လါအီကူၥ် ၂၈သီ, ၂၀၂၆ နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်ပူၤ ကသူဝဲ တၢ်နီဟးထီၣ်ကွံၥ်ထံဂုၤကီၢ်ဂၤ တဖိးသဲစး ပှၤထံဂုၤကီၢ်ဂၤဖိတဖၣ် လၢထံလီၢ်ကီၢ်ပူၤ တၢ်ဘျၢသဲစးအဂီၢ်, ကၠီၣ်တဲၣ်ကိတိၥ်ကျၢၢ် ဆဲးလီၤဝဲစုမုၢ်ကျၢၢ်အဂ့ၢ် သ့ၣ်ညါဘၣ်န့ၣ်လီၤ.
တၢ်နီဟးထီၣ် တဖိးသဲစး ပှၤထံဂုၤကီၢ်ဂၤဖိတဖၣ် လၢထံလီၢ်ကီၢ်ပူၤ တၢ်ဘျၢသဲစးအံၤ အပူၤကွံၥ်လါယူၤ(၁၄)သီအပူၤ ကၠီၣ်တဲၣ်ပဒိၣ်ကရူၢ်(Cabinet)ပၥ်ဂၢၢ်ပၥ်ကျၢၤတ့ၢ်ဝဲဒီး, တလါအံၤလါအီကူၥ်(၂၆)သီအနံၤအပူၤ Anutin ဆဲးလီၤဝဲ စုမုၢ်ကျၢၢ် ဝံၤအလီၢ်ခံ, ပၢြပး ပဒိၣ်ပပှၢ်တဖၣ်ရၤလီၤဘိးဘၣ်ပၥ်ဖျါဝဲဖဲ လါအီကူၥ်(၂၇)သီအနံၤ အပူၤန့ၣ်လီၤ.
လၢတၢ်န့ၣ်အဃိ, ကိၥ်တိၥ်ခိၣ်ကျၢၢ်အတၢ်ဆဲးလီၤစုမုၢ်ကျၢၢ် တၢ်ဘျၢသဲစးအံၤ တနံၤအံၤ လါအီကူၥ်(၂၈)သီအနံၤအပူၤ ဖိးသဲစးဒီး တၢ်စိကမီၤ အိၣ်ထီၣ်ဝဲလံအဂ့ၢ်, တၢ်ရၤလီၤပၥ်ဖျါဝဲဒၣ်န့ၣ်လီၤ.
တၢ်ဘိးဘၣ်ရၤလီၤအဖီခိၣ်, ရခၢၣ်ပှၤဟူးဂဲၤလၢ ခီကီၢ်ပှၤမၤတၢ်ဖိဂ့ၢ်ဝီ ပှၤနဲၣ်တၢ် (နဲၤအီၣ်အီၣ်) စံးဝဲလၢ
“လၢပဝဲကီၢ်ပယီၤ ခီကီၢ်ပှၤမၤတၢ်ဖိတဖၣ်အဂီၢ် တၢ်ဘၣ်ယိၣ်အိၣ်ဒီဒူၣ်လီၤ.ဘၣ်မနုၤအဃိအိၣ်လဲၣ်န့ၣ် ပထံကီၢ်ပူၤ တၢ်အိၣ်သး တဒ်သိး ပှၤဂၤ ထံကီၢ်ဘၣ်.သဲစးတၢ်ဒိၣ်စိတအိၣ်ဘၣ်.သုးဟံးန့ၢ်တၢ်စိကမီၤအလီၢ်ခံန့ၣ် တၢ်သဘံၣ် ဘုၣ် အိၣ်ဒီဒူၣ်အဃိ ဆူမဲၥ်ညါ ယထံၣ်လၢ တၢ်အီၣ်ကဘျံးကဘျၣ်စ့မ့ၢ်ဂ့ၤတၢ်မၤပျံၤမၤဖုးတၢ်မ့ၢ်ဂ့ၤ ကအိၣ်အါထီၣ် န့ၢ်ဒံးအလီၢ်န့ၣ်လီၤ. ” အဂ့ၢ်စံး ဝဲန့ၣ်လီၤ.
တၢ်ဘျၢသဲစးအံၤ ပှၤထံဂုၤကီၢ်ဂၤဖိတဖၣ်အဂီၢ် တၢ်ပၥ်ပနီၣ်ဝဲ တၢ်ဂ့ၢ်ဃုထံၣ်လၢ အမ့ၢ် (၁)တၢ်နုၥ်လီၤအိၣ်ဆိးလၢ ကီၢ်ကၠီၣ်တဲၣ်ပူၤလၢတဖိးသဲစး (၂) တၢ်လဲၤကပၥ်မၤကမၣ်ဝဲ ပှၤထံဂုၤကီၢ် ဂၤဖိတဖၣ် အတၢ်ဖံးတၢ် မၤလၢ တၢ်ပၥ်ပနီၣ်ဝဲ အတၢ်သိၣ်တၢ်သီတၢ်ဘျၢ (၃) တၢ်လဲၤကပၥ်မၤကမၣ်ဝဲ ထံဂုၤကီၢ် ဂၤမုၢ်ကျိၤဝဲၤကွၥ် ( Foreign Business Act) (၄) တၢ်မၤဝဲတၢ်ထုးထီၣ်ပဒိၣ် ပပှၢ်လံၥ်လဲၢ် အယီၤအဘျၣ် တၢ်မၤတဖၣ်
(၅) ပှၤလၢမၤကမၣ်ကွီၢ်မ့ၣ်ဒီးနုၥ်လီၤဘၣ်လၢဃိၥ်ပူၤ(၃)နံၣ်ဒီးဆူအဖီခိၣ်တဖၣ် ဃုၥ်ဒီး(၆)ပှၤလၢအ ဟ့ၣ်ဂံၢ်ဟ့ၣ်ဘါ ဆီၣ်သခူဝဲ ပှၤလၢမၤကမၣ်တၢ် ဒ်တၢ်ပၥ်ဖျါလၢထးတဖၣ် အဂ့ၢ် သ့ၣ်ညါဘၣ် န့ၣ်လီၤ.
