လါအီးကထိဘၢၣ် ၂၈သီ, ၂၀၂၆နံၣ်, ခ့ၣ်အဲးစံၣ်,
ကီၢ်ကၠီၣ်တဲၣ်-တးခ်ကီၢ်ရ့ၣ် မဲၢ်ဆီးဝ့ၢ် မဟၤဝၤ သဝီကရူၢ် မဲၢ်ကိးက့ သဝီအပူၤ ကျိချံပှၥ်သၣ်စုကဝဲၤလၢ ကီၢ်ပယီၤတကပၤ လီၤတဲၥ်ဝဲ ဒီး ကမျၢၢ်တၢ်ဘၣ်ဒိဘၣ်ထံး, တၢ်သူၣ်ထီၣ်တဖၣ် ဘၣ်ဟးဂီၤဝဲ အဖီခိၣ် လီၢ်ကဝီၤ ပှၤဘၣ်မူဘၣ်ဒါတဖၣ်ကဟံးမူဒါ ဘှါရှဲဝဲအဂီၢ် မဟါလါအီးကထိဘၢၣ် (၂၇)သီအနံၤဂီၤခီအပူၤ လီၢ်ကဝီၤဖိတဖၣ် ထုးထီၣ်ပၥ်ဖျါဝဲဒၣ်အသးအဂ့ၢ်, ကၠီၣ်တဲၣ်တၢ်ကစီၣ်တဖၣ် ပၥ်ဖျါထီၣ်ဝဲန့ၣ်လီၤ.
မဲၢ်ကိးက့ ကဝီၤဒ့ နီၢ်ဂံၢ်(၁)(၂)(၄) ဒီး(၉) လီၢ်ကဝီၤဖိအဂၤ(၂၀၀)ဘျဲၣ်သ့ၣ်တဖၣ်အံၤ ပၥ်ဖှိၣ်ထီၣ်သးလၢ သဝီတီၤထီကၠိ တၢ်လိၥ်ကွဲလီၢ်ဒီး လၢတၢ်ကပတုၥ်ကွံၥ်ဝဲ ကီၢ်ဆၢ ကီၢ်ပယီၤတကပၤ တၢ်ဒုးတၢ်ယၤအဂီၢ် ပၥ်ဖျါထီၣ်ဝဲ တၢ်ဃ့ထီၣ် (၅)ထံၣ်န့ၣ်လီၤ.
ခီကီၢ်ပှၤမၤတၢ်ဖိတဂၤ စံးဝဲဒၣ်လၢ “အခဲအံၤနံၣ်တဝၥ်အတီၢ်ပူၤ မဲၢ်ကိးက့ (ယိၤ) ကၠီၣ်တဲၣ် ဟံၣ်ဃီ, တၢ်သူၣ်အီၣ်ဖျးအီၣ်လီၢ်ဒီး ပှၤမၤတၢ်ဖိတဖၣ် ဘၣ်ဒိဘၣ်ထံးအိၣ်ဝဲအဃိ အဝဲသ့ၣ် ပၥ်ဖျါထီၣ်အသးလီၤ. ကျိချံသ့ၣ်တဖၣ် ဟဲဘၣ်လၢအံၤအဃိ အသုဘၣ်အိၣ်ကဒုသးအဖီခိၣ် ပၥ်ဖျါထီၣ်အသးလၢ ပဒိၣ်ပပှၢ်န့ၣ်လီၤ ”အဂ့ၢ် စံးဝဲန့ၣ်လီၤ.
