လါအီးကထိဘၢၣ် ၂၃သီ, ၂၀၂၆နံၣ်,
ကညီကီၢ်စဲၣ် လူၢ်ပျဲၣ်ကီၢ်ဆၣ် အပူၤလၢတၢ်ကမၤလၤကပီၤဝဲ လါလၢကဟဲ လါယနူၤအါရံၤ(၈)သီ လၢကလီၤဘၣ်ဝဲ ကညီဒီလုၥ်နံၣ်ထီၣ်သီ မုၢ်နံၤ အဂီၢ်, သုးကရူၢ်, ကညီကီၢ်စဲၣ် တၢ်ဘူၣ်တၢ်ဘါခိၣ်နၢ်ဒီး ပှၤတီခိၣ်ရိၢ်မဲ ဟ့ၣ်တၢ်ဆီၣ်ထွဲ သုးခိၣ်ဒိၣ်စိစီၤခၠံၣ်သူၣ် ကရူၢ်ကရၢတဖၣ် မၤဝဲတၢ်စးထီၣ်ရဲၣ်ကျဲၤလီၤတၢ်လံအဂ့ၢ်, သ့ၣ်ညါဘၣ်န့ၣ်လီၤ.
လူၢ်ပျဲၢ်ကီၢ်ဆၣ်ဒီတဘ့ၣ်ပတီၢ် တၢ်ကမၤဝဲ ကညီနံၣ်ထီၣ်သီတၢ်ရဲၣ်တၢ်ကျဲၤအပူၤတၢ်ကထၢနုၥ်ဝဲ ဒိတၢ်ဂဲၤကလံၣ်, ဖျၢၣ်ထူ, တၢ်ထိ တၢ်ဂဲၤလိၥ်ကွဲတဖၣ်ဒီး တနံၣ်အံၤတၢ်ကမၤဝဲ ဒိၣ်ဒိၣ်မုၢ်မုၢ်အါန့ၢ်ဒံး နံၣ်လၢအပူၤကွံၥ် အဂ့ၢ်, အပူၤကွံၥ် လါအီးကထိဘၢၣ်(၂၁)သီအနံၤ တၢ်မၤဝဲ တၢ်တၢၣ်ပီၣ်ဆိတၢ်ရဲၣ်တၢ်ကျဲၤလၢ ကွိဘံၤ သဝီအပူၤ အဂ့ၢ် ပှၤလဲၤထီၣ်တၢ်အိၣ်ဖှိၣ် တဖၣ်စံးဝဲန့ၣ်လီၤ.
ဟီၣ်ကဝီၤပှၤဘၣ်မူဘၣ်ဒါလၢ လဲၤထီၣ်အိၣ်ဖှိၣ်အကျါတဂၤ စံးဝဲလၢ “မဟါ တၢ်အိၣ်ဖှိၣ်အပူၤ တၢ်တဲလီၤဝဲလၢ တၢ်ကကိးဝဲ တသဝီန့ၣ် တၢ်လိၥ်ကွဲတဖုန့ၣ်လီၤ.တၢ်ဒုးအိၣ်ထီၣ်ဝဲ ကမံးတံၥ် (၂၇)ဖု ဒီး တၢ်ဟ့ၣ်လီၤဝဲ တၢ်ထိ, ဖျၢၣ်ထူ ခိၣ်ဖး ဒီး တၢ်ပၥ်လီၤတၢ်လီၢ်တၢ်ကျဲတဖၣ် အဂီၢ်တၢ်နီၤဖးလီၤဝဲ မူဒါန့ၣ်လီၤ.ကမၤဝဲ ဒိၣ်န့ၢ်ဒံး နံၣ်လၢ အပူၤကွံၥ်န့ၣ်လီၤ.” အဂ့ၢ်စံးဝဲန့ၣ်လီၤ.
လၢန့ၣ်အမဲၥ်ညါ, တၢ်ပညိၣ်လၢ တၢ်ဃူတၢ်ဖိးကအိၣ်အဂီၢ် နံၣ်ထီၣ်သီမူးတၢ်ရဲၣ်တၢ်ကျဲၤအပူၤ တၢ်ကမၤစ့ၢ်ကီး ကညီဒီကလုၥ် တၢ်ကွၢ်ကီလီၢ် တဖၣ်အဂ့ၢ်, လူၢ်ပျဲၢ် ပှၤလၢအဘူးဒီး သုးကရူၢ်တဖၣ် စံးဝဲန့ၣ်လီၤ.
