လါနိၣ်ဝ့ဘၢၣ် ၂သီ, ၂၀၂၆နံၣ်, ခ့ၣ်အဲးစံၣ်,
လၢတၢ်ကဒီသဒၢဝဲ ကီၢ်ကၠီၣ်တဲၣ် တၢ်စိကမီၤၦဲၤတုၥ် ဒီး ထံကီၢ်တဘ့ၣ်အမူပျီဟီၣ်ကဝီၤအဆၢ တၢ်ဘံၣ်တၢ်ဘၢ အဂီၢ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မုၢ်နုၥ်ဒီတကျိၤအပူၤ အိၣ်ကတီၤပၥ်ဝဲအသးလၢ ကလံၤသုး တၢ်ဒီသဒၢတၢ်ဖံး တၢ်မၤတဖၣ် အဂ့ၢ်, ကၠီၣ်တဲၣ်ကလံၤသုးဂ့ၢ်ဝီ ပှၤဘၣ်မူဘၣ်ဒါတဖၣ် ထုးထီၣ်ပၥ်ဖျါဝဲဒၣ်န့ၣ်လီၤ.
ဒ်ကၠီၣ်တဲၣ်ကလံၤသုး တၢ်ထုးထီၣ်ဖျါအသိးန့ၣ်,လၢတၢ်ကဟးဆှၣ်ကွၢ်တၢ်အဂီၢ် မဟါလါနိၣ်ဝ့ဘၢၣ်(၁) ဟါခီ အနံၤ အပူၤ တၢ်ပျၢ်လီၤဝဲ (F-16) ဂ့ၢ်ဝီၢ်အူ တၢ်ခီၣ်ဆၢ ကဘီယူၤဒုးသုး (Quick Reaction Alert) တဖၣ် ဆူ မုၢ်နုၥ် ကီၢ် ဆၢ ဒီတကျိၤပူၤ အဂ့ၢ်,သ့ၣ်ညါဘၣ်န့ၣ်လီၤ.
ဒီးကလံၤသုးအတၢ်ဟူးတၢ်ဂဲၤအံၤ ဒ်တၢ်ပညိၣ်ဝဲလၢ ကီၢ်ကၠီၣ်တဲၣ် တၢ်ဘံၣ်တၢ်ဘၢ တၢ်တိၥ်ကျဲၤအဂီၢ် အသိးန့ၣ်, ကလံၤသုး ပှၤဘၣ်မူဘၣ်ဒါသ့ၣ်တဖၣ်အံၤ အိၣ်ဝဲဒီး တၢ်ကတီၤပၥ်သးလၢ တၢ်ခိးကွၢ်ဟုၣ်ကွၢ်စုၣ် တၢ်အိၣ်သး (၂၄)နၣ် ရံၣ် ဒီး တနွံ အတီၢ်ပူၤ ကိးဆၢကတီၢ်ဒဲးအဂ့ၢ်, ပၥ်ဖျါဃုၥ်ဝဲန့ၣ်လီၤ.
လၢန့ၣ်အမဲၥ်ညါ, ဒ်ထံဂုၤကီၢ်ဂၤတၢ်သိၣ်တၢ်သီတၢ်ဘျၢပတီၢ်အိၣ်ဝဲအသိးန့ၣ်, ပပၥ်ကဲဝဲ ထံကီၢ်အဂၤ အတၢ်စိကမီၤ ၦဲၤတုၥ် အသိး ကဒီသဒၢဝဲကီၢ်ကၠီၣ်တဲၣ်ထံကီၢ် ဒီး မၤဝဲတၢ်တိၥ်ကျဲၤတဖၣ် တပယူၥ်ဃီအဂ့ၢ်, ရၤလီၤ ပၥ်ဖျါဒုးသ့ၣ်ညါ ဝဲစ့ၢ်ကီးန့ၣ်လီၤ.
