လါအီကူး ၁၆ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်လးဘၣ်ကီဘၣ်ခဲဒဲကဝီၤ Zone-C ကဝီၤဒ့အပူၤ ဖဲတနံၤအံၤလါအီကူး ၁၆ သီ အံၤ ပှၤမုၢ်ပှၢ်တဂၤအီသံးမူၤလီၤတဲၥ်လၢထံကျိပူၤဒီးလီၤအုးသံဝဲအဂ့ၢ်န့ၣ် သ့ၣ်ညါဘၣ်လၢ ဒဲကဝီၤပှၤဘၣ်မူဘၣ်ဒါ အအိၣ်န့ၣ်လီၤ.
Zone-C C1B ကဝီၤဒ့အပူၤ ဖဲတနံၤအံၤမုၢ်ဃ့ၢ်လီၤ ၁း၃၀ အဆၢကတီၢ် နီၢ်လၣ်စ့ၤလၢအသးနံၣ်အိၣ်ဝဲ(၅၀)အံၤ အီသံးမူၤဒီး ဖဲအဝဲကက့ၤဆူဟံၣ်က့ၤလၢကျဲ အခါခီဖျိအခီၣ်တပျၥ်လၢထံကျိပူၤအဃိ လီၤအုးသံကွံၥ်လၢထံကျါဘၣ်ဟဲကဲထီၣ်ဝဲဒ်အံၤ လီၤ အဂ့ၢ်န့ၣ် မဲၢ်လးဒဲကဝီၤခိၣ် စီၤဆါဒ့ စံးဝဲန့ၣ်လီၤ.
“တၢ်ကဲထီၣ်သးန့ၣ်ကဘၣ်ဖဲ ၁း၃၀ အခါန့ၣ်. အဝဲန့ၣ်အအီသံးမူၤဒီးဖဲအကက့ၤလၢအဟံၣ်အခါ အခီၣ်တပျၥ်ဒီးလီၤတဲၥ်ဝဲလၢ ထံကျိပူၤဒ်န့ၣ်လီၤ. အဝဲန့ၣ်အိၣ်လၢ C1B .ဖဲအလီၤအုးလၢထံကျိပူၤအခါန့ၣ်ပှၤတထံၣ်ထွဲအခံနီတဂၤဘၣ်. အသံမးပှၤက့ၤထံၣ် ကဒါအီၤ.ဘၣ်ဆၣ် ပှၤတယးဝဲလၢအအီသံးမူၤအခီၣ်တပျၥ်ဒီးလီၤအုးသံလၢထံဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
စှၤသီအတီၢ်ပူၤအံၤကီၢ်ပယီၤဃုၥ်ဒီးကီၢ်ကၠီၣ်တဲၣ်ဟီၣ်ကဝီၤအပူၤ တၢ်စူၤဝဲကိးမုၢ်နံၤဒဲးဃၣ်ဃၣ်ဒီးထံဒိၣ်ထီၣ်ဝဲလၢ တၢ်လီၢ်သကုၤဆးဒးဒီး ဒ်န့ၣ်အသိးထံကျိဖိလၢအိၣ်မဲၢ်လးဒဲကဝီၤပူၤအံၤစ့ၢ်ကီးထံဒိၣ်ထီၣ်ဝဲတဒိၣ်တဆံးအဂ့ၢ်န့ၣ် သ့ၣ်ညါဘၣ် န့ၣ်လီၤ.
မဲၢ်လးဒဲကဝီၤအပူၤ ဖဲအပူၤကွံၥ် ၂၀၂၅ နံၣ် လါအီးကထိဘၢၣ်အခါန့ၣ်စ့ၢ်ကီး ခီဖျိလၢတၢ်စူၤအါထံကစၢၢ်လီၤထံဒိၣ်ထီၣ်အဃိ ဖဲန့ၣ်ဟံၣ်ဟးဂီၤဒံးအဖျၢၣ်(၅၀)ဘျဲၣ်အသိး တၢ်ဖိတၢ်လံၤစ့ၢ်ကီးဟးဂီၤဝဲအါအါဂီၢ်ဂီၢ်ကဲထီၣ်ဒံးဝဲဒၣ်န့ၣ်လီၤ.
ဘၣ်ဆၣ်လၢတၢ်စူၤထံဒိၣ်အံၤအဃိ အိၣ်ထီၣ်တုၤလၢတၢ်သံတၢ်ပှၢ်ဒ်အံၤမ့ၢ်တၢ်အဆိကတၢၢ်တဘျီ လီၤအဂ့ၢ်န့ၣ် ဒဲကဝီၤပှၤဘၣ်မူဘၣ်ဒါ စံးဝဲအသိး သ့ၣ်ညါဘၣ်န့ၣ်လီၤ.