တၢ်ထုးထီၣ်ပၥ်ဖျါသးအံၤ မ့ၢ်ဒ်သိး တၢ်ကဒီသဒၢဝဲ ကီၢ်ဆၢ စုကဝဲၤတၢ်လီၤဘၣ်ယိၣ်, တၢ်ဘၣ်ဒိဘၣ်ထံးတၢ်ဟ့ၣ်စ့အီၣ်လိး ဒီး ဟ့ၣ်တၢ်ဘၣ်ဒိဘၣ်ထံးအလုၢ်အပှ့ၤ ဒီး တၢ်ကသူၣ်ထီၣ်ဝဲ တၢ်ဘံၣ်တၢ်ဘၢ တၢ်အိၣ်ကဒုလီၢ်လၢ လီၢ်ကဝီၤဖိတဖၣ် အဂီၢ်အဂ့ၢ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ, ဒ်သိးခါဆူညါ တၢ်ဘၣ်ဒိဘၣ်ထံးလၢ ကၠီၣ်တဲၣ်ပူၤ သုတအိၣ်လၢၤတဂ့ၤ ဒီး ပဒိၣ်ပပှၢ်တဖၣ် ကတၢၣ်ပီၣ်တဲသကိးတၢ်ဒီး ပှၤလၢဘၣ်ထွဲ တဖၣ် အမဲၥ်ညါ, ကမၤဝဲ တၢ်ဟ့ၣ်ပလီၢ်ဘၣ်ဃး တၢ်ဒုးတၢ်ယၤ ဂ့ၢ်ဝီ တဖၣ်အဂီၢ် မဲၢ်ကိးက့ လီၢ်ကဝီၤဖိတဖၣ် ဃ့ထီၣ်ဃုၥ်ဝဲန့ၣ်လီၤ.
အပူၤကွံၥ် (၂၀၂၅)နံၣ် လၢၥ်အပူၤ ဖလူ မ့လဲၣ်ပၣ် ဃုၥ်ဒီး ရၤမတံကလံၤထံး ဟီၣ်ကဝီၤအပူၤ သုးကရူၢ်ဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) အဘၢၣ်စၢၤ တၢ်ခးလိၥ်သး ကဲထီၣ်ဒိၣ်ထီၣ်ဝဲန့ၣ်လီၤ.
ဒီးတၢ်ခးလိၥ်သးအပူၤ ကျိဖိ, ကျိဖးဒိၣ် ဃုၥ်ဒီး (ကၤမံးကၤစံၤ)ဒြိ တဖၣ် လီၤတဲၥ်ဝဲလၢ ကၠီၣ်တဲၣ်တကပၤခဲအံၤခဲအံၤအဃိ ဘၣ်ဒိဝဲ ကၠိတၢ်သူၣ်ထီၣ်, သီခါဖၠၣ် ကမျၢၢ်ဟံၣ် တစှၤန့ၢ် (၉)ဖျၢၣ် အိၣ်ဝဲန့ၣ်လီၤ.
တကးဒံးဘၣ် ပိၥ်မုၣ်ပိၥ်မၢၤဘၣ်သံဝဲ (၂)ဂၤ ဒီး ကၠီၣ်တဲၣ် ထံဖိကီၢ်ဖိဃုၥ် ဒီး ကီၢ်ဆၢ လီၢ်ကဝီၤဖိတဖၣ် ဘၣ်ဒိဝဲ တစှၤန့ၢ် (၄)ဂၤအိၣ်ဝဲအဂ့ၢ် သ့ၣ်ညါဘၣ်န့ၣ်လီၤ.
ဒ်န့ၣ်အသိး, တၢ်ဒုးတၢ်ယၤအဃိ ဖလူ မ့လဲၣ်ပၤ အ့ကၠ့မၠဲၤ ထံမဲၥ်ဝါခံ, ဒီး လ့က့ၣ်ကိၥ် ဝ့ၢ်သီ လီၢ်ကဝီၤဖိတဖၣ်အံၤ လၢ သူမွဲထံကျိတဆီ ဘၣ်ဃ့ၢ်ထီၣ်အိၣ်ကဒုဝဲအသးလၢ မဲၢ်ကိးက့တကပၤ အိၣ်ဝဲဒီး တနံၣ် အတီၢ်ပူၤ လီၢ်အိၣ်ကဒုဖိ အိၣ်ထီၣ်ဝဲ လၢ(၂၀၀) ဂၤဘျဲၣ်အဂ့ၢ်, မဲၢ်ကိးက့ လီၢ်ကဝီၤဖိတဖၣ် စံးဝဲန့ၣ်လီၤ.