ကျိဖးဒိၣ်ဒီးကဘီယူၤအဃိ ဒူပျၥ်ယၥ်ကီၢ်ရ့ၣ်ဒီးဘျံးဒဝဲၢ်ကီၢ်ရ့ၣ်ပူၤ ကမျၢၢ်ဒီးဖိသၣ်က့ကွဲၣ်သံ(၄)ဂၤ,ဘၣ်ဒိ(၈)ဂၤ

လါနိၣ်ဝ့ဘၢၣ် ၉ သီ, ၂၀၂၆ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒဝဲၢ်ကီၢ်ရ့ၣ်(သုးက့ ၄)ဒီးဒူပျၥ်ယၥ်ကီၢ်ရ့ၣ်(သုးက့ ၆)ဟီၣ်ကဝီၤအပူၤ ပယီၤသုး ခးလီၤကျိဖးဒိၣ်ဒီးကဘီယူၤလဲၤခးလီၤတၢ်အဃိ လီၢ်ကဝီၤကမျၢၢ်သံ(၄)ဂၤအကျါပၣ်ဃုၥ်ဖိသၣ်ဖၢစၢ်(က့ကွဲၣ်)တဂၤဒီး ဘၣ်ဒိဘၣ် ထံးဝဲခဲလၢၥ်(၈)ဂၤ အဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်အတၢ်ထုးထီၣ်ပၥ်ဖျါအပူၤ န့ၣ်လီၤ.

ဘျံးဒဝဲၢ်ကီၢ်ရ့ၣ် လၢၢ်မုၢ်လါကီၢ်ဆၣ် ဖဲအပူၤကွံၥ်လါနိၣ်ဝ့ဘၢၣ်ထီၣ် ၆ သီ ဂီၤခီ ၁၀း၀၀ ဃၣ်ဃၣ်အဆၢကတီၢ်န့ၣ် (Jet Fighter) ကဘီယူၤတဘ့ၣ်ဒီး (Gyrocopter)ကဘီယူၤ ၃ ဘ့ၣ် လဲၤတ့ၢ်လီၤဝဲမ့ၣ်ပိၢ်,ခးလီၤဝဲကျိဆဲးတဘျီဃီဆူ မစီၢ်(မစော)ကရူၢ် မစီသဝီအပူၤန့ၣ်လီၤ.

လၢကဘီယူၤအတၢ်လဲၤခးလီၤတၢ်ဘျီဝဲအံၤ မစီသဝီဖိသံဝဲတဘျီဃီ(၃)ဂၤအကျါပၣ်ဃုၥ်ဝဲ ဖိသၣ်က့ကွဲၣ်(၁)ဂၤအမဲၥ်ညါ ဘၣ်ဒိဘၣ်ထံးဝဲ(၇)ဂၤအကျါစ့ၢ်ကီးပၣ်ဃုၥ်ဝဲဖိသၣ်(၁၀)နံၣ်ဘျဲၣ်သ့ၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ် စံးဝဲ န့ၣ်လီၤ.

ဘၣ်ဃးတၢ်ဂ့ၢ်ကဲထီၣ်သးဘျီဝဲအံၤဒ်ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၣ်ဒိၣ်(KNLA)ထုးထီၣ်ပၥ်ဖျါဝဲအသိးန့ၣ် ကမျၢၢ်လၢ သံ(၃)ဂၤန့ၣ်မ့ၢ်ဝဲ ပှၤဖၢစၢ်(က့ကွဲၣ်)စီၤဆၣ်ကဆီ(၈)နံၣ်, စီၤပံပံး(၂၇)နံၣ်, စီၤကီၤလၤ(၄၈)နံၣ်သ့ၣ်တဖၣ်အံၤဒီး မ့မ့ၢ်ပှၤလၢ အဘၣ်ဒိဘၣ်ထံးသ့ၣ်တဖၣ်န့ၣ် ဖိသၣ်စီၤအဲၣ်ဒိၣ်စိ(၁၄)နံၣ်, နီၢ်ဝါ(၁၈)နံၣ်, စီၤနိစဲး(၁၈)နံၣ်, နီၢ်မိဆဲး(၂၃)နံၣ်, စီၤဖိစးလုၣ်(၂၆)နံၣ်, စီၤတဲနဲး(၂၈)နံၣ်ဒီး စီၤဆၣ်ပ့(၄၈)နံၣ်သ့ၣ်တဖၣ်အံၤန့ၣ်လီၤ.

