ကဆီၣ်ထွဲမၤစၢၤ ကညီကီၢ်စဲၣ်ပူၤ ကၠိဖိဒီး ကၠိသရၣ်သရၣ်မုၣ်တဖၣ်အဂီၢ် တၢ်ကမၤဝဲ “RUN FOR CHANGE ”တၢ်ဃ့ၢ်ြပၢ

လါအီးကထိဘၢၣ် ၆သီ, ၂၀၂၆နံၣ်, ခ့ၣ်အဲးစံၣ်,

လၢတၢ်ကဆီၣ်ထွဲမၤစၢၤဝဲ ကညီကီၢ်စဲၣ်အပူၤ ကၠိဖိဒီး ကၠိသရၣ်သရၣ်မုၣ်တဖၣ် တၢ်လိၣ်ဘၣ်အဂီၢ် လါလၢ ကဟဲ လါနိၣ်ဝ့ဘၢၣ်အပူၤ တၢ်ကမၤဝဲ “RUN FOR CHANGE ” တၢ်ဃ့ၢ်ြပၢ တၢ်ရဲၣ်တၢ်ကျဲၤ တခါ လၢကီၢ်ကၠီၣ်တဲၣ် ဝ့ၢ်ကံၢ်မဲပူၤ အဂ့ၢ်သ့ၣ်ညါဘၣ်န့ၣ်လီၤ.

“RUN FOR CHANGE ”တၢ်ဃ့ၢ်ြပၢတၢ်ရဲၣ်တၢ်ကျဲၤအံၤ ဘၣ်တၢ်တီခိၣ်ရိၢ်မဲမၤဝဲလၢ (Karen Student Association_Chiang Mai University) KSA ကံၢ်မဲဖၠၣ်စိမိၤ ကညီကၠိဖိကရူၢ်ကရၢတဖၣ်အဂ့ၢ်, သ့ၣ်ညါ ဘၣ်န့ၣ်လီၤ.

ဘၣ်ဃးဒီးတၢ်ပြၢအတၢ်ပညိၣ်ဒီးမုၢ်လၢ်ကွၢ်စိအဖီခိၣ်, (KSA)ပှၤတီခိၣ်ရိၢ်မဲတၢ်ြပၢတၢ်ရဲၣ်တၢ်ကျဲၤ စီၤဘးရခၣ် စံးဝဲဒ်အံၤန့ၣ်လီၤ.

“ပတၢ်ပညိၣ်န့ၣ်မ့ၢ်ဝဲဒၣ်လၢ ကျိၣ်စ့လၢပမၤန့ၢ်သ့ၣ်တဖၣ် ပကက့ၤဟ့ၣ်မၤစၢၤက့ၤကၠိသရၣ်သရၣ်မုၣ်လၢ ကီၢ်သူ လ့ၤတၢ်ပၢဟီၣ်ကဝီၤအပူၤ ခီဖျိလၢ(KTWG)သ့ၣ်တဖၣ်န့ၣ်လီၤ.ခံခါတခါန့ၣ် ပတၢ်ပြၢအံၤ တမ့ၢ်ထဲ ပ ပညိၣ်ထဲ လၢ ပှၤဃ့ၢ်ညီနုၢ်တဖၣ်အဂီၢ်ဘၣ်, တၢ်ပြၢအံၤ မ့ၢ်ဝဲဒၣ်လၢပှၤခဲလၢၥ်အဂီၢ်လၢပှၤလၢအသးအိၣ် ဆီၣ်ထွဲ မၤစၢၤဝဲ ကီၢ်သူ လ့ၤသရၣ်သရၣ်မုၣ်သ့ၣ်တဖၣ်န့ၣ်လီၤ” အဂ့ၢ်စံးဝဲန့ၣ်လီၤ.

“RUN FOR CHANGE ” တၢ်ဃ့ၢ်ပြၢအံၤ ကမ့ၢ်ဝဲ (၆)ကံလိၣ်မံထၢၣ် အတၢ်သတြီၤအဂ့ၢ်, သ့ၣ်ညါဘၣ်န့ၣ်လီၤ.

ဒီး တၢ်ရဲၣ်တၢ်ကျဲၤအံၤ တၢ်ကမၤဝဲအီၤဖဲ လါနိၣ်ဝ့ဘၢၣ်(၁၄)သီအနံၤအဃိ လၢတၢ်ကနုၥ်လီၤဃ့ၢ်သတြီၤတၢ် တၢ်အဂီၢ် တကီၢ်ခါခဲအံၤ တၢ်ဟ့ၣ်ထီၣ်ဝဲမံၤစရီလၢသ့ဝဲလံ အဂ့ၢ်, (KSA) ဘိးဘၣ်ပၥ်ဖျါ ဝဲဒၣ်လၢ အစိၤရှၢၣ်မံးဒံး ယၢၣ် အပူၤ န့ၣ်လီၤ.

ဒ်န့ၣ်အသိး, လၢကနုၥ်လီၤပၣ်ဃုၥ်ပၣ်ဂီၢ်ဝဲလၢ တၢ်ပြၢအံၤအပူၤအဂီၢ် (KSA)ကွဲမုၥ်ဘၣ်ဝဲ ပှၤလၢသးအိၣ်ထီၣ်ထွဲမၤစၢၤ ကီၢ်သူလ့ၤ ကၠိသရၣ်သရၣ်မုၣ် တဖၣ် ကိးဂၤဒဲးအသိး ဆီၣ်တခူစ့ၢ်ကီးဝဲလၢ ပှၤကိးဂၤဒဲးလၢ ကခါထီၣ်ခီၣ်ဆူ “RUN FOR CHANGE ” တၢ်ဃ့ၢ်တၢ်ဆီတလဲ လၢကီၢ်သူလ့ၤကၠိသရၣ်သရၣ်မုၣ်တဖၣ်အဂီၢ်အဂ့ၢ်, (KSA)ပၥ်ဖျါဝဲ န့ၣ် လီၤ.