လါအီးကထိဘၢၣ် ၈သီ, ၂၀၂၆နံၣ်, ခ့ၣ်အဲးစံၣ်,
ခါလၢကဟဲလါအီးကထိဘၢၣ် အသီ ၁၀အနံၤန့ၣ် တၢ်ကက့ၤအိးထီၣ်တၢ်မၤ(CI)လံၥ်အဂ့ၢ် ကီၢ်ကၠီၣ်တဲၣ်ဘိးဘၣ်ရၤလီၤဝဲဒၣ်န့ၣ်လီၤ.
ကီၢ်ပယီၤပှၤမၤတၢ်ဖိလၢကီၢ်ကၠီၣ်တဲၣ်တဖၣ်အဂီၢ် CI (Certificate of Identity) လံာ် တၢ်မၤအလီၢ်တဖၣ်န့ၣ် ကီၢ်ကၠီၣ်တဲၣ်တၢ်ဖံးတၢ်မၤဝဲၤကျိၤ ဘိးဘၣ်ရၤလီၤဝဲ လံာ်ဟ့ၣ်သတြီၤ ဖဲလါအီးကထိဘၢၣ် ၅ သီအနံၤအပူၤအဃိ စးထီၣ်ဖဲ လါအီးကထိဘၢၣ် ၁၀ သီန့ၣ် CI လံာ် တၢ်မၤအလီၢ်တဖၣ် ကစးထီၣ်အိးထီၣ်ဝဲအဂ့ၢ် သ့ၣ်ညါဘၣ်န့ၣ်လီၤ.
CI လံာ် တၢ်မၤအလီၢ်တဖၣ်န့ၣ် ကအိးထီၣ်ဝဲဖဲ ကီၢ်ရ့ၣ် ၅ ဘ့ၣ်လၢအမ့ၢ် Samut Sakhon, Samut Prakan, Surat Thani, Chiang Mai, ဒီး Chon Buri တဖၣ်အပူၤန့ၣ်လီၤ.
ပှၤမၤတၢ်ဖိလၢ အဲၣ်ဒိးမၤ CI လံာ် တဖၣ်န့ၣ် ဖဲ CI တၢ်မၤအလီၢ်တဖၣ် တချုးအိးထီၣ်ဒံးဘၣ်အခါ စးထီၣ်ခဲအံၤ ဟ့ၣ်လီၤအမံၤသ့လံလၢ ပှၤမၤန့ၣ်တၢ်လၢခၢၣ်စး ဒ်သိး ကတဲာ်ကတီၤအဂီၢ်ကသ့ဝဲအဂ့ၢ် သ့ၣ်ညါဘၣ်န့ၣ်လီၤ.
တၢ်မၤ CI လံာ်အဂီၢ် လံာ်လဲၢ်လၢလိၣ်တဖၣ်၊ တၢ်မၤအကျိၤအကျဲတဖၣ် ဒီး တၢ်လၢာ်ဘူၣ်လၢာ်စ့တဖၣ်အဂ့ၢ်န့ၣ် တၢ်သိၣ်တၢ်သီတဖၣ် တထုးထီၣ်ဒံးဘၣ်အဂ့ၢ်န့ၣ် သ့ၣ်ညါဘၣ်လၢ CI ပှၤမၤန့ၣ်တၢ်လၢခၢၣ်စး တဖၣ်အအိၣ်န့ၣ်လီၤ.
လၢန့ၣ်အမဲၥ်ညါ CIလံာ် ပှၤမၤန့ၣ်တၢ်လၢခၢၣ်စး(ပွဲစါ)တဂၤ စံးဝဲ “တၢ်မၤ CI လံာ်အဂီၢ် ပနၢ်ဟူလၢ လံာ်လဲၢ်လၢလိၣ်တဖၣ်အကျါ ကလိၣ်ဘၣ်စ့ၢ်ကီး တၢ်ဆှၢစ့ဆူ ကီၢ်ပယီၤ အခိအသွဲလံာ်လဲၢ်လီၤ. ဘၣ်ဆၣ် တၢ်ဂ့ၢ်တခါအံၤ တၢ်တအိၣ်ဒံးဘၣ်လၢ ကအၢၣ်လီၤအီၤလီၤတံၢ်လီၤဆဲးဘၣ်န့ၣ်လီၤ.”
CI လံာ် အဂီၢ် လံာ်လဲၢ်လၢလိၣ်တဖၣ် ဒီး တၢ်မၤအကျိၤအကျဲ လီၤတံၢ်လီၤဆဲးတဖၣ်န့ၣ် ပှၤဘၣ်မူဘၣ်ဒါ သ့ၣ်တဖၣ် တထုးထီၣ်ပာ်ဖျါဝဲဒံးဘၣ်အဃိ ၦၤမၤတၢ်ဖိတဖၣ် ကြၢးအိၣ်ခိးကွၢ် တၢ်ဘိးဘၣ်သ့ၣ်ညါ တဖၣ်န့ၣ်လီၤ.
