လါအီးကထိဘၢၣ် ၇သီ, ၂၀၂၆နံၣ်, ခ့ၣ်အဲးစံၣ်,
ကညီဘၣ်ကီဘၣ်ခဲပှၤတဝၢဂ့ၢ်ဝီတၢ်ဆီၣ်ထွဲမၤစၢၤကရူၢ်ကရၢ(OKRSO)အံၤ တနံၤအံၤ လါအီးကထိဘၢၣ် (၇)သီ အနံၤအပူၤ လဲၤဆီၣ်ထွဲမၤစၢၤဝဲ ကီၢ်ကၠီၣ်တဲၣ် ဝ့ၢ်ခိၣ် ဘီကီးဝ့ၢ်ပူၤ ပှၤလၢသဂၢၢ်ဘၣ်ထံဒိၣ် တၢ်ကီတၢ်ခဲတၢ် ထံအီ ဒီး တၢ်အီၣ်ဃ့တဖၣ် အဂ့ၢ်, သ့ၣ်ညါဘၣ်န့ၣ်လီၤ.
ထံအီဒီး တၢ်အီၣ်ဃ့သ့ၣ်တဖၣ်အံၤ တၢ် ကလဲၤမၤဘူၣ်လီၤဝဲလၢ ဘီကီးဝ့ၢ် (Lat Krabang, Min Buri) ထံဒိၣ် ဘၣ်ကီဘၣ်ခဲ တၢ်လီၢ်တဖၣ်အပူၤအဂ့ၢ်, (OKRSO) ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဒီးတၢ်ဆီၣ်ထွဲမၤစၢၤသ့ၣ်တဖၣ် လီၤလၢဝဲလၢစ့ယိၤ (၃၀၀၀၀) ဘး ဃၣ်ဃၣ်ဒီး တၢ်ဆီၣ်ထွဲမၤစၢၤ အံၤ အိၣ်ဟဲဝဲလၢ (OKRSO)စ့ပၥ်ကီၤတနီၤဒီး ပှၤမၤဘူၣ်တၢ်ကစၢ်တဖၣ် စုတၢ်ဟ့ၣ်လီၤ အဂ့ၢ်,ကရၢခိၣ် (စီၤသီၣ်ထီ) စံးဝဲဒ်အံၤန့ၣ်လီၤ.
“တၢ်ဆီၣ်ထွဲမၤစၢၤ အံၤ ဟဲန့ၢ်ဝဲလၢ ကမျၢၢ်ပှၤမၤဘူၣ်တၢ်ဖိအအိၣ်ဒီး(OKRSO) စ့လၢအိၣ်တနီၤတၢ်ပၥ်ဖှိၣ်အပူၤ န့ၣ်လီၤ.ထံအီခီန့ၣ် ခဲလၢၥ်ပၥ်ဖှိၣ် အကး (၅၀၀) အဂၤတခီန့ၣ် မ့ၢ်ဝဲတၢ်အီၣ်ဃ့ ဒ်အမ့ၢ် မါမၣ် သ့ၣ်တဖၣ်န့ၣ်လီၤ. ပတဟ့ၣ်လီၤဝဲထဲ ပှၤကီၢ်ပယီၤဖိဘၣ်, ပကဟ့ၣ်မၤစၢၤဝဲ ကဝီၤဒ့အပူၤထံပှၤဘၣ်ကီဘၣ်ခဲဖိကိးဂၤန့ၣ်လီၤ”အဂ့ၢ် စံးဝဲ န့ၣ်လီၤ.
