လါအီကူၥ်, ၁၀သီ, ၂၀၂၆နံၣ် ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်ပူၤ ပယီၤသုးဖိ (၄) ဂၤလၢ သုးမီၤစိရိၤ ဖီၣ်န့ၢ်ဆူၣ်မၢကဲသုးအံၤ အဝဲသ့ၣ်ဟဲဟ့ၣ်လီၤသးလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးရ့ၣ် (၉) အအိၣ်ဖဲ လါအီကူၥ်, ၉သီနံၤအဂ့ၢ် ဒ်ခ့ၣ်အဲၣ်ယူၣ်-လီၢ်ခၢၣ်သးထုးထီၣ် ပၥ်ဖျါဝဲအသိးသ့ၣ်ညါဘၣ်န့ၣ်လီၤ.
ဖဲလါအီကူၥ်, ၆သီအနံၤန့ၣ် သုးမီၤစိရိၤ အသုးထံး ခီၣ်သုးရ့ၣ်(ခလရ-၆၀) သုးဖိ(၁)လၢအမ့ၢ် မၠိမ့အူ ဒီး ဖဲလါအီကူၥ်, ၉သီအနံၤန့ၣ် ပယီၤသုးခီၣ်သုးရ့ၣ် (ခလရ-၅၆၉)သုးဖိ (၃) ဂၤလၢမ့ၢ်ဝဲ မိအ့, မ့ခၣ်ဒီး ယဲမ့အီၣ်တဖၣ် ဟဲဟ့ၣ်လီၤသးဆူ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA) သုးရ့ၣ်(၉) အိၣ်အဂ့ၢ် ခ့ၣ်အဲၣ်ယူၣ် တၢ်ပၥ်ဖျါအပူၤ ပၥ်ဖျါဝဲဒၣ်န့ၣ်လီၤ.
ဒ်န့ၣ်အသိး မၠိမ့အူ သုးဖိလၢဟဲက့ၤဟ့ၣ်လီၤသးတဂၤအံၤ ဟဲက့ၤစိၥ်ဃုၥ်ဝဲဒီး ကျိ MP-4 (၁) ခိၣ်, (၄၀) မမ ကျိချံ(၁၁) ဖျၢၣ်, ကျိဆၣ်ဒၢ (၃) ဘ့ၣ်ဒီး ၅.၅၆ ကျိသၣ်ချံ (၃၀၃)န့ၣ်လီၤ. ပယီၤသုးဖိ (၄) ဂၤအတၢ်ဟဲက့ၤဟ့ၣ်လီၤသးအံၤ သ့ၣ်ညါဝဲတၢ်မ့ၢ်တၢ်တီဒီး တအဲၣ်ဒိးအိၣ်ဝဲလၢသုးမီၤစိရိၤတၢ်ပၢအဖီလၥ်လၢၤဘၣ်ဒီး ဟဲက့ၤဟ့ၣ်လီၤကွံၥ်သးအဂ့ၢ်န့ၣ် စံးဝဲဒၣ်န့ၣ်လီၤ.
လၢန့ၣ်အမဲၥ်ညါ သုးမီၤစိရိၤသုးဖိလၢ တၢ်ဖီၣ်န့ၢ်ဆူၣ်မၢကဲသုးတဖၣ် ကပူၤဖျဲးဒီးတၢ်တၢ်သံတၢ်ပှၢ်အဂီၢ်ဒီး ခါလၢကဟဲတၢ်ဒီသဒၢအဂီၢ် ခ့ၣ်အဲၣ်ယူၣ်-က့ညီဒီကလုၥ်စၢဖှိၣ်ကရၢ ဟ့ၣ်သဆၣ်ထီၣ် သုးမီၤစိရိၤအသုး လၢအအိၣ်ဘူးတဖၣ်ဒ်သိး ကဟဲဟ့ၣ်လီၤသးအဂ့ၢ် KNU ဒုးသ့ၣ်ညါဝဲဒၣ်န့ၣ်လီၤ.
ဒ်န့ၣ်အသိး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)တၢ်ပၢဟီၣ်ကဝီၤအပူၤ (၂၀၂၅)တနံၣ်အတီၢ်ပူၤန့ၣ် သုးမီၤစိရိၤအပှၤဟဲက့ၤပၥ်လီၤစုကဝဲၤအိၣ်ဝဲအဂၤ(၅၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ.