လါအီးကထိဘၢၣ် ၈သီ, ၂၀၂၆နံၣ်, ခ့ၣ်အဲးစံၣ်,
လၢမလ့ရှါကိၥ်တိၥ်ခိၣ်ကျၢၢ် အၣ်ဝါအံၣ်ဘရၤဟ့ၣ် အတၢ်ကွဲမုၥ်တဆီ ကီၢ်ပယီၤသုးကရူၢ်အခိၣ် မ့အီၣ်လဲၣ်အံၤ မဟါ လါအီးကထိဘၢၣ်(၇)သီအနံၤအပူၤ လဲၤဃီၤဝဲဆူ မလ့ရှါထံကီၢ်ဒီး မ့အီၣ်လဲၣ်အတၢ်လဲၤဆူ မလ့ရှါထံ ကီၢ် အဖီခိၣ် တၢ်တီခိၣ်ရိၣ်မဲတၢ်ဒုးအိၣ်ထီၣ် ဖဲၣ်ဒရၢၣ် ဒံၣ်မိၣ်ကရ့ၣ်စံၣ် ကီၢ်စၢဖှိၣ် ကီၣ်ကး(SCEF)ထီဒါဝဲ တဲၥ်တဲၥ်ဖျုဖျုအဂ့ၢ်, ထုးထီၣ် ပၥ်ဖျါဝဲ လံၥ် ဖဲတနံၤအံၤ လါအီးကထိဘၢၣ် (၈)သီအနံၤန့ၣ်လီၤ.
ဘၣ်ဃးဒီးလံၥ်တၢ်ထီဒါအံၤ (SCEF)ပၥ်ဖျါဝဲလၢ, တၢ်တူၢ်လိၥ်ဝဲ သုးကရူၢ်အခိၣ် မ့အီၣ်လဲၣ်အတၢ်လဲၤကျဲလၢအ ဖိးသဲစးအံၤ မ့ၢ်တၢ်အိၣ်ပှိၤဝဲ သုးကရူၢ်ဒီး အတၢ်မၤကမၣ်မၤထီဒါ ပှၤဟီၣ်ခိၣ်ဖိခွဲးယၥ်တၢ်ဖံးတၢ်မၤအသိး, ထံရူၢ်ကီၢ် သဲး သနၢၣ်အပူၤ မ့ၢ်တၢ်တူၢ်လိၥ်ဝဲ ဒီး ဟ့ၣ်ဂံၢ်ဟ့ၣ်ဘါဝဲ အတၢ်ဖိးသဲစးအဂ့ၢ်, ပၥ်ဖျါဝဲန့ၣ်လီၤ.
လၢန့ၣ်အမဲၥ်ညါ, တၢ်ကသူၣ်ထီၣ် ဒံၣ်မိၣ်ကရ့ၣ်စံၣ် ပှၤကညီဂ့ၢ်ဝီခွဲးယၥ်ဒီး ဖဲၣ်ဒရၢၣ် ဒံၣ်မိၣ်ကရ့ၣ်စံၣ် ကီၢ်စၢဖှိၣ်အဂီၢ်, မ့ၢ်တၢ်လဲၤကပၥ်ကွံၥ်ဝဲ ကီၢ်ပယီၤထံဖိကီၢ်ဖိကမျၢၢ်တဖၣ်အတၢ်ဘၣ်ဟ့ၣ်လီၤ အသးသမူ, သွံၣ်ထံကပၢၤ တၢ်အိၣ် မူ,တၢ်ကီတၢ်ခဲ ဒီး တၢ်လုၢ်အီၣ်သးသမူအဂီၢ်တဖၣ်အဂ့ၢ်, ပၥ်ဖျါဃုၥ်ဝဲန့ၣ်လီၤ.
