(သုးက့ ၅)ဟီၣ်ကဝီၤလါယူၤတလါအတီၢ်ပူၤ တၢ်ဒုးကဲထီၣ်(၇၆)ဘျီ, ပယီၤသုးသံဘၣ်ဒိဘၣ်ထံး(၇၀)ဘျဲၣ်

လါယူၤလံ ၉ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)တၢ်ပၢဟီၣ်ကဝီၤ တလါအတီၢ်ပူၤ ပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ်ဖျဲး သုးမုၢ်ဒိၣ် (KNLA)သုးပၥ်ဖှိၣ်အဘၢၣ်စၢၤ တၢ်ဒုးဖိ,တၢ်ဒုးဖးဒိၣ်ကဲထီၣ်ဝဲ(၇၆)ဘျီဒီး ပယီၤသုးတကပၤသံဘၣ်ဒိဘၣ်ထံးဝဲအဂၤ (၇၀)ဘျဲၣ် အဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲအသိး သ့ၣ်ညါဘၣ်န့ၣ်လီၤ.

မုၢ်တြီၢ်ကီၢ်ရ့ၣ်ဟီၣ်ကဝီၤပူၤ အပူၤကွံၥ်လါယူၤထီၣ် ၁ သီ တုၤ ၃၀ သီ တၢ်ဒုးကဲထီၣ်အဘျီ(၇၀)ဘျဲၣ်အတီၢ်ပူၤအံၤန့ၣ် ပယီၤသုးတကပၤ သံဝဲ(၂၃)ဂၤဒီး ဘၣ်ဒိဘၣ်ထံးဝဲ(၅၄)ဂၤန့ၣ်လီၤ.

တကးဒံးဘၣ်ပယီၤသုးအံၤခီဖျိသဂၢၢ်ဘၣ်ဝဲတၢ်သံတၢ်ဘၣ်ဒိဘၣ်ထံးအါအဃိ သူဝဲ(jet fighter)ကဘီယူၤဟဲခးလီၤတၢ်အိၣ်ဝဲ (၁၅)ဘျီ, ခးလီၤဝဲကျိဖးဒိၣ်(၆)ဘျီ ဒီး တ့ၢ်လီၤစ့ၢ်ကီးဝဲဒြိမ့ၣ်ပိၢ်(၁၄)ဘျီ အဂ့ၢ်န့ၣ် လံၥ်တၢ်ပၥ်ဖျါအပူၤစံးဝဲန့ၣ်လီၤ.

ဒီးလၢပယီၤသုးအတၢ်ဟူးတၢ်ဂဲၤသ့ၣ်တဖၣ်အံၤအဃိ ကမျၢၢ်သံ(၂)ဂၤ,ဘၣ်ဒိ(၃)ဂၤတကးဒံးဘၣ်အမဲၥ်ညါ ဟံၣ်ဟးဂီၤဝဲ(၁၂) ဖျၢၣ် အသိး သီခါဖၠၣ်တၢ်သူၣ်ထီၣ်စ့ၢ်ကီးဟးဂီၤဝဲ(၉)ဖျၢၣ်န့ၣ်လီၤ.

(သုးက့ ၅)ဟီၣ်ကဝီၤအံၤ စးထီၣ်ဖဲအပူၤကွံၥ်လါမ့ၤထီၣ်အခါလၢကလဲၤထီၣ်ဒိၣ်စိဟီၣ်ကဝီၤဒီးမၤအါထီၣ်သုးဂံၢ်ဘါ အဂီၢ် သုးနီၣ်ဂံၢ် (၂၀၀၀)ဃၣ်ဃၣ်ဟဲထီၣ်ဟူးဂဲၤဝဲဒီး တုၤလၢခဲအံၤစ့ၢ်ကီးဒုးယၤတၢ်သဘံၣ်သဘုၣ်ဆဲးကဲထီၣ်ဝဲအဖၢမုၢ်အသိး ကျိဖးဒိၣ်,ဒြိ အမဲၥ်ညါ လၢကဘီယူၤအံၤတဆီဟဲခးလီၤဝဲတၢ်ဟဲအါထီၣ်ကွ့ၢ်ကွ့ၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

