လါအီကူၥ် ၂၇သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဘၣ်ကီဘၣ်ခဲဒဲကဝီၤတဖၣ်အပူၤ ပှၤဒဲကဝီၤဖိတဖၣ် တၢ်အီၣ်ဒီး သွဲၣ်လးတၢ်ဆီၣ် ထွဲမၤစၢၤအဂီၢ် ကလံၤထံးခိရံယါပဒိၣ် ဟ့ၣ်လီၤ မၤစၢၤဝဲ အမဲရၤကၤစ့ဒီလၢ် (၁၂၀,၀၀၀) အဂ့ၢ်, သ့ၣ်ညါ ဘၣ် န့ၣ်လီၤ.
တၢ်ဆီၣ်ထွဲမၤစၢၤကျိၣ်စ့တၢ်ပၥ်ပနီၣ်အဂီၢ် မဟါလါအီကူၥ်(၂၆) သီ အနံၤအပူၤ တၢ်မၤဝဲ တၢ်ထံၣ်လိၥ်အိၣ်ဖှိၣ် ပှၤ ဘၣ်ကီဘၣ်ခဲဖိတဖၣ် အတၢ်ရဲၣ်တၢ်ကျဲၤတခါလၢ မဲၢ်လးဒဲကဝီၤအပူၤဒီး တၢ်ရဲၣ်တၢ်ကျဲၤအံၤကလံၤထံး ခိရံယါ မီၢ် သီ H.E. Mr. Park Yongmin အနီၢ်ကစၢ်ဒၣ်ဝဲ ပၣ်ဃုၥ်ဝဲအဂ့ၢ်, ဒဲကဝီၤပှၤဘၣ်မူဘၣ်ဒါတဖၣ် စံးဝဲဒၣ် န့ၣ်လီၤ.
တၢ်ဆီၣ်ထွဲမၤစၢၤဒီး တၢ်ထံၣ်လိၥ်ဒဲကဝီၤဖိ အတၢ်ရဲၣ်တၢ်ကျဲၤအဖီခိၣ် ကညီဘၣ်ကီဘၣ်ခဲကမံးတံၥ် (KRC) နဲၣ် ရွဲၣ်စီၤပှဲၤစ့စံးဝဲလၢ
“တၢ်ကီတၢ်ခဲဒ်အံၤအဆၢကတီၢ် ခိရံယါလၢခံဖု အကျါ လၢ အမ့ၢ်(န့ၤတိၤ)တဖုအံၤ ဖီၣ်လိၥ်စုဒီးကၠီၣ်တဲၣ် ဟဲမၤ စၢၤဝဲ ပဝဲဘၣ်ကီဘၣ်ခဲဖိတဖၣ်န့ၣ်လီၤ.ဒီးလၢ တၢ်ဟ့ၣ်လီၤတၢ်မၤစၢၤ တၢ်တူၢ်လိၥ်ကျိၣ်စ့အ တၢ်ပၥ်ပနီၣ် အဂီၢ် မဟါတၢ်ရဲၣ်တၢ်ကျဲၤအံၤမ့ၢ် တၢ်မၤလၤကပီၤအမူးတခါန့ၣ်လီၤ.”အဂ့ၢ်စံးဝဲန့ၣ်လီၤ.
ဟီၣ်ခိၣ်ဒီဖျၢၣ် ပှၤကညီတၢ်ဒိသူၣ်ဒိသး တၢ်ဆီၣ်ထွဲမၤစၢၤဂ့ၢ်ဝီ စ့ပၥ်ကီၤ တဖၣ် စှၤလီၤကွံၥ်အဆၢကတီၢ်, ဟီၣ်ကဝီၤအပူၤ တၢ်လိၣ်ဘၣ် အါထီၣ်ဒိၣ်ထီၣ်ဝဲ အဖီခိၣ်, ကလံၤထံးခိရံယါတၢ်ဆီၣ်ထွဲမၤစၢၤစ့ အမဲရကၤ ဒီလၢ်(၁၂၀,၀၀၀)အံၤ အတၢ်ပညိၣ်မ့ၢ်ဒ်သိး တၢ်ကဘှါရှဲဝဲ တၢ်ဂ့ၢ်ကီတဖၣ် အဂ့ၢ်, တၢ်ပၥ်ဖျါထီၣ်ဝဲဒၣ်န့ၣ်လီၤ.
ဒီးတၢ်မၤစၢၤအံၤလၢကီၢ်ကၠီၣ်တဲၣ်ကီၢ်ပယီၤ- ကီၢ်ဆၢ ဒဲကဝီၤတဖၣ်အပူၤပှၤဘၣ်ကီဘၣ်ခဲဖိတဖၣ်အဂီၢ် ကဲဘျူးဝဲ ဒၣ်လၢ တၢ်ပၢဆှၢ ရဲၣ်ကျဲၤ တၢ်အီၣ်တၢ်အီ, တၢ်ခိၣ်ဒုး, ဒီး သွဲၣ်လး တဖၣ်အဂီၢ်အဂ့ၢ်, ဘၣ်ကီဘၣ်ခဲကမံးတံၥ် ခိၣ် နၢ်တဖၣ် ပၥ်ဖျါဃုၥ်ဝဲစ့ၢ်ကီးန့ၣ်လီၤ.
မဟါ မဲၢ်လးဒဲကဝီၤ ကလံၤထံးခိရံယါတၢ်မၤတၢ်ထံၣ်လိၥ်အတၢ်ရဲၣ်တၢ်ကျဲၤအပူၤ, (The Border Consortium (TBC), (Korea International Cooperation Agency (KOICA)
), ကၠီၣ်တဲၣ်ကိတိၥ်ဝဲၤကျိၤ (MOI), (Thailand International Cooperation Agency (TICA
), အမဲၥ်ညါ, ဘၣ်ကီဘၣ်ခဲဂ့ၢ်ဝီ ပှၤဘၣ်မူဘၣ်ဒါတဖၣ် ပၣ်ဃုၥ်ပၣ်ဂီၢ်ဝဲအဂ့ၢ် သ့ၣ်ညါဘၣ်န့ၣ်လီၤ.
ဒ်န့ၣ်အသိး, တၢ်ရဲၣ်တၢ်ကျဲၤအံၤအပူၤ ပှၤဒဲကဝီၤဖိတဖၣ် ဟဲထီၣ်ပၣ်ဃုၥ်ပၣ်ဂီၢ်ဝဲဒၣ် အါအါဂီၢ်ဂီၢ်ဒီး ပှၤလၢထီၣ်ပၣ်ဃုၥ်ပၣ်ဂီၢ်ဝဲဒၣ်သ့ၣ်တဖၣ်အံၤ ဒိးန့ၢ်ဘၣ်ဝဲ တၢ်ဟ့ၣ်တၢ်အီၣ် တဆံးတက့ၢ်အိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ ဟီၣ်ကဝီၤအပူၤ မဲၢ်လး,အူးပၠၣ်,မဲၢ်ရၤမိၢ်, ဘၣ်ဒီယါ, ထါမ်ဟ့ၣ်, ဃုၥ်ဒီး နီၢ်ဂံၢ်(၁)နီၢ်ဂံၢ်(၂)ကရ့ၣ်နံၣ် ဘၣ်ကီဘၣ်ခဲ ဒဲကဝီၤခဲလၢၥ် ပၥ်ဖှိၣ်အိၣ်ဝဲ (၉)ဖျၢၣ်အဂ့ၢ်, သ့ၣ်ညါဘၣ်န့ၣ်လီၤ.
ဒီးဒဲကဝီၤ(၉)ဘ့ၣ်အံၤအပူၤ ဘၣ်ကီဘၣ်ခဲဖိခဲလၢၥ် ပၥ်ဖှိၣ်အိၣ်ဝဲလၢအဂၤ(၈၀၀၀၀)ခိၣ်ဃၢၤ အဂ့ၢ် သ့ၣ်ညါဘၣ် န့ၣ်လီၤ.
