လါနိၣ်ဝ့ဘၢၣ် ၅ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ လါအီးကထိဘၢၣ် ၁ သီတုၤ ၃၁ သီ လၢတလါ အတီၢ်ပူၤ ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီးပယီၤသုးအဘၢၣ်စၢၤ တၢ်ဒုးကဲထီၣ်ပၥ်ဖှိၣ် အိၣ်ဝဲ(၁၅၈)ဘျီဒီး ပယီၤသုးတကပၤသံ(၄၅)ဂၤ,ဘၣ်ဒိဘၣ်ထံး(၇၉)ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲန့ၣ်လီၤ.
ဒ်တၢ်မၤနီၣ်စရီပူၤပၥ်ဖျါဝဲအသိးန့ၣ် ပယီၤသုးဘၣ်ဒိဘၣ်ထံး(၇၉)ဂၤအကျါအံၤပၣ်ဃုၥ်ဝဲ သုးရ့ၣ်ခိၣ်(၁)ဂၤ, သုးခိၣ်စိ(၂)ဂၤ, သုးခိၣ်ဖိ(၁)ဂၤ, သုးခိၣ်ဂ့ၢ်ဝီ(၁)ဂၤဒီး သုးစကီၤဖိ(၂)ဂၤ အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒီးလၢတၢ်ဒုးဘျီဝဲအံၤအပူၤန့ၣ် ပယီၤသုးတကပၤသံဘၣ်ဒိဘၣ်ထံးမ့အိၣ်ဝဲဘၣ်ဆၣ် မ့မ့ၢ်လၢဟီၣ်ကဝီၤ(KNLA)သုးပၥ်ဖှိၣ် တကပၤ ခီန့ၣ် တၢ်ဘၣ်ဒိဘၣ်ထံးအိၣ်ဝဲတဆံးတက့ၢ်အဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
တကးဒံးဘၣ်လါအီးကထိဘၢၣ်တလါအတီၢ်ပူၤန့ၣ်စ့ၢ်ကီး တၢ်ဒုးကဲထီၣ်လီၢ်အမဲၥ်ညါလၢကမျၢၢ်ဒူသဝီ,တၢ်ဖံးအီၣ်မၤအီၣ် လီၢ်ကျဲအံၤအပူၤန့ၣ် သုးမီၤစိရိၤကဘီယူၤလဲၤခးလီၤဝဲတၢ်(၁၆)ဘျီ, ဒြိ(၇)ဘျီဒီး ခးလီၤစ့ၢ်ကီးဝဲကျိဖးဒိၣ်(၄၇)ဘျီ ပၥ်ဖှိၣ် ခဲလၢၥ်(၇၀)ဘျီညါန့ၣ်လီၤ.
ဒီးခီဖျိလၢသုးမီၤစိရိၤအကျိဖးဒိၣ်,ဒြိဒီးကဘီယူၤအံၤအဃိ ကမျၢၢ်လၢအတၢ်ကမၣ်တအိၣ်ဘၣ်သံကွံၥ်ဝဲ(၁)ဂၤဒီး ဘၣ်ဒိ ဘၣ်ထံး(၁၄)ဂၤအမဲၥ်ညါ ဟံၣ်(၄၁)ဖျၢၣ်ဃုၥ်ဒီးတၢ်သူၣ်ထီၣ်လၢအဂၤ(၃)ဖျၢၣ် ပၥ်ဖှိၣ်ခဲလၢၥ်(၄၄)ဖျၢၣ် လီၤပှီၢ်ဟးဂူၥ်ဟးဂီၤ ဘၣ်ဒိဘၣ်ထံးဝဲ အဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
(သုးက့ ၅)ဟီၣ်ကဝီၤအပူၤ အပူၤကွံၥ်လါစဲးပထ့ဘၢၣ်တလါအတီၢ်ပူၤခါန့ၣ်စ့ၢ်ကီး ခံခီခံကပၤအဘၢၣ်စၢၤတၢ်ဒုးကဲထီၣ်ဝဲ (၁၀၆)ဘျီဒီး ဖဲန့ၣ် ပယီၤသုးတကပၤသံ(၄၇)ဂၤ,ဘၣ်ဒိ(၂၇)ဂၤဒံးန့ၣ်လီၤ.
တကီၢ်ခါခဲအံၤဟီၣ်ကဝီၤဖဲန့ၣ်အပူၤ တၢ်ဒုးကဲထီၣ်အလီၢ်မ့ၢ်ဂ့ၤ,ကဲထီၣ်တအိၣ်အလီၢ်မ့ၢ်ဂ့ၤ သုးမီၤစိရိၤအံၤတဟးဆှဲးလၢၤဝဲ ကမျၢၢ်ဟးတ့ၢ်လီၤဝဲမ့ၣ်ပိၢ်အိၣ်ဝဲကိးမုၢ်နံၤဒဲးဃၣ်ဃၣ်ဒီး တၢ်သံတၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤအိၣ်ထီၣ်တပယူၥ် ဃီ အဖီခိၣ် လီၢ်ကဝီၤကမျၢၢ်သ့ၣ်တဖၣ်အံၤလၢသးသမူတၢ်လီၤဘၣ်ယိၣ်အဂီၢ် တၢ်ပျံၤတၢ်ဖုးတၢ်ဘၣ်ယိၣ်ဘၣ်ဘှီဟဲအါဒိၣ် ထီၣ်ဝဲ ကွ့ၢ်ကွ့ၢ်န့ၣ်လီၤ.