လါအီးကထိဘၢၣ် ၈ သီ, ၂၀၂၆ နံၣ်, ခ့ၣ်အဲးစံၣ်
ကီၢ်ပယီၤအပူၤ စးထီၣ်လၢယဲဝ့အူ(ရဲဝင်းဦး)ထီၣ်ကဒါက့ၤဝဲ သုးရိၣ်မဲခိၣ်ကျၢၢ် မ့အီၤလဲၤအလီၢ်ဝံၤလီၢ်ခံ လၢ(၆)လါအတီၢ်ပူၤ ကမျၢၢ်သံဖှိၣ်ဒီဖုဒီဂီၢ် ကဲထီၣ်တစှၤန့ၢ်ဝဲ(၇)ဘျီညါဘၣ်ဒီး ကမျၢၢ်သံပၥ်ဖှိၣ်အိၣ်ဝဲ(၁၇၃)ဂၤအဂ့ၢ် ISP-Myanmar ထုးထီၣ် ပၥ်ဖျါဝဲအသိး သ့ၣ်ညါဘၣ်န့ၣ်လီၤ.
ဒီးလၢကမျၢၢ်ထံဖိကီၢ်ဖိသံ(၁၇၃)ဂၤအကျါ(၁၁၁)ဂၤဃၣ်ဃၣ်န့ၣ် သံဝဲဒၣ်လၢသုးမီၤစိရိၤကဘီယူၤတၢ်ထီၣ်ဒုးအဃိလီၤအသိး ဖဲန့ၣ်အကျါ(၆၄)ဂၤန့ၣ် သံဝဲဒၣ်လၢရခၢၣ်ကီၢ်စဲၣ်ဟီၣ်ကဝီၤတဘ့ၣ်ဃီအပူၤအဂ့ၢ်န့ၣ် စံးဝဲန့ၣ်လီၤ.
သုးခိၣ်ကျၢၢ်ဒိၣ်စိ ယဲဝ့အူ ကဲထီၣ်သုးရိၣ်မဲခိၣ်ကျၢၢ်ဝံၤလီၢ်ခံ သူဝဲဂံၢ်ဘါအါအါဂီၢ်ဂီၢ်မၤဝဲတၢ်ထီၣ်ဒုးဆူၣ်ဆူၣ် ကိၤကိၤလၢ ကခၠ့ၣ်ကီၢ်စဲၣ်,ရခၢၣ်ကီၢ်စဲၣ်,ကညီကီၢ်စဲၣ်ဃုၥ်ဒီးဟီၣ်ကဝီၤအဂၤတဖၣ်အပူၤ မၤဆူၣ်ထီၣ်ဝဲကလံၤကျါတၢ်ဟူးတၢ်ဂဲၤဒီးဒြိတၢ် ထီၣ်ဒုးဟဲအါထီၣ်ဝဲအဃိ ထံဖိကီၢ်ဖိကမျၢၢ်သံဘၣ်ဒိဘၣ်ထံးအနီၣ်ဂံၢ်ဘၣ်ဟဲအါထီၣ်ဝဲဒၣ်န့ၣ်လီၤ.
ဒ်(ISP-Myanmar)အလံၥ်တၢ်ပၥ်ဖျါပူၤအိၣ်ဝဲအသိးန့ၣ် ဖဲတနံၣ်အံၤ(၂၀၂၆)လါမ့ၤ ၁၀ သီ သုးမီၤစိရိၤအသုးဂံၢ်ဘါ အဂၤ(၅၀၀) ဃၣ်ဃၣ် ဟဲထီၣ်နုၥ်လီၤဝဲဒၣ်ဖဲ မကွ့ကီၢ်ခီ ပခိၣ်ကူၤကီၢ်ဆၣ် မၠ့ၣ်ခၠ့ၤဝ့ၢ်ပူၤအခါန့ၣ် ဖီၣ်မၤသံဝဲကမျၢၢ်အဂၤ(၅၀)ဘျဲၣ်အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိး ဖဲလါ အီကူး ၃၁ သီ ဖီၣ်စုကဝဲၤကရူၢ်နုၥ်လီၤခးဝဲမါတလ့ကီၢ်ခီ (မလှိုင်)ကီၢ်ဆၣ် ထမၣ်ကၠံသဝီပူၤအဃိ သဝီသးပှၢ်ဃုၥ်ဒီးကမျၢၢ် သံဝဲ(၁၂)ဂၤဒီး ပှၤသံတဖၣ်အံၤမ့ၢ်ဝဲသုးမီၤစိရိၤအ(ပျူစောထီး)ဒီးကမျၢၢ်အဂ့ၢ် ဟီၣ်ကဝီၤတၢ်ပၢၢ်ဆၢကရူၢ် စံးဝဲအိၣ်ဘၣ်ဆၣ် ပှၤလၢအသံတဖၣ်အံၤမ့ၢ်ဝဲကမျၢၢ်လီၤအဂ့ၢ်န့ၣ် သုးမီၤစိရိၤတကပၤက့ၤထုးထီၣ်ပၥ်ဖျါဝဲဒၣ်န့ၣ်လီၤ.
