လါအီးကထိဘၢၣ် ၂၃သီ, ၂၀၂၆နံၣ်,
ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ တးကီၢ်ရ့ၣ် မဲၢ်ဆီးဝ့ၢ် မဟၤဝၤသဝီကရူၢ် မဲၢ်ကိးက့ သဝီအပူၤ ကျိဖးဒိၣ်ချံလီၤတဲၥ် ဝဲအဃိ ကၠီၣ်တဲၣ် သုးမုၢ်ဒိၣ်ဒီး သုးခိးကီၢ်ဆၢ ကရူၢ်ကရၢတဖၣ်အံၤ မၤဃံးထီၣ်ဝဲ တၢ်ဘံၣ်တၢ်ဘၢလၢ သူမွဲထံကျိ ကၢၢ်နံၤ ဒီတဘိအပူၤအဂ့ၢ်, သ့ၣ်ညါဘၣ်န့ၣ်လီၤ.
မဟါလါအီးကထိဘၢၣ်(၂၂)သီအနံၤအပူၤခီဖျိ ကျိဖးဒိၣ်ချံ လၢအိၣ်ဟဲဝဲဆူရၤမတံကလံၤထံး တကပၤလီၤတဲၥ် ဝဲလၢမဲၢ်ကိးက့သဝီပူၤအဃိ , ကၠီၣ်တဲၣ်ရၣ်ခၠမနူကရူၢ်လီၤဆီ(Task Force)ဒီး သုးခိးကီၢ်ဆၢ လီၢ် ခၢၣ်သး (၃၄၆) ကရူၢ်ကရၢတဖၣ်အံၤ တနံၤအံၤ လါအီးကထိဘၢၣ် (၂၃)သီအနံၤအပူၤ မၤဝဲတၢ် ဟးဆှၣ်တၢ် လၢ သူမွဲထံကျိ ကၢၢ်နံၤ တၢ်လီၢ်တဖၣ်အပူၤအဂ့ၢ်, ပၥ်ဖျါထီၣ်ဝဲဒၣ် န့ၣ်လီၤ.
ရၤမတံကလံၤထံးဟီၣ်ကဝီၤဒုးယၤတၢ်အိၣ်သးဒီး စုကဝဲၤပီးလီလီၤတဲၥ် အဖီခိၣ်, လီၢ်ကဝီၤပှၤဘၣ်မူဘၣ်ဒါတဂၤ စံးဝဲလၢ “တၢ်လီၤတဲၥ်လၢန့ၣ်တကပၤန့ၣ် အါတက့ၢ်မ့ၢ်ဒၣ်ဒုၣ်ဒါအတၢ်လီၤ. ပတၢ်ဒ်န့ၣ်တအိၣ်ဘၣ်. ဖဲဂီၤလ့ၤ တကပၤန့ၣ် အပူၤကွံၥ် (၂၁)သီအနံၤဟဲခးဝဲ, ခဲအံၤဒု တၢ်ခးလိၥ်သးတအိၣ်ဘၣ်, ဘၣ်ဆၣ်မ့မ့ၢ်လၢ ထံညၣ်လံၣ်, ဖလူ, ကၠီးခဲး, တကပၤဒုကဲထီၣ်သးအိၣ်တပယူၥ်ဃီဒီး ပယီၤသုးမၤကဘီယူၤ တၢ်ထီၣ်ဒုးသ့ၣ် အိၣ် စ့ၢ်ကီးလီၤ.”န့ၣ်လီၤ အဂ့ၢ်စံးဝဲန့ၣ်လီၤ.
မဟါလါအီးကထိဘၢၣ်(၂၃)သီမုၢ်နၤခီကတီၢ်, ခီဖျိ (၆၀)မမ, မီၣ်တၣ်ကျိချံ(၄)ဖျၢၣ်လီၤတဲၥ်ဘၣ်ဝဲလၢ မဲၢ်ကိးက့သဝီပူၤ ဒီး ဘၣ်ဟးဂီၤကွံၥ်ဝဲ ကမျၢၢ်ဟံၣ်(၃)ဖျၢၣ်ဒီး ဟံၣ်ဒိးလဲ (၂)ဒၢးအမဲၥ်ညါ ဘၣ်ဒိဝဲ လီၢ်ကဝီၤပိၥ်မုၣ်(၁)ဂၤ အစုအဂ့ၢ်, ကၠီၣ်တဲၣ် တၢ်ကစီၣ်သန့တဖၣ် ပၥ်ဖျါထီၣ်ဝဲဒၣ်န့ၣ်လီၤ.