တကးဒံးဘၣ်ကဘီယူၤအတၢ်လဲၤခးလီၤတၢ်ဘျီဝဲအံၤ ကမျၢၢ်ဟံၣ်(၁)ဖျၢၣ်,ကတီၤဆိကၠိ(၁)ဖျၢၣ်ဒီးဆဲးကဲး(၁)ခိၣ်ဟးဂီၤဝဲဒၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.

မစီကရူၢ်လၢကဘီယူၤလဲၤခးလီၤတၢ်ကမျၢၢ်ဃုၥ်ဒီးဖိဒံဖိသၣ်သံဘၣ်ဒိဘၣ်ထံးကဲထီၣ်အံၤန့ၣ် ဖဲအပူၤကွံၥ်လါအီးကူး ၂၇ ဒီး ၂၈ သီ အခါန့ၣ်စ့ၢ်ကီး ဖဲပယီၤသုးကျိၤနုၥ်လီၤအခါဖီၣ်မၤသံဒံးဝဲကမျၢၢ်ပိၥ်ခွါ(၂)ဂၤဒီး ဒွဲၣ်အူအီၣ်ဃုၥ်ဝဲကမျၢၢ်ဟံၣ်(၈)ဖျၢၣ်ကဲထီၣ် ဒံးန့ၣ်လီၤ.

ဘျံးဒဝဲၢ်ကီၢ်ရ့ၣ်အမဲၥ်ညါ ဖဲအပူၤကွံၥ်လါနိၣ်ဝ့ဘၢၣ် ၅ သီ ဟါခီ ၄း၀၀ ဘျဲၣ်အဆၢကတီၢ်န့ၣ်စ့ၢ်ကီး ပယီၤသုး(၃၁၂)အမျိၥ်သုးရ့ၣ် အံၤ ခးလီၤဝဲ(၈၁ မမ)ကျိဖးဒိၣ် ၂ ဖျၢၣ်လၢဒူပျၥ်ယၥ်ကီၢ်ရ့ၣ်(သုးက့ ၆)ကြုၢ်တုကီၢ်ဆၣ် ဝ့ၣ်စၤကိသဝီအပူၤဒံးဒီးဖဲန့ၣ်သဝီဖိပိၥ်ခွါ (၄၅)နံၣ်သံဝဲတဂၤဒီး လါတကီ(မြောက်ကြာအင်း)သဝီဖိတဂၤ အရီဘၢၣ်ထူၣ်ဟးဂီၤဒံးဝဲ(၃၀)ထူၣ်န့ၣ်လီၤ.

သုးက့(၁),(၃),(၄),(၅),(၆)ဟီၣ်ကဝီၤဒူသဝီကမျၢၢ်အိၣ်ဆိးလီၢ်,ပၢၢ်တုၤလၢတၢ်မၤလိတီၤဒၢးကရၢၢ်ပူၤအံၤဒၣ်လဲၥ် ပယီၤသုးအံၤ ပၥ်ဝဲတၢ်ခးပနီၣ်လိၤလိၤ ခးလီၤဝဲကျိဖးဒိၣ်,လဲၤတ့ၢ်လီၤဝဲမ့ၣ်ပိၢ်လၢကဘီယူၤ,ဒြိအံၤ ဟဲအါထီၣ်ဝဲဖျိဖျိဖျါဖျါအဃိ ကမျၢၢ်ဃုၥ်ဒီး ပှၤကၠိဖိ,ဖိဒံဖိသၣ်သံဘၣ်ဒိဘၣ်ထံးဟဲအိၣ်ထီၣ်ဝဲတယူၥ်ဃီန့ၣ်လီၤ.