မလ့ရှါထံကီၢ်အံၤ မ့ၢ်ဝဲထံကီၢ်လၢ အမၤလၢပှဲၤဝဲ အၣ်စံၣ်ဃၣ် ဂံၢ်ခီၣ်ထံး တၢ်သိၣ်တၢ်သီတၢ်ဘျၢလၢအ ဖိးမံ လိၥ်သး လၢကီၢ်ပယီၤထံကီၢ်အဖီခိၣ် တဘ့ၣ်အသိး,ပှၤကညီတၢ်ဒိသူၣ်ဒိသး တၢ်ပၥ်လုၢ်ပၥ်ပှ့ၤ,ဒံၣ်မိၣ်ကရ့ၣ်စံၣ် ဒီး ဂံၢ်ခီၣ်ထံးပှၤကညီဂ့ၢ်ဝီခွဲးယၥ် အဖီခိၣ် မၤဝဲ တၢ်ပၥ်ဂၢၢ်ပၥ်ကျၢၤ တၢ်အၢၣ်လီၤအီလီၤတဖၣ် အဘျီတဖၣ်အဘျီအဃိ တၢ်တူၢ်လိၥ်ဝဲ မ့အီၣ်လဲၣ် လၢထံကီၢ်ခိၣ်နၢ်ပတီၢ် လၢမီၢ်သီကျိၤကျဲသနူအံၤ မ့ၢ်တၢ်မၤထီဒါဝဲ အၣ်စံၣ်ယၣ်ဂံၢ်ခီၣ်ထံး တၢ်သိၣ်တၢ်သီတၢ်ဘျၢတဖၣ်အဂ့ၢ် (SCEF)နဲၣ်ဖျါဝဲဒၣ်န့ၣ်လီၤ.
လၢတၢ်န့ၣ်အဃိ, တၢ်ပၥ်ဂၢၢ်ပၥ်ကျၢၤဒီး တူၢ်လိၥ်ဝဲ မ့အီၣ်လဲၣ်လၢအမ့ၢ်ပှၤဖိးသဲစး မ့တမ့ၢ် တၢ်ဟ့ၣ်လီၤ ဖိးသဲစးသ့ၣ်တဖၣ်အံၤ မလ့ရှါထံကီၢ်ပဒိၣ်ခိၣ်နၢ်တဖၣ် ကဟးဆှဲးဘၣ်လၢ်ဝဲ အဂ့ၢ် (SCEF) ဆီၣ်တခူဃ့ထီၣ်ဝဲန့ၣ်လီၤ.
တကတီၢ်ဃီ, သုးကရူၢ်အတၢ်လဲၤဆူ မလ့ရှါထံကီၢ်အံၤ ( Justice For Myanmar (JFM))စ့ၢ်ကီး ထီဒါဝဲ ဒၣ်အဂ့ၢ် ထုးထီၣ်ပၥ်ဖျါတ့ၢ်ဝဲ လံၥ်ဖဲ မဟါလါစဲးပထ့ဘၢၣ် (၇)သီအနံၤအိၣ်ဝဲစ့ၢ်ကီးန့ၣ်လီၤ.
ဒီးဒ် (JFM) ဃုထံၣ်သ့ၣ်ညါဘၣ်ဝဲအသိးန့ၣ်, ပယီၤသုးကမၤကလံၤကျါဒုးယၤဂ့ၢ်ဝီအဂီၢ် မလ့ရှါထံကီၢ်အပူၤ ခီပနံၣ်တနီၤထုးထီၣ်န့ၢ်ဝဲ ကဘီယူၤတၢ်ပီးတၢ်လီ ဒီး စဲးဖီကဟၣ်ဃုၥ်ဒီး တၢ်တ့ထီၣ်ဘှီထီၣ် တၢ်ပီးတၢ်လီၤတဖၣ် အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ဒ်န့ၣ်အသိး, လီၤဆီဒၣ်တၢ်ဘၣ်ဃးဒီး (FJ Global Aeroparts (M) Sdn Bhd၊ Asia AeroTechnic Sdn Bhd )ဒီး Skyways Technics Asia Sdn Bhd အတၢ်ဘၣ်ထွဲဒီး ပယီၤသုးကရူၢ်တဖၣ်အံၤ တၢ်ကသမံသမိး အမဲၥ်ညါ ကမၤဝဲ တၢ်သမံသမိးလၢ ခီပနံၣ်ဒီး ဘၢၣ်စၢၤ ပှၤဆီၣ်ထွဲမၤစၢၤဝဲ သုးစုကဝဲၤပီးလီ, ကဘီယူၤအက့ၢ်အဂီၤ တဖၣ် အအိၣ်အဂ့ၢ် (JFM) ဃ့ထီၣ်ဝဲ မလ့ရှါထံကီၢ်ပဒိၣ်အိၣ်စ့ၢ်ကီးဝဲန့ၣ်လီၤ.
