လါအီးကထိဘၢၣ် ၁၂သီ, ၂၀၂၆ နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်ပူၤ မူခိၣ်စူၤဒီး ထံဒိၣ်လုၢ်ဘၢတၢ်အဃိ ဒိဘၣ်ဝဲ ထံဖိကီၢ်ဖိကမျၢၢ် (၃.၁၄) ကကွဲၢ်ဘျဲၣ် တၢ်အိၣ်တၢ်ဆိး တၢ်ဖံးအီၣ်မၤအီၣ် ဒီး တၢ်အိၣ်မူတဖၣ် အဂ့ၢ်,ကီၢ်ကၠီၣ်တဲၣ် တၢ်မၤစှၤလီၤ န့ဆၢၣ်တၢ်ဘၣ်ဒိဘၣ်ထံး ဝဲၤကျိၤ (DDPM) ပၥ်ဖျါထီၣ်ဝဲဒၣ်ဖဲ လါအီးကထိဘၢၣ် (၁၁)သီအနံၤ န့ၣ်လီၤ.
ဒ်(DDPM)ပၥ်ဖျါဝဲအသိးန့ၣ်, ထံဒိၣ်လုၢ်ဘၢတၢ်အံၤ တၢ်ဘၣ်ဒိဘၣ်ထံး စးထီၣ်ကဲထီၣ်ဝဲအသးလၢ ကီၢ်ကၠီၣ်တဲၣ် ကလံၤစိး တုၤလၢ ကလံၤ ထံး ဒီး တုၤလီၤဝဲဆူဝ့ၢ်ခိၣ် ဘီကီးဝ့ၢ် ဃုၥ်ဒီး လီၢ်ခၢၣ်သးကီၢ်စဲၣ်တဖၣ် န့ၣ်လီၤ.
လၢန့ၣ်အမဲၥ်ညါ, ထံဒိၣ်လုၢ်ဘၢတၢ်အံၤ ကဲထီၣ်သးလၢ ကီၢ်ကၠီၣ်တဲၣ်အပူၤ ကီၢ်စဲၣ် (၂၁)ဘ့ၣ်, ကီၢ်ရ့ၣ် (၁၀၀) အပူၤ သဝီ (၆,၂၀၁) ဖျၢၣ် အပူၤ ဟံၣ်ဒူၣ် (၁.၁၂)ကကွဲၢ်ဖျၢၣ် ပှၤနီၢ်ဂံၢ် (၃.၁၄)ကကွဲၢ်ဘျဲၣ် အဖီခိၣ်အဂ့ၢ်, ပၥ်ဖျါဃုၥ်ဝဲန့ၣ်လီၤ.
တကးဒံးဘၣ်, ကီၢ်ကၠီၣ်တဲၣ်ဝ့ၢ်ခိၣ် ဘီကီးဝ့ၢ်ပူၤ ဟံၣ်ခိၣ်အဖျၢၣ် (၃၂၉,၀၀၀)ဃၣ်ဃၣ် ဘၣ်ဒိဘၣ်ထံးဝဲဒီး ပှၤကညီဘၣ်သံဝဲ(၄)ဂၤအသိး, လီၢ်ခၢၣ်သးကီၢ်စဲၣ်တဖၣ်အပူၤဟံၣ်ဒီးတၢ်သူၣ်အီၣ်ဖျးအီၣ်လီၢ်တဖၣ် ဟးဂီၤကွံၥ်ဝဲ အါအါဂီၢ်ဂီၢ် အမဲၥ်ညါ, ကလံၤစိး ဟီၣ်ကဝီၤအပူၤထံလုၢ်ဘၢတၢ် စှၤဝဲဘၣ်ဆၣ်, Phitsanulok, Bang Rakam, Nakhon Sawan တၢ်လီၢ်သ့ၣ်တဖၣ်အံၤ သဂၢၢ်ဘၣ်ဝဲ ထံတၢ်ဂ့ၢ်ကီတုၤခဲအံၤအဂ့ၢ်, သ့ၣ်ညါဘၣ် န့ၣ်လီၤ.
ကီၢ်ကၠီၣ်တဲၣ်အပူၤတနံၣ်အံၤစးထီၣ်ဖဲလါစဲးပထ့ဘၢၣ်လီၢ်ခံကတၢၢ်တနွံအပူၤ ခီဖျိမူခိၣ်စူၤ ထံဒိၣ်လုၢ်ဘၢတၢ်အဃိ တုၤထီၣ်လၢ လါအီးကထိဘၢၣ် (၁၁) သီအနံၤဒၣ်လဲၥ် တၢ်ဘၣ်သဂၢၢ်ဒံးဝဲ ထံတၢ်ဂ့ၢ်ကီတၢ်ဘၣ်ဒိဘၣ်ထံး အဖၢမုၢ် အိၣ်ဒံးဝဲအဂ့ၢ်, သ့ၣ်ညါဘၣ်ဒ်(DDPM) တၢ်ပၥ်ဖျါအိၣ်ဝဲအသိး န့ၣ်လီၤ.
လၢတၢ်န့ၣ်အဃိ, (DDPM)အံၤ တကီၢ်ခါခဲအံၤ ဟူးဂဲၤဝဲလၢ တၢ်ဆီၣ်ထွဲမၤစၢၤဝဲ ဂ့ၢ်ဝီအူ တၢ်မၤစၢၤပှၤမၤတၢ်ဖိဂံၢ်ဘါ, တၢ်ထုးထီၣ်ထံ, သိလ့ၣ်ဒီး ချံသ့ၣ်တဖၣ် အဂီၢ် အိၣ်ဝဲအမဲၥ်ညါ မၤစ့ၢ်ကီးဝဲ တၢ်မၤရှဲလဲ ထံမိၤပျဲ, တၢ်ပျၢ်လီၤ ထံလီၢ် တဖၣ် အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး, ထံက့ၤလီၤက့ၤတၢ်လီၢ်တဖၣ်အပူၤပှၤဘၣ်မူဘၣ်ဒါတဖၣ် မၤဝဲတၢ်သူၣ်ထီၣ်ဘှီထီၣ် အိၣ်ဝဲလံအသိး, ခါလၢ ကဟဲ မူခိၣ်စူၤထံဒိၣ် တၢ်လီၤဘၣ်ယိၣ်အဂီၢ် အိၣ်ဝဲဒီး တၢ်ကတဲၥ်ကတီၤပၥ်သး တပယူၥ်ဃီအဂ့ၢ်,သ့ၣ်ညါ ဘၣ်န့ၣ်လီၤ.