဘၣ်ဒိဘၣ်ထံးအနီၣ်ဂံၢ်နီၣ်ဒွးတၢ်အိၣ်သးအံၤန့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံးဝဲမ့အိၣ်ဘၣ်ဆၣ် ဒ်သိးကသ့ၣ်ညါဘၣ်တၢ်ဂ့ၢ်လီၤတံၢ်လီၤဆဲးအဂီၢ်န့ၣ် ပခ့ၣ်အဲးစံၣ်-ကညီတၢ်ကစီၣ်ပၥ်ဂၢၢ်ပၥ်ကျၢၤအီၤလီၤလီၤဆီဆီ တန့ၢ်ဝဲဒံး ဘၣ်န့ၣ်လီၤ.
ပယီၤသုးသ့ၣ်တဖၣ်အံၤဖဲမဟါအနံၤတၢ်ဒုးကဲထီၣ်ဝံၤက့ၤဂုၤကဒါလီၢ်ခံလံဒီး တုၤလၢတနံၤအံၤ ၇ သီတစု ဟဲထီၣ်ကဒါဝဲ တအိၣ်ဒံးဘၣ် ဘၣ်ဆၣ်ပယီၤသုးအံၤတၢ်ရဲၣ်တၢ်ကျဲၤလၢကဟဲထီၣ်ဒိၣ်စိက့ၤဝဲဟီၣ်ကဝီၤလၢတၢ်ပၢၢ်ဆၢသုးကရူၢ် ဟူးဂဲၤဝဲအလီၢ်အံၤ အဂ့ၢ်န့ၣ် တၢ်ပဲၥ်ထံနီၤဖးစံးစ့ၢ်ကီးဝဲအိၣ်န့ၣ်လီၤ.
ဒ်န့ၣ်အသိးဟီၣ်ကဝီၤတၢ်လီၢ်လၢပယီၤသုးကျိၤဟဲထီၣ်ဟူးဂဲၤဝဲခဲအံၤမ့ၢ်ဝဲ(သုးက့ ၁) KNLA သုးရ့ၣ်-၂ တၢ်ပၢဟီၣ်ကဝီၤပူၤဒီး ဟီၣ်ကဝီၤအံၤ တၢ်ဖိတၢ်လံၤလၢအိၣ်ဟဲက့ၤလီၤကၠီၣ်တဲၣ်တကပၤတဖၣ်လၢကက့ၤဆူလၥ်ခီတကပၤအဂီၢ် တၢ်စိၥ်ထီၣ်စိၥ်လီၤ သူဝဲဒၣ်ဟီၣ်ကဝီၤကျဲအံၤလီၤအဂ့ၢ်န့ၣ် လီၢ်ကဝီၤကမျၢၢ်စံးဝဲအသိး သ့ၣ်ညါဘၣ်န့ၣ်လီၤ.
ကၠဲးကၠံၣ်ခးဒီးကၠဲးတူၢ်ကိသဝီတၢ်ဒုး(၂)သီအတီၢ်ပူၤ သဝီ(၂)ဖျၢၣ်အံၤဃုၥ်ဒီးကမျၢၢ်လၢအိၣ်ဘူးဖဲန့ၣ်တဖၣ် ဃ့ၢ်ထီၣ်ဝဲဒီး ခဲအံၤပယီၤသုးမ့ဂုၤကဒါလီၢ်ခံလံဘၣ်ဆၣ် တၢ်ရဲၣ်တၢ်ကျဲၤအိၣ်လၢကဟဲထီၣ်ကဒါဝဲအိၣ်အဃိ ကမျၢၢ်လၢဃ့ၢ်ထီၣ်တဖၣ် က့ၤဟံၣ်တဘူၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.