တကးဒံးဘၣ်အဘူးကတၢၢ်ဖဲလါစဲးပထ့ဘၢၣ် ၂၈ သီအနံၤန့ၣ်စ့ၢ်ကီး သုးမီၤစိရိၤကဘီယူၤလဲၤတ့ၢ်လီၤဝဲမ့ၣ်ပိၢ် ဆူ ရခၢၣ်ကီၢ်စဲၣ် ကၠီၣ်တီၤ(ကျောက်တော်)ဝ့ၢ် အ့ၤဒံၣ်ယၣ်ဖၠါတၢ်ဆါတၢ်ပှ့ၤလီၢ်ဃုၥ်ဒီးတိၤလၢကမျၢၢ်ဟးထီၣ်က့ၤလီၤအိၣ်ဖှိၣ်ရိၣ်ဖှိၣ် အါအလီၢ် အံၤအဃိ ဖဲန့ၣ်ကမျၢၢ်ဃုၥ်ဒီးဖိဒံဖိသၣ်သံတစှၤန့ၢ်ဝဲအဂၤ(၅၀)ဒီးဘၣ်ဒိဘၣ်ထံးဝဲအဂၤ(၆၀)ဃၣ်ဃၣ်ဒံးန့ၣ်လီၤ.
ကီၢ်ပယီၤပူၤမ့ဘၣ်ကွၢ်စးထီၣ်လၢသုးဟံန့ၢ်ဆူၣ်ထံကီၢ်တၢ်စိတၢ်ကမီၤလၢတၢ်(၅)နံၣ်ဘျဲၣ်အတီၢ်ပူၤအံၤ လၢသုးမီၤစိရိၤအတၢ်မၤထီ ဒါပှၤဟီၣ်ခိၣ်ဖိခွဲးအကလုၥ်ကလုၥ်အဃိ ထံဖိကီၢ်ဖိကမျၢၢ်သံဖှိၣ်ဒီဖုဒီဂီၢ်တဘျီဃီကဲထီၣ်ဝဲတစှၤန့ၢ်(၁၁၅)ဘျီ, ဖဲန့ၣ် ကမျၢၢ်ထံဖိ ကီၢ်ဖိသံ ပၥ်ဖှိၣ်အိၣ်ဝဲ(၂,၃၂၄)ဂၤဒီး ပှၤလၢအသံသ့ၣ်တဖၣ်အံၤအကျါ(၆၅)မျးကယၤန့ၣ်သံခီဖျိလၢကဘီယူၤတၢ်ထီၣ်ဒုးအဃိလီၤ အဂ့ၢ်န့ၣ် (ISP-Myanmar)တၢ်မၤနီၣ်ပူၤအသိးသ့ၣ်ညါဘၣ်န့ၣ်လီၤ.
ISP-Myanmar အံၤ မ့ၢ်ဝဲဒၣ်တၢ်ဃုထံၣ်သ့ၣ်ညါကရူၢ်တကရူၢ်လၢဃုထံၣ်သ့ၣ်ညါဝဲဘၣ်ဃးကီၢ်ပယီၤပူၤ ထံရူၢ်ကီၢ်သဲး,ဒုးယၤ, တၢ်မုၥ်တၢ်ခုၣ်,တၢ်ဘံၣ်တၢ်ဘၢတၢ်အိၣ်သးဒီး လၢဒုးယၤတၢ်သဘံၣ်သဘုၣ်ဒီးဖီၣ်စုကဝဲၤတၢ်သဘံၣ်သဘုၣ်ပူၤ တၢ်မၤ ကမၣ် ပှၤဟီၣ်ခိၣ် ဖိခွဲးယၥ်အဂ့ၢ်အကျိၤသ့ၣ်တဖၣ်အံၤ ထၢဖှိၣ်မၤနီၣ်မၤဃါဝဲတၢ်ဂ့ၢ်တၢ်ကျိၤဒီးထုးထီၣ်ပၥ်ဖျါကဒါဝဲဒၣ်န့ၣ်လီၤ.