ကီၢ်ကၠီၣ်တဲၣ် အဝ့ၢ်ခိၣ် ဘီကီးဝ့ၢ်အံၤ အပူၤကွံၥ် လါစဲးပထ့ဘၢၣ်(၂၄)သီအနံၤအပူၤ မူခိၣ်စူၤ ထံဒိၣ်လုၢ်ဘၢတၢ် ကဲထီၣ်ဝဲသးဒီး တုၤလၢခဲအံၤ ထံတလီၤက့ၤဝဲဂ့ၤဂ့ၤဒံးဘၣ်အဖီခိၣ်, ဝ့ၢ်လီၢ်ကဝီၤဖိတဖၣ် သဂၢၢ်ဘၣ်ဝဲ တၢ်ပှ့ၤအီၣ် တၢ်ကီတၢ်ခဲ အိၣ်ဒံးဝဲအဖၢမုၢ်အဂ့ၢ်, သ့ၣ်ညါဘၣ်န့ၣ်လီၤ.
တကးဒံးဘၣ်, ခီဖျိ ထံလုၢ်ဘၢကွံၥ် တၢ်အိၣ်တၢ်ဆိးလီၢ်ကျဲတဖၣ်အဃိ ခီကီၢ်ပှၤမၤတၢ်ဖိတနီၤ ဘၣ်ဟးအိၣ်ဆိဝဲလၢ ပှၤလၢအဘူးဒီး အီၤတဖၣ်အအိၣ်ဒီး တနီၤဘၣ်ငါအိၣ်ဆိဝဲလၢ ပှၤတမှံၤဒၢး အဃိ သဂၢၢ်ဘၣ်ဝဲတၢ်ကီတၢ်ခဲအဂ့ၢ်, သ့ၣ်ညါဘၣ်န့ၣ်လီၤ.
(OKRSO)အံၤ တၢ်ဒုးအိၣ်ထီၣ်ဝဲဖဲ (၁၉၉၂)နံၣ်ဒီး အိၣ်ဆီလီၤအသးလၢ ကီၢ်ကၠီၣ်တဲၣ်ဝ့ၢ်ဘီကီးအပူၤ အဂ့ၢ်, သ့ၣ်ညါဘၣ်န့ၣ်လီၤ.
ဒီးကရူၢ်ကရၢအံၤ ဟူးဂဲၤဝဲလၢ ကီၢ်ကၠီၣ်တဲၣ်အပူၤကညီဖိလၢအဘၣ်ကီဘၣ်ခဲအဂီၢ်ဒီး ဂ့ၢ်ဝီအူ, တၢ်ဘၣ် ဒိ ဘၣ်ထံး, တၢ်သံတၢ်ပှၢ်, တဖၣ်အဂီၢ်အသိး သိၣ်လိနဲၣ်ယုၤဝဲ ကညီသးစၢ်တဖၣ်လၢ ကညီပှိၢ်လံၥ် လဲၢ် ကျိၥ်, ဂံၢ်ခီၣ်ထံးကိၤလၤဝါကျိၥ်ဒီး ခီၣ်ဖၠူထၢၣ်တၢ်သ့တၢ်ဘၣ်တဖၣ် အမဲၥ်ညါ ကတီၤဃၥ်ဝဲ ကညီလုၢ်လၢ်တၢ်ဆဲး တၢ်လၤ, တၢ်ဂဲၤကလံၣ် သ့ၣ်တဖၣ်အသိး, ဒ်အလီၢ်အိၣ်ဝဲအသိး ဆီၣ်ထွဲမၤစၢၤဝဲ ထံဆၢကီၢ်ဆၢ ပှၤဃ့ၢ် တၢ်ဒုး လီၢ်အိၣ်ကဒုဖိတဖၣ်တဖၣ် ဒီးဂ့ၢ်ဝီအူ ပှၤတူၢ်ဘၣ်န့ဆၢၣ်တၢ်တတၢၤတနါဂ့ၢ်ဝီအသိး ကိးနံၣ်ဒဲး တီခိၣ် ရိၢ်မၤဝဲကညီနံၣ်ထီၣ်သီ,ဒီးလါခူးကံၢ်စုမူးတဖၣ်လၢကညီဖိလၢတုၤအိၣ်ထံဂုၤကီၢ်ဂၤတဖၣ်အဂီၢ်စ့ၢ်ကီး န့ၣ်လီၤ.
