(သုးက့ ၃)ဟီၣ်ကဝီၤတလါအတီၢ်ပူၤ ပယီၤသုးသံဘၣ်ဒိ(၁၈)ဂၤဒီးဟဲက့ၤပၥ်လီၤစုကဝဲၤ(၁၁)ဂၤ

လါအီးကထိဘၢၣ် ၈ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃) မူကီၢ်ဆၣ်,လၢၢ်ဒိၣ်ကီၢ်ဒီး ဆီထံးကီၢ်ဆၣ်ဟီၣ်ကဝီၤအပူၤ လၢလါစဲးပထ့ဘၢၣ် ၁ သီတုၤ ၃၀ သီလၢတလါအတီၢ်ပူၤအံၤ ပယီၤသုးတကပၤသံဘၣ်ဒိဝဲ(၁၈)ဂၤဒီး ဟဲက့ၤပၥ်လီၤ စုကဝဲၤ အိၣ်ဝဲ(၁၁)ဂၤ အဂ့ၢ်န့ၣ် သ့ၣ်ညါဘၣ်လၢကီၢ်ရ့ၣ်တၢ်မၤနီၣ် စရီအပူၤန့ၣ်လီၤ.

လၢတၢ်ဒီတလါအတီၢ်ပူၤအံၤ ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ် ခိးထုး,လဲၤကစီၤခးဒီး တၢ်ဘၣ်သဂၢၢ်ခးလိၥ်သးကဲထီၣ်ဝဲဒီးပယီၤသုးအိၣ်ဝဲတစှၤန့ၢ်ဝဲ(၇)ဘျီဒီး ဖဲန့ၣ်ပယီၤသုးတကပၤသံ(၁၃)ဂၤဒီးဘၣ်ဒိဘၣ် ထံး(၅)ဂၤ န့ၣ်လီၤ.

ဒ်န့ၣ်အသိးသုးမီၤစိရိၤ ခီၣ်သုးရ့ၣ် (ခလရ-၅၉၂/၅၉၆) ,ခီၣ်ချ့သုးရ့ၣ်(ခမရ-၅၉၇/၆၀၃) သုးရ့ၣ် အပှၤသုးဖိ(၁၁)ဂၤ ဟဲက့ၤပၥ်လီၤစုကဝဲၤလၢ(သုးက့ ၃)အအိၣ်စိၥ်ဃုၥ်ဝဲ MA ကျိ,အချံအသၣ်ဃုၥ်ဒီးစုကွံၥ်မ့ၣ်ပိၣ် သ့ၣ်တဖၣ် အဂ့ၢ်န့ၣ် သ့ၣ်ညါဘၣ် န့ၣ်လီၤ.

ဒုးယၤတၢ်သဘံၣ်သဘုၣ်အမဲၥ်ညါလၢတကပၤစ့ၢ်ကီး သုးမီၤစိရိၤအံၤ လၢလီၢ်ကဝီၤကမျၢၢ်ဒူသဝီ,တၢ်ဖံးအီၣ်မၤအီၣ်လီၢ်ကျဲအပူၤ အဝဲသ့ၣ်ကဘီယူၤအကလုၥ်ကလုၥ်လၢအပၣ်ဃုၥ်ဝဲ(Y-12)ဒီး(Jet fighter)သ့ၣ်တဖၣ်အံၤ လဲၤခးလီၤတၢ်(၁၇)ဘျီ, ဒြိ(၁၆)ဘျီ, ကျိဖးဒိၣ်(၆)ဘျီ ပၥ်ဖှိၣ်ခဲလၢၥ်အဘျီ (၄၀)ဃၣ်ဃၣ်ဒီး တ့ၢ်လီၤဝဲမ့ၣ်ပိၢ်ကျိဒိၣ်အသၣ်ခဲလၢၥ် (၈၁)ဖျၢၣ်န့ၣ်လီၤ.

ဒီးခီဖျိလၢတၢ်ဟူးတၢ်ဂဲၤသ့ၣ်တဖၣ်အံၤအဃိ လီၢ်ကဝီၤကမျၢၢ်ဃုၥ်ဒီးဖိသၣ်ဆံးသံဝဲ(၆)ဂၤဒီးဘၣ်ဒိၣ်ထံး(၈)ဂၤတကးဒံးဘၣ် ဟံၣ်ဟးဂီၤဝဲ (၃)ဖျၢၣ်ဒီး ကျီၢ်,ထိး,ကသ့ၣ်သံဘၣ်ဒိဘၣ်ထံးတစှၤန့ၢ်(၄၀)ဒုအဂ့ၢ်န့ၣ် သ့ၣ်ညါဘၣ်န့ၣ်လီၤ.

ချၢၣ်လွံၢ်ထူၣ်ကီၢ်ရ့ၣ်အပူၤကွံၥ်လါအီကူးတလါအတီၢ်ပူၤန့ၣ်စ့ၢ်ကီး ခီဖျိကျိဖးဒိၣ်,ဒြိ,ကဘီယူၤအံၤအဃိစ့ၢ်ကီး လီၢ်ကဝီၤကမျၢၢ် သံ(၆)ဂၤဒီးဘၣ်ဒိဘၣ်ထံးဝဲ(၁၂)ဂၤကဲထီၣ်ဒံးဝဲဒၣ်န့ၣ်လီၤ.