လါစဲးပထ့ဘၢၣ် ၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)လူၤသီကီၢ်ဆၣ် လၢၢ်မုၢ်ပျီကရူၢ်အပူၤ ထီမုၢ်ပျဲၢ်မဲပယီၤသုးကလၢၤ လၢအအိၣ်ဆီလီၤသးန့ၢ်ဝဲအခိၣ်အနံၣ်(၃၀)ဃၣ်ဃၣ်အံၤ အပှၤသုးဖိသံၣ်ဖိခဲလၢၥ်ထုးလီၤကွံၥ်သးဟးထီၣ်က့ၤဝဲအဂ့ၢ်န့ၣ် လီၢ်ကဝီၤ ပှၤဘၣ်မူဘၣ်ဒါ စံးဝဲန့ၣ်လီၤ.
ဖဲအပူၤကွံၥ်လါအီကူး ၂၉ သီအနံၤန့ၣ် ထီမုၢ်ပျဲၢ်မဲသုးကလၢၤလၢသုးဂံၢ်ဘါကအိၣ်ဝဲအဂၤ(၇၀)ဃၣ်ဃၣ်အံၤ ဟးထီၣ်ကွံၥ်ဝဲလၢ သုးကလၢၤအပူၤဒီး ဖဲတနံၤအံၤလါအီကူး ၈ သီအံၤ ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် အပှၤလဲၤထီၣ်မၤရှဲလဲက့ၤဝဲတၢ်လီၢ်အဂ့ၢ်န့ၣ် (သုးက့ ၅)ပှၤကတိၤတၢ်ပၢပဒိၣ်စီၤထိၣ်ရီၤဘ့ၤ စံးဝဲန့ၣ်လီၤ.
“သုးကလၢၤဝဲအံၤန့ၣ်ပှၤစးထီၣ်လဲၤမၤကီမၤခဲအီၤန့ၣ်အိၣ်လၢအနံၣ်လံ.ဖဲပှၤလဲၤခးသုးကလၢၤလၢအဂၤတဖၣ်အခါန့ၣ် ထီမုၢ်ပျဲၢ်မဲသုးကလၢၤအံၤပှၤလဲၤသဖှိအီၤစ့ၢ်လီၤ.ပှၤလဲၤခးစဲးပြဲးအီၤအိၣ်.ပှၤလဲၤခးလၢစုဘျၢမ့ဝံၤပှၤလဲၤထီၣ်ဒုးအီၤဖးဒိၣ်ဒ်န့ၣ်စ့ၢ်ကီးအိၣ်လီၤ. ဖဲအပူၤကွံၥ်တလါဒီးတလါအံၤန့ၣ်ပှၤလဲၤခးစဲးပြဲးဟဲအါထီၣ်မီၤနီၤ.တနံၤအံၤန့ၣ်ပှၤလဲၤထီၣ်မၤဆှဲအဖၢမုၢ်လီၤ. မ့ၢ်ပှၤန့ၢ် တၢ်ဖိတၢ်လံၤအလီၤတိၢ်လီၤဆီအိၣ်ဧါတဲလီၤတံၢ်တဘၣ်ဒံး”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတဟါ အံၤန့ၣ်လီၤ.
ထီမုၢ်ပျဲၢ်မဲသုးကလၢၤလၢအဟဲအိၣ်ဆီလီၤသးလၢလူၤသီကီၢ်ဆၣ်န့ၢ်ဝဲဒၣ်အနံၣ်(၃၀)ဃၣ်ဃၣ်လၢအထုးကွံၥ်အသးခဲအံၤန့ၣ် မ့ၢ်ဝဲ ကလံၤထံးကီၢ်ခီသုးဝဲၤလီၢ်ခိၣ်အစုတီၤဖီလၥ်သုးရ့ၣ်တရ့ၣ် ဒ်န့ၣ်အသိးသုးကလၢၤအိၣ်ဆီလီၤသးဘူးစ့ၢ်ကီးဝဲဒီး ချၢၣ်လွံၢ်ထူၣ် ကီၢ်ရ့ၣ် (သုးက့ ၃)လၢၢ်ဒိၣ်ကီၢ်ဆၣ် အဂ့ၢ်န့ၣ် ပှၤဘၣ်မူဘၣ်ဒါစံးဝဲအသိး သ့ၣ်ညါဘၣ်န့ၣ်လီၤ.
(သုးက့ ၅)ဟီၣ်ကဝီၤအပူၤ အပူၤကွံၥ်သုးကလၢၤမ့အိၣ်ဝဲလၢအဖျၢၣ်(၈၀)ခိၣ်ဃၢၤဘၣ်ဆၣ် စးထီၣ်ဖဲ(၂၀၂၁)သုးဟံန့ၢ်ဆူၣ် ထံကီၢ် တၢ်စိတၢ်ကမီၤဝံၤလီၢ်ခံန့ၣ် ခီဖျိလၢဟီၣ်ကဝီၤတၢ်ပၢၢ်ဆၢသုးပၥ်ဖှိၣ်လဲၤထီၣ်ခးအီၤ ဒီးလၢအဝဲသ့ၣ်ကစၢ်ထုးလီၤကွံၥ်သးအံၤ အဖီခိၣ် တကီၢ်ခါခဲအံၤဟီၣ်ကဝီၤအပူၤသုးကလၢၤအိၣ်က့ၤထဲအဖျၢၣ်(၁၀)ဘျဲၣ်လီၤအဂ့ၢ်န့ၣ် ခ့ၣ်အဲၣ်ယူၣ်ပှၤဘၣ်မူဘၣ်ဒါ စံးဝဲန့ၣ်လီၤ.
ဒ်န့ၣ်အသိးတကီၢ်ခါခဲအံၤလၢဖၣ်ပူၣ်သုကလၢၤဃုၥ်ဒီးကတၢတံၥ်ဟီၣ်ကဝီၤလီၤက့ၤဆူကမၤမိၢ်တၢ်ဒ့ၣ်စၢၤကျဲတကပၤန့ၣ် ဒုးယၤတၢ်ဖ့ၣ်စၢဆဲးကဲထီၣ်ဒံးဝဲလၢပယီၤသုးဒီး(သုးက့ ၅)အပှၤအဘၢၣ်စၢၤအဖၢမုၢ်ဒံးန့ၣ်လီၤ.