လါအီကူၥ် ၉သီ, ၂၀၂၆နံၣ်, ခ့ၣ်အဲးစံၣ်,
တနံၣ်အံၤ(၂၀၂၆) တၢ်မၤလၤကပီၤဟီၣ်ခိၣ်ဒီဘ့ၣ်ပှၤထူလံၤဖိအမုၢ်နံၤအဂီၢ်,ဟီၣ်ခိၣ်ဘီမုၢ်စၢဖှိၣ်ကရၢအတၢ်တိၥ်ထူမ့ၢ်ဝဲ “ပၥ်ပနီၣ်ဟ့ၣ်လီၤကပီၤက့ၤပှၤထူလံၤဖိအံမ့ၣ်(ပိၥ်မုၣ်လၢကွၢ်ပှၤဟုးပှၤသး)အုၣ်ကီၤသဒၢက့ၤတၢ်အိၣ်ဒီးတၢ်အိၣ်မုၥ်ဆိးပၢၤ”အဂ့ၢ်,သ့ၣ်ညါဘၣ်န့ၣ်လီၤ.
ဒ်ဘီမုၢ်စၢဖှိၣ်ကရၢ အတၢ်တိၥ်ထူ အသိး တနံၤအံၤလၢအလီၤဘၣ်ဝဲ ဟီၣ်ခိၣ်ဒီဖျၢၣ်ပှၤထူလံၤဖိမုၢ်နံၤ အပူၤ ပၥ်ပနီၣ်ဒီး မၤလၤကပီၤဝဲ ကညီ ပှၤထူ လံၤဖိအံမ့ၣ်(ပိၥ်မုၣ်လၢကွၢ်ပှၤဟုးပှၤသး)ကိးဂၤအဂ့ၢ်, ဃိၣ်လိၥ်တၢ်မုၥ်တၢ်ခုၣ်ကရၢၢ် (𝐒𝐚𝐥𝐰𝐞𝐞𝐧 𝐏𝐞𝐚𝐜𝐞 𝐏𝐚𝐫𝐤) ဒီးသီသံၣ်တီအူ ပှၤထူ လံၤဖိကရၢၢ်(𝐓𝐡𝐚𝐰𝐭𝐡𝐢 𝐓𝐚𝐰-𝐎𝐨 𝐈𝐧𝐝𝐢𝐠𝐞𝐧𝐨𝐮𝐬 𝐏𝐚𝐫𝐤)ထုးထီၣ် ပၥ်ဖျါ ဝဲ ဒၣ်ဖဲ လါအီကူၥ် (၉)သီ န့ၣ်လီၤ.
တၢ်ပၥ်ပနီၣ်ဒီး မၤလၤကပီၤဝဲ ပှၤထူလံၤဖိ(အံမ့ၣ်)အဖီခိၣ်, ဃိၣ်လိၥ်တၢ်မုၥ်တၢ်ခုၣ် ကရၢၢ် ပှၤပၢၤလီၢ်ဆ့ၣ်နီၤ စီၤပီလ်စ့ၤထွါစံးဝဲဒၣ်လၢ
“တနံၣ်ညါအံၤဘီမုၢ်စၢဖှိၣ်ကရၢထံၣ်ဝဲလၢပှၤထူလံၤဖိ(အံမ့ၣ်)တဖၣ်ဒီးတၢ်အံၤမ့ၢ်တၢ်နီၢ်နီၢ်လၢပပှၤတဝၢပူၤစ့ၢ်ကီးလီၤ.အပူၤကွံၥ် တၢ်ဆါဟံၣ်,ကသံၣ်ဒၢးတဖၣ်တအိၣ်အလီၢ်န့ၣ်,ပှၤဘၣ်ဒိးသန့ၤသးလၢပှၤကွၢ်ဟုၣ်ကွၢ်သးတဖၣ်အံၤ န့ၣ်လီၤ.သးသမူတဖျၢၣ်တၢ်လိၣ်သ့ၣ်တဖၣ်အဖီခိၣ် အဝဲသ့ၣ်တဖၣ်မ့ၢ်ပှၤလၢအရ့ဒိၣ်,အိၣ်လၢတၢ်မဲၥ်ညါ ဟံမူဒါဒိၣ် သ့ၣ်တဖၣ်အဃိပဝဲသ့ၣ်တဖၣ်ကြၢးလၢပပၥ်လၤပၤကပီၤအီၤန့ၣ်လီၤ.”အဂ့ၢ်စံးဝဲန့ၣ်လီၤ.
ပှၤထူလံၤဖိအံမ့ၣ် (ပှၤကွၢ်ပှၤဟူးပှၤသး)တဖၣ်အတၢ်သ့ၣ်ညါနၢ်ပၢၢ်, တၢ်သ့တၢ်ဘၣ်, တၢ်လဲၤခီဖျိသ့ၣ်တဖၣ်အံၤ အံးထွဲ ကွၢ်ထွဲဒီသဒၢကဟုကယၥ်က့ၤဝဲပှၤတဝၢ အတၢ်အိၣ်မုၥ်ဆိးပၢၤလၢ ဖိလံၤကဟဲလၢခံတစိၤ သ့ၣ်တဖၣ်အဃိ, ကဒီ သဒၢက့ၤထူသနူတၢ်မၤလုၢ်လၢ်အံၤ ဒီး အုၣ်ကီၤမၤလီၤတံၢ် က့ၤဝဲတၢ်သ့ၣ်ညါထူလံၤသ့ၣ်တဖၣ်အဂ့ၢ် ဃိၣ်လိၥ် တၢ် မုၥ်တၢ်ခုၣ်ကရၢၢ် ဒီး သီသံၣ်တီအူပှၤထူလံၤဖိကရၢၢ် အၢၣ်လီၤပၥ်ဖျါဝဲန့ၣ်လီၤ.
တကးဒံးဘၣ်, ကစိၥ်ကဖီ ဟံးဃၥ်ကၢၤဃၥ် ဒီး ကဟ့ၣ်ခီဟ့ၣ်နီၤဒီး စိၥ်မူစိၥ်ဂဲၤ မၤလိသ့က့ၤဝဲ ပှၤထူလံၤဖိအံမ့ၣ် အတၢ်သ့ တၢ်ဘၣ်တဖၣ်ဆူ ကညီထူလံၤသူၣ် ဘီၣ်သးစၢ်သ့ၣ်တဖၣ်အဂီၢ် ကမၤဆူၣ်ထီၣ်က့ၤဝဲဒ်အမ့ၢ် တၢ်ဆဲးတၢ်မၤ တၢ်န့ၢ်သါ အရူၢ်အသဲး အနီၢ်အသံးတခါအသိးအဂ့ၢ်, ပၥ်ဖျါဃုၥ်ဝဲန့ၣ်လီၤ.
လၢန့ၣ်အမဲၥ်ညါ, လၢတၢ်ကမၤဖျိမၤဖျါထီၣ်ဝဲ ပှၤထူလံၤဖိအပှၤကွၢ်ပှၤဟုးပှၤသး တၢ်ဟူးတၢ်ဂဲၤတဖၣ်အဂီၢ် ဃိၣ်လိၣ်တၢ်မုၥ်တၢ်ခုၣ်ကရၢၢ် ပှၤဘၣ်မူဘၣ်ဒါတဖၣ် ဆီၣ်သခူပၥ်ဖျါ စ့ၢ်ကီးဝဲ
တၢ်ဂ့ၢ်(၅)ထံၣ်လၢအမ့ၢ်
(၁) တၢ်ပၥ်ပနီၣ်ဒီးဒိကနၣ်(ပှၤကွၢ်ပှၤဟုးပှၤသး)တဖၣ်အကလုၢ်,
(၂) တၢ်ဟ့ၣ်စိဟ့ၣ်ကမီၤဒီး ဒီသဒၢပှၤကွၢ်ပှၤဟုးပှၤသးတဖၣ် ဒီး ဆီၣ်ထွဲတိစၢၤမၤစၢၤ အီၤလၢတၢ်ဖိတၢ်လံၤတၢ်လိၣ် ဘၣ်ဒီး ဂ့ၢ်ဝီၢ်အူ တၢ်တိစၢၤမၤစၢၤ
(၃) တၢ်သူၣ်ထီၣ်မၤသကိးတၢ်ဒီးပှၤထူလံၤဖိကွၢ်ပှၤဟုးပှၤသး ဒီး ဆူၣ်ချ့ပှၤမၤတၢ်ဖိဘၢၣ်စၢၤ လၢအိၣ်ဒီး တၢ်ပၥ်လုၢ်ပၥ်ပှ့ၤ
(၄) ဒီသဒၢသကိး သ့ၣ်ပှၢ်, ကသံၣ်သ့ၣ်ဂံၢ်ဝၣ်စဲ တၢ်မူကလုၥ်ကလုၥ်ဒီး ထံလၢအကဆှီတဖၣ်
(၅) ဟ့ၣ်ခီဟ့ၣ်နီၤ တၢ်ကွၢ်ပှၤဟုးပှၤသး အတၢ်သ့ၣ်ညါတၢ်သ့တၢ်ဘၣ် ဆူစၢၤသွဲၣ်သီတဖၣ် အဂ့ၢ် သ့ၣ်ညါဘၣ်န့ၣ်လီၤ.
တကတီၢ်ဃီ, ခီဖျိ ပှၤထူလံၤဖိတဖၣ်အတၢ်ကတဲၥ်ကတီၤဟီၣ်ခိၣ်န့ဆၢၣ် တၢ်အိၣ်ယၢၤဒီး တၢ်သးသမူ တၢ်မူတဝၢ အဃိ, ဟီၣ်ခိၣ်ဖျၢၣ်အံၤ မူဝဲသ့တုၤလၢခဲအံၤအဂ့ၢ်, တၢ်မုၥ်တၢ်ခုၣ်ဒီးပှၤထူလံၤဖိကရၢၢ်ပှၤဘၣ်မူဘၣ်ဒါတဖၣ် ကတိၤ ပၥ်ဖျါဝဲန့ၣ်လီၤ.
ဒ်န့ၣ်အသိး, ဒ်တၢ်မၤလၤကပီၤဝဲ မုၢ်နံၤဒိၣ်မုၢ်နံၤလၢအဂၤတဖၣ်အသိးန့ၣ်, တနံၤအံၤ တၢ်မၤလၤ ကပီၤ ဒီး မၤသ့ၣ်နီၣ်ဝဲ ပှၤထူလံၤဖိတဖၣ် အတၢ်မၤဘျူး အဖီခိၣ်, တၢ်ဒုးသ့ၣ်ညါအါထီၣ်ဝဲ ပှၤတဝၢသ့ၣ်တဖၣ်လၢ ပှၤထူ လံၤဖိသ့ၣ်တဖၣ်အံၤ မ့ၢ်ပှၤဒ်လဲၣ် ဒီးလိၣ်ဘၣ်ဝဲ ပှၤတဝၢတၢ်ဆီၣ်ထွဲမၤစၢၤဒ်လဲၣ်အဂ့ၢ် ပှၤဘၣ်မူဘၣ်ဒါ တဖၣ် စံးဝဲန့ၣ်လီၤ.
