လါအီးကထိဘၢၣ် ၂၈ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဘုသိၣ်ကီၢ်ဆၣ် ပၥ်ဟဲးကရူၢ် ရၤထၣ်သဝီလၢအိၣ်ဃိၣ်လိၥ်ကျိ ကပၤအံၤ ဖဲမုၢ်နၤခီအခါန့ၣ် ကဘီယူၤလဲၤခးလီၤဝဲတၢ်အဃိ သဝီပူၤဟံၣ်တစှၤန့ၢ်(၅)ဖျၢၣ်ဟးဂီၤဘၣ်ဒိဘၣ်ထံးဝဲအဂ့ၢ်န့ၣ် သ့ၣ်ညါ ဘၣ်လၢလီၢ်ကဝီၤကမျၢၢ်အအိၣ်န့ၣ်လီၤ.
ဖဲမဟါလါအီးကထိဘၢၣ် ၂၇ သီ မုၢ်နၤခီ ၁၂း၃၀ ဃၣ်ဃၣ်အဆၢကတီၢ်န့ၣ် တၢ်ဒုးကဲထီၣ်တအိၣ် သုးမီၤစိရိၤကဘီယူၤလဲၤတ့ၢ် လီၤဝဲမ့ၣ်ပိၢ်(၃)ဖျၢၣ် လီၤတဲၥ်ပိၢ်ဖးထီၣ်ဝဲလၢသဝီပူၤ,သဝီခိၣ်ထိး,သဝီခံလီၤဃိၣ်လိၥ်ကျိကၢၢ်နံၤတၢ်လီၢ်သ့ၣ်တဖၣ်အံၤန့ၣ်လီၤ.
လၢကဘီယူၤအတၢ်လဲၤခးလီၤတၢ်ဘျီဝဲအံၤအပူၤန့ၣ် ကမျၢၢ်တၢ်ဘၣ်ဒိဘၣ်ထံးမ့တအိၣ်ဘၣ်ဘၣ်ဆၣ် ဟံၣ်တၢ်သူၣ်ထီၣ်ဟးဂီၤဝဲ (၅)ဖျၢၣ် တကးဒံးဘၣ်အမဲၥ်ညါ ဃိၣ်လိၥ်ကျိကပၤထိဒဲ(၁)ဖျၢၣ်ဒီး(Honda)ချံစဲးဟးဂီၤဝဲတဘ့ၣ်အဂ့ၢ်န့ၣ် ကမျၢၢ်လၢအိၣ် ဘူးဖဲန့ၣ်တဂၤ စံးဝဲန့ၣ်လီၤ.
“ဖဲမနၤ ၁၂း၃၀ အခါန့ၣ်ကဘီယူၤဟဲခးလီၤတၢ်လၢရၤထၣ်သဝီ. ကိညၢ်လၢတဘၣ်ပှၤကညီနီတဂၤဘၣ်. မ့ၣ်ပိၢ်န့ၣ်လီၤတဲၥ်ဝဲဒၣ် လၢသဝီခၢၣ်သးန့ၣ်တဖျၣ်,လၢသဝီခိၣ်ထိးန့ၣ်တဖျၢၣ်ဒီးလၢသဝီခံလီၤန့ၣ်တဖျၢၣ်. အဃိဟံၣ်န့ၣ်ဟးဂီၤခဲလၢၥ်(၅)ဖျၢၣ်,မ့ဝံၤ ဒဲထိဟးဂီၤတဖျၢၣ် ဒီး (ဟီဒၣ်)ချံစ့ၢ်ကီးဟးဂီၤဃုၥ်ဖဲန့ၣ်တဘ့ၣ်.ယဆိမိၣ်အကခးဝဲလၢသဝီပူၤ ခးဝဲတဘၣ်ဘၣ်ဘျီ တဖျၢၣ်န့ၣ် လီၤတဲၥ်ဝဲလၢထံကျိကပၤဒ်န့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တချုးကဘီယူၤဟဲခးလီၤတၢ်လၢရၤထၣ်သဝီပူၤဒံးဘၣ်ဖဲလါအီးကထိဘၢၣ် ၂၅ သီ ဂီၤခီ ၁ နၣ်ရံၣ်ဃၣ်ဃၣ်အခါန့ၣ်စ့ၢ်ကီး မဲးနုၥ်ထၣ်သဝီလၢအိၣ်ပၥ်ဟဲးကရူၢ်အပူၤအံၤ ကဘီယူၤလဲၤခးလီၤတၢ်ဒံးအဃိ ဖဲန့ၣ်ဖိသၣ်ပိၥ်ခွါဆံးဆံးဖိသံဝဲ(၁)ဂၤဒီးအပါဘၣ်ဒိ ဘၣ်ထံးအမဲၥ်ညါ ကမျၢၢ်ဟံၣ်,တၢ်ဘါယွၤသရိၥ်,ဘါရဲးတၢ်သူၣ်ထီၣ်ဟးဂီၤဝဲ(၈)ဖျၢၣ်ကဲထီၣ်ဒံးဝဲဒၣ်န့ၣ်လီၤ.
ဒီးစးထီၣ်လၢကဘီယူၤလဲၤခးလီၤတၢ်လၢမဲးနုၥ်ထၣ်သဝီပူၤကဲထီၣ်ဝံၤလီၢ်ခံန့ၣ် မဲးနုၥ်ထၣ်အမဲၥ်ညါရၤထၣ်သဝီဃုၥ်ဒီးဒူသဝီ လၢအိၣ်ဘူးဖဲန့ၣ်သ့ၣ်တဖၣ် တအိၣ်လၢၤလၢသဝီပူၤအါဒၣ်တက့ၢ်န့ၣ် ဟးစံၣ်ပလဲၥ်သးလၢတၢ်ဘံၣ်တၢ်ဘၢလီၢ်အဃိ ကဘီယူၤ လဲၤခးလီၤတၢ်လၢရၤထၣ်သဝီပူၤအံၤ ကမျၢၢ်တၢ်ဘၣ်ဒိဘၣ်ထံးတအိၣ်ဝဲဘၣ် န့ၣ်လီၤ.
ဒ်န့ၣ်အသိးခီဖျိကဘီယူၤတၢ်လီၤဘၣ်ယိၣ်အဃိ ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဃိၣ်လိၥ်ကျိဒီတကျိၤ ဒူသဝီကမျၢၢ်တဖၣ် မုၢ်နၤမုၢ်ဆါကိးဆၢကတီၢ်ဒဲးကအိၣ်လၢတၢ်ပလီၢ်ပဒီပူၤအဂ့ၢ်န့ၣ် ခ့ၣ်အဲၣ်ယူၣ် ပှၤဘၣ်မူဘၣ်ဒါဒုးသ့ၣ်ညါလီၤဝဲကမျၢၢ် အိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.