ဒ်တၢ်ကွဲးလီၤပၥ်ဝဲအိၣ်တၢ်ဘျၢအသိးန့ၣ် ပှၤထံဂုၤကီၢ်ဂၤလၢမၤကမၣ်တၢ်ပၥ်ပနီၣ်တဖၣ်အံၤ တၢ်ကဟံး ထီၣ်ဝဲအရ့ဒီး တချုးဟးထီၣ်ဘၣ်ဒံးဝဲလၢ တၢ်ဒုးဃၥ်ပူၤအဆၢကတီၢ်, ပှၤဃိၥ်ဖိဝဲၤကျိၤ ပှၤဘၣ်မူဘၣ်ဒါ တဖၣ် ကဘၣ်ဆှၢထီၣ်ဝဲ တၢ်ဂ့ၢ်တၢ်ကျိၤလၢအဘၣ်ထွဲဒီး အီၤတဖၣ်ဆူ(Ministry of Home Affairs) အအိၣ်အသိး (Ministry of Home Affairs)အံၤ ကဘၣ်ထုးထီၣ် ရၤလီၤဝဲ ဒီးဟ့ၣ်လီၤ တၢ်ကလုၢ်လၢ တၢ်ကနီဟးထီၣ်ကွံၥ်ဝဲပှၤမၤကမၣ်တၢ်ဖိတဖၣ်အံၤဒီး ကဘၣ်ဟံးဝဲမူ ဒါရဲၣ်ကျဲၤ ဝဲအဂ့ၢ် သ့ၣ်ညါ ဘၣ် န့ၣ်လီၤ.
တကတီၢ်ဃီ တၢ်မၤလီၤတံၢ်ဝဲပှၤမၤကမၣ်တၢ်ဖိအံၤအထံကီၢ် မ့တအိၣ်ဘၣ်န့ၣ် တၢ်ကဘၣ်ဆှၢ က့ၤဝဲ အီၤ ဆူလီၢ်ခံ ကတၢၢ်ထံကီၢ်လၢနုၥ်လီၤအိၣ်ဆိးဝဲအပူၤ ဒီး လၢမီၢ်သီမီၢ်လါအကျိၤအကျဲတဆီ တၢ်ဃ့ထီၣ်ဝဲ မ့ အိၣ်န့ၣ် တၢ်ဆှၢကွံၥ်ဝဲ လၢ ထံဂုၤကီၢ်ဂၤ ကရူၢ်ကရၢအစုပူၤသ့ဝဲအသိး ပှၤလၢကတူၢ် လိၥ်ဝဲအီၤသ့ၣ် တဖၣ် အံၤ ကဘၣ်ခီၣ်ဝဲ တၢ်လၢၥ်ဘူၣ် လၢၥ်စ့ၤ ဒီး ပှၤမၤကမၣ်တၢ်ဖိစ့ၢ်ကီး ကဘၣ်မၤဝဲ တၢ်သးလီၤပလိၥ်ဒီး လံၥ် လဲၢ် အဂ့ၢ် ပၥ်ဖျါဃုၥ်ဝဲန့ၣ်လီၤ.
ဒ်န့ၣ်အသိး, ကၠီၣ်တဲၣ် အတၢ်ဘျၢသဲစး ဘၣ်ဃး တၢ်နီဟးထီၣ်တဖိးသဲစးပှၤထံဂုၤကီၢ်ဂၤလၢ ထံလီၢ်ကီၢ်ပူၤအံၤ တမ့ၢ် တၢ်ဘျၢသဲစးလၢ တၢ်ဒုးအိၣ်ထီၣ်အီၤအသီခဲအံၤဘၣ်ဒီး မ့မ့ၢ်တခီ တၢ်ဘျၢသဲစးအံၤ ဒ်သိး တၢ်ဟံးထီၣ်ဖီၣ်ထီၣ် ပှၤတခီထံတခီကီၢ် ထံဂုၤကီၢ်ဂၤပှၤမၤကမၣ်တၢ်ဖိတဖၣ် ဂ့ၢ်ဝီ ကချ့ဝဲဒီး ကဒီသဒၢ ကီၢ်ကၠီၣ်တဲၣ် ထံကီၢ်တၢ်ဘံၣ် တၢ်ဘၢ အဂီၢ် တၢ်မၤဂ့ၤမၤသီထီၣ်ဝဲ အဂ့ၢ်, သ့ၣ်ညါဘၣ်ဒ် လံၥ်တၢ်ဘိးဘၣ်ပၥ်ဖျါတဖၣ် ရၤလီၤသးအသိးန့ၣ်လီၤ.