ဘၣ်ဃးတၢ်ဘၣ်ဒိဘၣ်ထံးဘၣ်ဟးဂီၤအဖီခိၣ်, မဲၢ်ကိးက့လီၢ်ကဝီၤပိၥ်မုၣ်တဂၤ စံးဝဲလၢ “မဟါဃိးနၣ်ရံၣ်ဘျဲၣ်ကတီၢ်န့ၣ်လီၤတဲၥ်ဖဲ ပဟံၣ်လီၢ်ခံန့ၣ်လီၤ. တပိၢ်ထီၣ်ဘၣ်, အအံၤယဟံၣ်ဘၣ်အသိး မုဂါလၢ အိၣ်ဘူးဒီးယၤ အနီၢ်ကစၢ်တအိၣ်လၢဟံၣ်ဘၣ်တဂၤစ့ၢ်ကီး အဟံၣ်ဘၣ်ဟးဂီၤဝဲခဲလၢၥ်န့ၣ်လီၤ.ကိညၢ်လၢ တဘၣ် လိၤ လိၤဖဲ တၢ်ဖီအီၣ်တ့ၤအီၣ်ဂၥ်သဝံဒၢအလိၤဘၣ်န့ၣ်လီၤ.ခဲအံၤ သုးဟဲကွၢ် သမံသမိးဝံၤလံ” အဂ့ၢ်စံးဝဲန့ၣ်လီၤ.
ကီၢ်ကၠီၣ်တဲၣ် ကီၢ်ပယီၤကီၢ်ဆၢ သူမွဲထံကျိကၢၢ်နံၤ မဲၢ်ကိးက့ သဝီ အံၤ ပယီၤသုးတကပၤ မၤဝဲ တၢ်ထီၣ်ဒုးလၢ ဖလူ,မ့လဲၣ်ပၤ တၢ် လီၢ်တဖၣ်အပူၤ တဘျီလၢ်လၢ် ကျိချံ ပှၥ်သၣ် ဒီး ဒြိအက့အခီတဖၣ် လီၤတဲၥ်ဝဲလၢ ကမျၢၢ် အိၣ်ဆိး ဟံၣ် ဃီ ဒီး တၢ်ဖံးအီၣ် မၤအီၣ်လီၢ်ကျဲတဖၣ်အပူၤ အိၣ်ဝဲခဲအံၤခဲအံၤ အဃိ ဘၣ်ဒိဘၣ်ထံးဝဲ ဟံၣ်ဃီဒီး ကမျၢၢ်လီၢ်ကဝီၤဖိ တဖၣ် ကဲထီၣ်သး ခဲအံၤခဲအံၤ အိၣ်ဝဲအဂ့ၢ် သ့ၣ်ညါ ဘၣ်န့ၣ်လီၤ.
ဒ်န့ၣ်အသိး တနံၣ်အံၤ (၂၀၂၆)နံၣ်အပူၤ ကျိချံပှၥ်သၣ် လၢ ရၤမတံကလံၤထံးတကပၤလီၤတဲၥ်အဃိ ဟံၣ်ဒီး ကမျၢၢ်လီၢ်ကဝီၤဖိ အတၢ်ဘၣ်ဒိ ဘၣ်ထံး ကဲထီၣ်တ့ၢ်ဝဲအသးအိၣ်ဝဲလၢ တစှၤန့ၢ် (၃)ဘျီလံအသိး, ကၠိစ့ၢ်ကီး အဃိ ဘၣ်တၢ်ပံးဃၥ်ဝဲ ကဲထီၣ်တ့ၢ်အသးအဂ့ၢ်, သ့ၣ်ညါဘၣ်န့ၣ်လီၤ.