အၣ်စံၣ်ယၣ် ကပၥ်ဖှိၣ်မၤသကိးတၢ်ဒီး ကီၢ်ပယီၤဂၥ်တဲၥ်ဂီၤ လၢကဟ့ၣ်ဝဲ ကညီဒီးယိၤဒိၣ် ကီၢ်စဲၣ် ပှၤလီၢ်အိၣ်ကမှံ တၢ်ဆီၣ်ထွဲမၤစၢၤ

လါအီးကထိဘၢၣ် ၂၈သီ, ၂၀၂၆နံၣ်, ခ့ၣ်အဲးစံၣ်,

အၣ်စံၣ်ယၣ် တၢ်ရဲၣ်သဲကတီၤ န့ဆၢၣ်တၢ်ဘၣ်ဒိဘၣ်ထံးဂ့ၢ်ဝီ တၢ်ဟ့ၣ်တၢ်ဒိသူၣ်ဒိသးတၢ်ဆီၣ်ထွဲမၤစၢၤ လီၢ်ခၢၣ်သးတၢ်တၢၣ်ပီၣ်တၢၣ်ပီဝဲၤကျိၤ(AHA Centre)ဒီး ကီၢ်ပယီၤဂၥ်တဲၥ်ဂီၤကရူၢ်ကရၢအံၤ ပၥ်ဖှိၣ်မၤသကိးဝဲ တၢ်လၢတၢ် ကဟ့ၣ်လီၤဝဲတၢ်ဆီၣ်ထွဲမၤစၢၤလၢ ကညီ ဒီး ယိၤဒိၣ်ကီၢ်စဲၣ်အဂီၢ်အဂ့ၢ်, ဖံလံးပံး ထံဂုၤကီၢ်ဂၤ ကိတိၥ်ဝဲၤကျိၤ(DFA)ထုးထီၣ်ပၥ်ဖျါဝဲန့ၣ်လီၤ.

ဒ်ဖံလံးပံးအထုးထီၣ်ပၥ်ဖျါဝဲအသိးန့ၣ်, ကီၢ်ပယီၤအပူၤ ကညီဒီး ယိၤဒိၣ်ကီၢ်စဲၣ် ပှၤလီၢ်အိၣ်ကဒုဖိတဖၣ် ဟံၣ်ဒူၣ် (၁၁,၀၀၀) ဖျၢၣ် တၢ်ဆီၣ်ထွဲမၤစၢၤ အဂီၢ် တနံၤအံၤလါအီးကထိဘၢၣ် (၂၈)သီအနံၤအပူၤ ကတုၤဃီၤဝဲဒီး တၢ်ရဲၣ် တၢ်ကျဲၤအံၤ ဖံလံးပံး ထံဂုၤကီၢ်ဂၤ ကိတိၥ်ဝဲၤကျိၤခိၣ် မၤရံယၤထရံၣ်စၤ တီခိၣ်ရိၣ်မဲဝဲအဂ့ၢ်, ပၥ်ဖျါဝဲဒၣ် န့ၣ်လီၤ.

ဒီး တၢ်ဆီၣ်ထွဲမၤစၢၤအံၤ တၢ်ကဟ့ၣ်နီၤလီၤဝဲ ဟုသးကံလိ(၅၀)ထၢၣ် တဖၣ်, ဟံၣ်တၢ်သူတၢ်စွဲ တၢ်ဖိ တၢ်လံၤ, နီၢ်တဂၤ ဒီး တၢ်ကဆှဲကဆှီတၢ်ဖိတၢ်လံၤ တဖၣ်ဒီး တၢ်ရဲၣ်တၢ်ကျဲၤအံၤ ကမၤဝဲလၢ တလါအတီၢ်ပူၤအဂ့ၢ် သ့ၣ်ညါဘၣ် ဒ်တၢ်ပၥ်ဖျါဝဲအသိးန့ၣ်လီၤ.

ဘၣ်ဆၣ် လၢကညီကီၢ်စဲၣ် ပှၤလီၢ်အိၣ်ကဒုဖိတဖၣ်အဂီၢ် တၢ်ကဟ့ၣ်နီၤလီၤဝဲ ဟံၣ်ဒူၣ်နီၣ်ဂံၢ်ဒီး တၢ်မၤစၢၤသ့ၣ် တဖၣ် န့ၣ် တၢ်ပၥ်ဖျါဝဲ လီၤတံၢ်လီၤဆဲးတအိၣ်ဘၣ်အသိး, အၣ်စံၣ်ယၣ်အံၤ ကီၢ်ပယီၤထံကီၢ်အဂီၢ် ထံဂုၤကီၢ်ဂၤ အတၢ်ဆီၣ် ထွဲ မၤစၢၤတဖၣ်အံၤ ဒ်သိးသုတတုၤလၢ သုးကရူၢ်အစုပူၤဒီး တၢ်သုတဟံးန့ၢ်လၢနီၢ်ကစၢ် တၢ်ဘၣ်ဘျူး အဂီၢ် တၢ်ဃ့ထီၣ်ဝဲလၢ တၢ်ကဆှၢခီဖျိဝဲလၢ ဟီၣ်ကဝီၤဂံၢ်ခီၣ်ထံးတၢ်ကရၢကရိတဖၣ် ဒီး ကလုၥ်ဒူၣ်ကရူၢ်ကရၢ တဖၣ် အစုပူၤ တဆီအိၣ်ဝဲဘၣ်ဆၣ်, ပၥ်ဖှိၣ်မၤသကိးဝဲတၢ်ဒီး ပယီၤသုးဒ်အံၤန့ၣ်လီၤ.

လၢတၢ်န့ၣ်အဃိ, အၣ်စံၣ်ယၣ် အတၢ်ဆီၣ်ထွဲမၤစၢၤအဖီခိၣ်, (CIDKP)အပှၤနဲၣ်တၢ်ခံဂၤတဂၤ သရၣ်ခဲလ့ၣ် စံးဝဲလၢ
“တၢ်မၤစၢၤလၢ အၣ်စံၣ်ယၣ်ဒု တဘၣ်ထွဲဒီးပှၤဘၣ်ဒီး အါတက့ၢ်ပတသ့ၣ်ညါစ့ၢ်ဘၣ် တဟဲခီဖျိပှၤဘၣ်. အဝဲသ့ၣ် န့ၣ်မၤတၢ်ဒီး ပယီၤသုး လိၤလိၤ အဃိလဲၤခီဖျိဝဲလၢ ပယီၤသုးန့ၣ်လီၤ.

အဝဲသ့ၣ်မ့ၢ်ထီဝဲအမံၤလၢ ကညီကီၢ်စဲၣ် သနၥ်က့ လၢပယီၤသုး တၢ်ရဲၣ် တၢ်ကျဲၤန့ၣ် ဟံးအီၣ်ဝဲစ့ဒိးလဲဒီး ပှ့ၤစုကဝဲၤန့ၣ်လီၤ.တၢ်မၤစၢၤ တတုၤလၢ ပှၤဘၣ် ကီဘၣ်ခဲအအိၣ် ဘၣ်. လဲၤဝဲဒၣ် လၢအဝဲ သ့ၣ် အဲၣ်ဒိးဟ့ၣ်တၢ်လီၢ်တၢ်ကျဲန့ၣ်လီၤ. ” စံးဝဲန့ၣ်လီၤ.

ဒ်(DFA) အတၢ်ထုးထီၣ်ပၥ်ဖျါအသိးန့ၣ်, အၣ်စံၣ်ယၣ်ကရၢလီၤဘၣ် ဖံလံးပံးထံကီၢ်အံၤ (AHA Centre)ဒီး ထံဂုၤကီၢ်ဂၤကိတိၥ်ဝဲၤကျိၤခိၣ် တၢ်တီခိၣ်ရိၣ်မဲၢ် ကီၢ်ပယီၤ တၢ်ဒိသူၣ်ဒိသးတၢ်ဆီၣ်ထွဲမၤစၢၤဂ့ၢ်ဝီ အပူၤ မၤဝဲ တၢ်ဆှၢလီၤ မုၥ်သးမၤကလီပှၤမၤတၢ်ဖိ ဒီး ပၥ်ဝဲ တၢ်ဒိသူၣ်ဒိသးတၢ်ဆီၣ်ထွဲမၤစၢၤဂ့ၢ်ဝီအံၤလၢ တၢ်ရ့ဒိၣ်အဂ့ၢ် ပၥ်ဖျါဝဲန့ၣ်လီၤ.

ဒ်န့ၣ်အသိး, အၣ်စံၣ်ယၣ် မီၢ်သီ မၤရံယၤထရံၣ်စၤ တီခိၣ်ရိၣ်မဲဝဲ တၢ်ဒိသူၣ်ဒိသးတၢ်ဆီၣ်ထွဲမၤစၢၤအံၤ လါလၢကဟဲ လါနိၣ်ဝ့ဘၢၣ် (၁၆)သီတုၤလၢ (၁၈)သီ အပူၤ တချူးတၢ်မၤဝဲ အၣ်စံၣ်ယၣ်အခိၣ်သ့ၣ်တၢ်အိၣ်ဖှိၣ်လၢ မနံၤလၤ ဝ့ၢ် ဘၣ်အဆၢကတီၢ် ကမၤဝဲတၢ်ထံၣ်လိၥ်သးဒီး သုးကရူၢ်ခိၣ်နၢ်ဒိၣ်ထီ တဖၣ် အိၣ်ဝဲအဂ့ၢ်, သ့ၣ်ညါဘၣ်လၢ အၣ်စံၣ်ယၣ် လီၢ်ကဝီၤ တၢ်ကစီၣ်ဟးထီၣ် အသိးန့ၣ်လီၤ.