ဒ်သိး မူးတၢ်ရဲၣ်တၢ်ကျဲၤ ကကဲထီၣ်လိၣ်ထီၣ်အဂီၢ် သုးခိးကီၢ်ဆၢ (-BGF) လၢအဆီတလဲသးလၢ ကညီဒီကလုၥ်သုးမုၢ်ဒိၣ် (-KNA) ခိၣ် သုးခိၣ်ဒိၣ်စိစီၤခၠံၣ်သူၣ် ဒီး တၢ်ဘူၣ်တၢ်ဘါခိၣ်နၢ်တဖၣ် ကရူၢ်ကရၢတဖၣ်အံၤ မ့ၢ်ဝဲ ပှၤဆီၣ်ထွဲမၤစၢၤတၢ်အခိၣ်သ့ၣ် သ့ၣ်တဖၣ် ဒီး လၢမူးတၢ်ရဲၣ်တၢ်ကျဲၤ တၢ်လၢၥ်ဘူၣ်လၢၥ်စ့ၤ အဂီၢ် တၢ်ကမၤကဒီးဝဲ တၢ်အိၣ်ဖှိၣ်တဲသကိးဖဲ လါလၢကဟဲအပူၤ အဂ့ၢ်, တၢ်ကတိၤတၢၣ်ပီၣ်တ့ၢ်ဝဲဒၣ်ဖဲတၢ်အိၣ်ဖှိၣ်အပူၤ အဂ့ၢ် သ့ၣ်ညါဘၣ်န့ၣ်လီၤ.
သုးခိၣ်ဒိၣ်စိစီၤခၠံၣ်သူၣ် အဟံၣ်ဖိဃီဖိ ဃုၥ်ဒီး (BGF/KNA) ခိၣ်နၢ်တနီၤသ့ၣ်တဖၣ်အံၤ ထံဂုၤကီၢ်ဂၤတဖၣ် မၤဝဲတၢ်ကးတံၥ်အီၤလၢအဘၣ်ဃးဒီး ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဒီတကျိၤအပူၤ Online တၢ်လံၣ်အီၣ်လီအီၣ် တၢ်ဖံးတၢ်မၤဒီး တၢ်မၤဆါအီၣ်ပှၤကူပှၤကညီတၢ်ဖံးတၢ်မၤ တဖၣ်အဂ့ၢ်, သ့ၣ်ညါဘၣ်န့ၣ်လီၤ.
ထံဂုၤကီၢ်ဂၤအတၢ်တြီကးတံၥ်ကတီၢ်, မၤလၤကပီၤဝဲ ကညီမုၢ်နံၤဒိၣ်ထီအပူၤ မၤဝဲတၢ်လိၣ်ခိၣ်လိၣ်ကွဲ တဖၣ် ဒိၣ်ဒိၣ်ထီထီဒီး ဆီၣ်ထွဲမၤစၢၤ သူဝဲ ကျိၣ်စ့တဖၣ်အါအါဂီၢ်ဂီၢ် အဖီခိၣ် စိရှၢၣ်မံးဒံးယၢၣ်အပူၤ တၢ်ပဲၥ်ထံနီၤ ဖးဝဲလၢ လူၤက့ၤဝဲ အသူးသ့ၣ်လၤကပီၤဒီး မၤန့ၢ်က့ၤဝဲ ကမျၢၢ်တၢ်ဘၣ်သး အိၣ်ဝဲအသိး, လီၢ်ကဝီၤဖိလၢအအိၣ်ပှိၤ ဝဲအီၤသ့ၣ်တဖၣ်အံၤထံၣ်ဝဲလၢအဝဲ မ့ၢ်ပှၤလၢ ပၥ်ဒိၣ်ပၥ်ကဲတၢ်ဘူၣ်တၢ်ဘါဒီး အဲၣ်ပှၤကလုၥ်အိၣ်ဝဲန့ၣ်လီၤ.
ဒ်န့ၣ်အသိး, အဂၤတကပၤ ကညီကီၢ်စဲၣ်အပူၤ ဖီၣ်စုကဝဲၤဒုးယၤတၢ်သဘံၣ်သဘုၣ် အဃိ တၢ်ဘၣ်ဃ့ၢ်အိၣ်ကဒုဝဲဒီး တၢ်သံတၢ်ဘၣ်ဒိဘၣ်ထံးအိၣ်ဝဲတပယူၥ်ဃီအသိး, လၢကလီၤဘၣ်ဝဲ ကညီကီၢ်စဲၣ်မုၢ်နံၤ ဒီး သတ့ကၠိး မူးပွဲ အဂီၢ် သုးကရူၢ်တကပၤရဲၣ်ကျဲၤဝဲလၢ ကမၤဝဲ မူးပွဲ ဒိၣ်ဒိၣ်မုၢ်မုၢ် အိၣ်ဝဲအဂ့ၢ်, သ့ၣ်ညါဘၣ်န့ၣ်လီၤ.