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ တးကီၢ်ရ့ၣ် မဲၢ်ဆီး ဟီၣ်ကဝီၤအပူၤ (၂၀၂၆)နုၥ်လီၤအပူၤ ခီဖျိ ကီၢ်ပယီၤ တကပၤ စုကဝဲၤပီးလီ လီၤတဲၥ်ဒီး ဘၣ်ဟးဂီၤဝဲ ဟံၣ်ဃီဒီး ဘၣ်ဒိဘၣ်ထံးဝဲ ကမျၢၢ်လီၢ်ကဝီၤဖိ ခဲအံၤ ခဲအံၤ အဃိ, အပူၤကွံၥ် လါအီးကထိဘၢၣ်(၂၈) သီအနံၤအပူၤ ကၠီၣ်တဲၣ် မဲၢ်ကိးက့ သဝီ လီၢ်ကဝီၤဖိတဖၣ် မၤဝဲ တၢ်ပၥ် ဖျါထီၣ်သး ဆူ ပဒိၣ်ပပှၢ်တဖၣ် အအိၣ်န့ၣ်လီၤ.
ဒီး ကမျၢၢ်တၢ်ပၥ်ဖျါထီၣ်သး အလီၢ်ခံ, တၢ်ဘၣ်ဒိဘၣ်ထံး အိၣ်ထီၣ်ဝဲအဖီခိၣ် ကၠီၣ်တဲၣ်တကပၤ ပံးကွံၥ်ဝဲ ကီၢ်ဆၢ ချံတြဲၤ အတၢ်ဟးထီၣ်က့ၤလီၤတဖၣ် အသိး, ကလံၤသုး အတၢ်ဟးဆှၣ်တၢ် ဟူးဂဲၤဝဲအဂ့ၢ်, သ့ၣ်ညါဘၣ် န့ၣ်လီၤ.
တကတီၢ်ဃီ, အဂၤတကပၤ ကၠီၣ်တဲၣ်ပှၤမၤမုၢ်ကျိၤဝဲၤကွၥ်တၢ်မၤကစၢ်တဖၣ် လ့ၤတက့ၤ သုတဖီၣ်လိၥ်စုမၤ သကိး တၢ်ဒီး ကညီဒီကလုၥ်စၢဖှိၣ်ကရၢ (KNU) လၢမုၢ်ကျိၤဝဲၤကွၥ်, ထံရူၢ်ကီၢ်သဲး ဒီး ပှၤတဝၢဂ့ၢ်ဝီ တၢ်ဖံးတၢ်မၤ တဖၣ် အဂီၢ်တဂ့ၤအဂ့ၢ်, ပယီၤသုးကရူၢ်တကပၤ ဆှၢထီၣ်ဝဲ လံၥ်တၢ်ထီဒါဆူ ကၠီၣ်တဲၣ်အအိၣ် အိၣ်ဖျါထီၣ်ဝဲလၢ စိၤရှၢၣ် မံးဒံးယၢၣ်အပူၤ န့ၣ်လီၤ.
တကးဒံးဘၣ်, ပယီၤသုးသ့ၣ်တဖၣ်အံၤ ဃ့ထီၣ်စ့ၢ်ကီးဝဲ ကၠီၣ်တဲၣ်မုၢ်ကျိၤဝဲၤကွၥ် တၢ်မၤကစၢ် သ့ၣ်တဖၣ်လၢ ကပတုၥ်ကွံၥ်ဝဲ တၢ်ရၤလီၤပနံၥ်တၢ်ကၤလၢ (KNU ) ပၢၤဃၥ်ဝဲ သီလဲၤထၣ် သုးကလၢၤ အဂ့ၢ်, သ့ၣ်ညါဘၣ်န့ၣ်လီၤ.
ဒ်န့ၣ်အသိး, ပယီၤသုးအလံၥ်တၢ်ဃ့ထီၣ်အံၤ ဆှၢထီၣ်ဝဲလၢ ထံကီၢ်ခံဘ့ၣ် သုးဂ့ၢ်ဝီ ခိၣ်နၢ်ပၣ်ဃုၥ်ပၣ်ဂီၢ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ကမံးတံၥ် တဆီ ဖဲ အပူၤကွံၥ်လါအီးကထိဘၢၣ်(၃၁)သီအနံၤအပူၤ အဂ့ၢ်, လီၢ်ကဝီၤ တၢ်ကစီၣ်သန့တဖၣ် ရၤလီၤပၥ်ဖျါဝဲန့ၣ်လီၤ.