လၢတၢ်န့ၣ်အဃိဖဲတနံၤအံၤလါယူၤလံ ၉ သီ ဂီၤခီ ၇း၀၀ နၣ်ရံၣ်ဘျဲၣ်အဆၢကတီၢ်န့ၣ်စ့ၢ်ကီး ဒွဲၣ်လိကီၢ်ဆၣ် ကတၢၢ်တံၥ်ကရူၢ် လၢပယီၤသုးဟူးဂဲၤဝဲအပူၤခဲအံၤန့ၣ် ပယီၤသုး(Y-12)ကဘီယူၤလဲၤတ့ၢ်လီၤဝဲမ့ၣ်ပိၢ်(၂၈)ဖျၢၣ်ညါန့ၣ်လီၤ .ဒီးလၢကဘီယူၤအတၢ် လဲၤ ခးလီၤတၢ်ဘျီဝဲအံၤကမျၢၢ်အကျီၢ်သံဝဲ(၈)ဒုတကးဒံးဘၣ် ဘၣ်ဟးဂီၤစ့ၢ်ကီးဝဲဟံၣ်တဖျၢၣ်အဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါ စံးဝဲအသိး သ့ၣ်ညါဘၣ်န့ၣ် လီၤ.

ဒ်န့ၣ်အသိးအပူၤကွံၥ်လါမ့ၤပယီၤသုးဟဲထီၣ်အခါကမၤမိၢ်-ကတၢတံၥ်ဘၢၣ်စၢၤ ကမျၢၢ်ပှၤနီၣ်ဂံၢ်လၢအကလးလၢအဃ့ၢ်ထီၣ်တ့ၢ် တဖၣ်တုၤလၢခဲအံၤက့ၤဟံၣ်က့ၤဃီတဘူၣ်ဒံးဘၣ်အမဲၥ်ညါ စးထီၣ်ဖဲပယီၤသုးဟဲထီၣ်ဟူးဂဲၤတုၤလၢကတၢတံၥ်ကရူၢ်အတီၢ်ပူၤန့ၣ် စ့ၢ်ကီး ကတၢၢ်တံၥ်ကရူၢ်ပူၤ ကဆီပူၤသဝီ,နိၣ်ဖီထံ,ဃီဝါထၣ်,တီသူကျါ,ဖါလိဖိ,ဖါလိဒိၣ်,ပိၤမးဟဲ,ထံသဲလ့,နိၣ်လါ,ထံဆီမဲ, ကဲဒီသဝီဃုၥ်ဒီး ထံသဘျုၣ်ထၣ်ကရူၢ်ပူၤ ဖှ့ထီၣ်ရူၢ်သဝီ,ကပံၥ်ခံသဝီသ့ၣ်တဖၣ်အံၤကမျၢၢ်ဘၣ်ဃ့ၢ်ထီၣ်စ့ၢ်ကီးဝဲအဂ့ၢ်န့ၣ် ပှၤဘၣ်မူဘၣ်ဒါ စံးဝဲန့ၣ်လီၤ.

တကီၢ်ခါခဲအံၤလၢကဆဲးလဲၤထီၣ်ဆူဖၣ်ပူၣ်အံၤအဂီၢ် ပယီၤသုးပၥ်ဖှိၣ်ဟဲထီၣ်ဟူးဂဲၤတုၤဝဲလၢကတၢတံၥ်ကရူၢ်ပူၤ တၢ်ဆၢကတီၢ် န့ၢ်ဝဲအသီ(၁၀)ဘျဲၣ်လံဘၣ်ဆၣ် ဆဲးထီၣ်ဆူညါတန့ၢ်အိၣ်ဒံးဝဲဖဲ ကတၢတံၥ်သဝီဆၢခိၣ် ဖယါကိ-တီသူကျါသဝီ အဘၢၣ်စၢၤဒီး တၢ်ဒုးဆဲးကဲထီၣ်ဒံးဝဲဒီးဟီၣ်ကဝီၤတၢ်ပၢၢ်ဆၢသုးကရူၢ်အဖၢမုၢ်အဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံးဝဲန့ၣ်လီၤ.