လါအီးကထိဘၢၣ် ၁၂သီ, ၂၀၂၆နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢတၢ်ပၢဟီၣ်ကဝီၤ သုးက့(၆) ရၤမတံကီၢ်ဆၣ်အပူၤ လၢတၢ်ကဒိၣ်စိက့ၤဝဲ ကလံၤထံး ဟီၣ်ကဝီၤအပူၤအဂီၢ် သုးကရူၢ်ဂုၥ်ကျဲးစၢးဝဲ အဆၢကတီၢ်, သုးကရူၢ်အစုတီၤဖီလၥ် ကညီကီၢ်စဲၣ် ပဒိၣ် တဖၣ်အံၤ အပူၤကွံၥ် လါအီးကထိဘၢၣ် (၉)သီအနံၤအပူၤ ပၥ်ဖျါထီၣ်ဝဲ တၢ်ဆီၣ်ထွဲမၤစၢၤလၢ ဟီၣ်ကဝီၤ အပူၤ လီၢ်အိၣ်ကဒုဖိအဂၤ(၄၀၀)ဘျဲၣ် အဖီခိၣ် အိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
သုးကရူၢ်ကလံၤကျါအတၢ်ထီၣ်ဒုးဒီး ကျိဖးဒိၣ်တၢ်ခးလီၤတၢ်, သုးကျိၤတၢ်ဟူးတၢ်ဂဲၤတဖၣ်အဃိ, (၅)နံၣ်ဘျဲၣ် အတီၢ်ပူၤ ကမျၢၢ်လီၤကဝီၤဖိတဖၣ် ဘၣ်ဃ့ၢ်ထီၣ်အိၣ်ကဒုအသးအိၣ်ဝဲလၢ အကထိကလး တဖၣ်အံၤ အါတက့ၢ် ဒိးန့ၢ်ဘၣ်ဝဲ တၢ်ဆီၣ်ထွဲမၤစၢၤဒီးအိၣ်ဆၢထၢၣ်ဝဲသ့လၢ ကီၢ်ဆၢတၢ်ခီဂၥ်, တၢ်မၤဘူၣ်ကစၢ်ကရူၢ်ကရၢ ဒီး ဟီၣ်ကဝီၤ တၢ်မၤဘူၣ်ကစၢ်တဖၣ် တၢ်ဆီၣ်ထွဲမၤစၢၤ န့ၣ်လီၤ.
တကီၢ်ခါခဲအံၤ,လၢတၢ်ကဒိၣ်စိက့ၤဝဲ ရၤမတံကလံၤထံး ဖလူ မ့လဲၣ်ပၤ ဟီၣ်ကဝီၤ အဂီၢ် သုးကရူၢ်အံၤ မၤဝဲ သုးကျိၤတၢ်ဟူးတၢ်ဂဲၤကတီၢ်, ပၥ်ဖျါထီၣ်ဝဲ တၢ်ဟ့ၣ်လီၤ ဟုသး ဒီး သိတၢ်အီၣ်တၢ်အီတဖၣ်လၢ ဒူသဝီ(၅) ဖျၢၣ်လၢ အမ့ၢ် ဖလူ,မ့လဲၣ်ပၤ, အ့ကၠ့မၠဲၣ်, လ့က့ၣ်ကိၥ် ဒီး ထံမဲးဝါခံ တဖၣ်အိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ, သုးကရူၢ်အံၤ ကမျၢၢ်လီၢ်ကဝီၤဖိတဖၣ် ဘၣ်ဃ့ၢ်ထီၣ်အိၣ်ကဒုအသးအိၣ်ဝဲ အါအါဂီၢ်ဂီၢ် ဘၣ်ဆၣ် ဟ့ၣ်လီၤဝဲ တၢ်အိၣ်တၢ်ဆိးတၢ်ဆီၣ်ထွဲမၤစၢၤတအိၣ်ဝဲဘၣ်အဖီခိၣ် တၢ်ဟ့ၣ်လီၤမၤစၢၤအံၤ မ့ၢ်ဒၣ် တၢ်ဂုၥ်ကျဲးစၢး ဟံးန့ၢ် ကမျၢၢ် တၢ်နၥ် အဂ့ၢ် ရၤမတံ ကလံၤထံး ပှၤမၤစၢၤ ပှၤလီၢ်အိၣ်ကဒုဖိတဂၤပဲၥ်ထံနီၤဖး စံးဝဲဒ်အံၤန့ၣ်လီၤ.
အဝဲစံးဝဲလၢ “သုးကရူၢ်အံၤ တၢ်လီၢ်လၢမၤက့ၤဝဲန့ၢ်တဖၣ်အပူၤ ပၥ်ဖှိၣ်သးဒီး (BGF)ဝံၤ ဟ့ၣ်တၢ်ဆီၣ်ထွဲမၤစၢၤ အိၣ်ဝဲ န့ၣ်လီၤ. ဟ့ၣ်လီၤဝဲထဲ ပှၤလၢက့ၤနုၥ်အိၣ်ဆိးလၢ ဒူသဝီပူၤ သီသီသ့ၣ်တဖၣ်န့ၣ်လီၤ. တမ့ၢ်ဟ့ၣ်ဝဲထီဘိဘၣ်. ထဲအဂၤ (၄၀၀) န့ၣ်မၤတၢ်တသ့နီတမံၤဘၣ်, တၢ်နီၢ်နီၢ်မ့ၢ်အဲၣ်ဒိး ဆီၣ်ထွဲမၤစၢၤဒု ရၤမတံ ကလံၤထံး ဟီၣ်ကဝီၤအပူၤ ပှၤလီၢ် အိၣ် ကဒုဖိအိၣ်ဒီဒူၣ်န့ၣ်လီၤ. ” အဂ့ၢ် စံးဝဲန့ၣ်လီၤ.
သုးကရူၢ်အတၢ်ဟ့ၣ်လီၤတၢ်ဆီၣ်ထွဲမၤစၢၤဆူ လီၢ်အိၣ်ကဒုဖိတဖၣ်အအိၣ် အံၤ မၤဝဲ တၢ်ရဲၣ်တၢ်ကျဲၤ လၢ ရၤမတံဝ့ၢ် ဒီး ကမျၢၢ်တဂၤန့ၣ် ဟ့ၣ်ဝဲ ဟုသး(၆) တလိး ဒီး သိတလံထၢၣ် အဂ့ၢ်, သ့ၣ်ညါဘၣ်န့ၣ်လီၤ.
ရၤမတံကလံၤထံး ဟီၣ်ကဝီၤအပူၤ လီၢ်အိၣ်ကဒု တၢ်လီၢ်အိၣ်ဝဲ (၈)တီၤ ဒီး ထဲဒၣ် ပျီတပိၢ် လီၢ်အိၣ်ကဒု တတီၤန့ၣ်, ဟံၣ်ခိၣ်အိၣ်ဝဲလၢ (၇၀၀၀)ဘျဲၣ်လံဒီး ဒ်န့ၣ်အသိး, လီၢ်အိၣ်ကဒုဖိတၢ်လီၢ်တဖၣ်အံၤအကျါ တနီၤ ဘၣ်အိၣ်ဝဲလၢ တၢ်ဘၣ်ပျံၤဘၣ်ဖုး ဝဲ သုးကရူၢ်အတၢ်ခးလီၤတၢ်ဒီး ကဘီယူၤတၢ်မၤတၢ်ထီၣ်ဒုး အဂ့ၢ်, သ့ၣ်ညါဘၣ်န့ၣ်လီၤ.
